Harani Na an Permanenteng Pagpaomay

AN SIENSIA medikal, paagi sa pambihirang modernong mga pag-oswag kaiyan, tibaad manggana sa labanan—pero daog pa man giraray sa guerra. Haros oras na sa paghona niato nagkaigwa na kita nin mga abilidad asin kabatidan, pinoponan na kitang paluyahon nin mga kamatean, asin an kagadanan madalion na minaabot. Pero ipinanunuga nin Dios na dai magigin perming siring an kamugtakan. Paagi sa saiyang propetang si Isaias, sinabi nin Dios na saiyang ‘hahalonon an kagadanan sagkod lamang, asin papahidon an mga luha sa gabos na lalauogon.’—Isaias 25:8.

Garo daw iyan masakit na tubodon? Sa paghona daw nindo halawig nang panahon an buhay sa laog nin 80 taon? May mga kahoy na nabubuhay nin rinibong taon—taano ta dai man kamo? Tinawan nin Dios an starfish nin kakayahan na tubuan nin bilog na bagong takyag kun may maputol. Dai daw nia ikababalik an saindong hawak sa sangkap na salud asin kalubosan?

Kaidtong haros 2,000 na taon na an nakaagi si Jesu-Cristo naggibo nin pambihirang mga milagro sa daga. Pinaomayan nia bako sanang an lepra kundi an “gabos na klase nin kahelangan asin [an] gabos na klase nin kamatean sa banwaan.” An ipinasabong na rekord nagsasabi na pinaomayan nia an “mga pilay, kimay, buta, pula . . . An kadaklan nagngaralas kan maheling ninda na an pula nagtataram asin an pilay naglalakaw patin an buta nakakaheling.” Si Jesus dai nagkaipo nin mga hayop na magdodonar o mga pagbalyo nin organo—pinaomayan nia an mismong organo o parte nin hawak na may helang. Asin nagpapaomay sia sa panale, kun beses minsan harayo.a

Si Jesus bako sanang igwa kan kapangyarihan na magpaomay kundi boot man niang gibohon iyan. Sarong beses, an sarong leproso nagsabi sa saiya: “Kun boot mo sana, mapalilinig mo ako.” Si Jesus, huling naherak, maboot na nagsimbag: “Boot ko. Luminig ka.” Binuhay ngani nia liwat an mga gadan—sa kisuerra sarong okasyon pakatapos na nagpopoon nang malapa an hawak.—Marcos 1:40-42; Juan 11:38-44.

Ano an ipinaheheling kan makangangalas na mga halimbawang ini? Na si Jesus, na ngonyan natutukaw na sa trono bilang langitnon na Hade, bako sanang igwa kan kapangyarihan kundi igwa man kan kabotan na magpangyari nin tunay asin permanenteng pagpaomay. Gigibohon nia an siring sa ipinanunuga kan Biblia.

An librong iyan, an Biblia, naglaladawan sa makangangalas na pagkaliwat na madali nang mangyari sa mga inaagihan nin tawo—an pakikilabot mismo nin Dios sa mga pangyayari sa kinaban asin an pag-establisar liwat nin sarong paraisong daga na libre sa polusyon, helang, krimen, pagkaongis, asin mga guerra. Iyan nagtataram manongod sa tunay asin nagdadanay na pagpaomay, espirituwal asin pisikal. Asin ipinaririsa kan hula sa Biblia na may mga tawo na nabubuhay na kaidtong Guerra Mundial I na buhay pa kun mangyari an lakop sa kinaban na pagkaliwat na ini.—Mateo 24:3, 14, 34.

Tunay na Salud

An huring mga kapitulo kan Biblia nagtataram manongod sa sarong matanos na paghade na “naghihilig hale sa langit hale sa Dios”—pasiring sa katawohan digdi mismo sa daga. Dangan “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:2-4) Sa literal patin sa espirituwal na sentido, “an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula magkukurahaw sa kaogmahan.” “Asin mayo nin nag-eerok na masabi: ‘Naghehelang ako.’”—Isaias 35:5, 6; 33:24.

Kaya, bako sanang tabang sa medikal asin pagpaomay sa halipot na panahon, kundi tunay na salud para sa gabos an ipinanunuga sa mga mabubuhay na sakop kan Kahadean nin Dios digdi sa daga. Tunay na iyan marahayon na pasohan na maninigong pag-aaboton!

[Nota sa Ibaba]