Kun an Saindong Payo Makolog

ANO an ginigibo nindo tanganing makaginhawa? An remedyo sa kolog nin payo na tibaad magkaepekto sa nagkapira na garo bolong iyo an yelo. Haloy nang ginagamit tanganing magtao nin ginhawa sa kalintura asin lapo, an yelo puwede man na makahale sa kolog nin payo, sono sa bagong pagsiyasat. Sa 90 pasyente na grabe an kolog nin payo, kaiba an migraine, an paggamit nin yelo nagtao nin ginhawa sa 71 porsiento. An labi sa kabanga nakamate nin panaleng pag-ina kan kolog. Taano iyan ta may epekto?

“An kolog nin payo gikan sa paggatok o pagburikat kan mga ugat,” an paliwanag ni Dr. Seymour Diamond, direktor kan klinika sa kolog nin payo sa Chicago. “An lipot minapakipot sa mga ugat na ini.” Irinekomendar nia an pagbugtak nin rinonot na yelo sa plastic bag asin iduot iyan sa saindong angog sa laog nin 30 sagkod 45 minutos mantang kamo nagtutukaw o naghihigda. Tibaad makamate tolos kamo nin ginhawa huli sa nakapababagol na epekto kan yelo.