Binukasan Kaiyan an Puso kan Sakong Ama

“An sakong mga magurang mga Katolikong Italiano na noarin man dai makapot kan magasin na Torrengbantayan o Magmata! tanganing basahon,” an isinurat nin sarong babae na taga-Westerly, Rhode Island, E.U.A. Pero ngonyan, sabi nia, binukasan kan An Torrengbantayan an puso kan saiyang ama. Ipinaliwanag nia kun paano ini nangyari:

“Sarong aldaw sinubli ko an trak kan sakong ama, na may tape deck na nungka niang gamiton. Kaya inaprobetsaran ko iyan. Binugtakan ko nin cassette kan magasin na Torrengbantayan. Kan isulit ko an trak, dai ko tinangkas an cassette. Mientras tanto, kinua kan sakong ama an trak asin nagpoon na maghinanyog sa cassette.

“Makangingisi an sakong ama—paghona nia nasa radyo an mga Saksi, asin pinagparabalyohan nia an istasyon pero manongod pa man giraray sa mga Saksi an nadadangog nia. Katapustapusi, pakalihis nin duwang aldaw, narealisar nia na an nagtotokar palan cassette asin bakong an radyo. Pero kaidto nagustohan na niang marhay an nadangog nia.

“Narisa na may nanodan an sakong ama kan sia asin an sakong ina nag-eestorya na sako manongod sa nadangog nia. Kada duwang aldaw kun ako maluwas sa ministeryo, riniribayan ko an cassette sa saiyang trak. Asin kada aga pagkaheling ko saiya sa pamahawan, hinahapot nia ako nin mga arog kaini: ‘Ano magurang sa kongregasyon an agom mo?’ o, ‘An Biblia dai nagtotokdo nin purgatoryo o impiernong may kalayo, ano?’ Kaya luway-luway nanonodan nia an Biblia.”