Bagay na Mas Kaipuhan Kisa Kuwarta
“An satong sistema sa pagmotibar sagkod ngonyan haros biyong napapasikad sa balos na kuwarta.”—Psychology Today.
SI Nancy asin Howard may darakulang plano pagkakasal ninda kan 1989. Gusto ninda nin harong, aki, bagong mga kotse, asin bakasyon sa ibang nasyon. Kaya ninda iyan sa saindang suweldo. Alagad ta bigla na sana pareho sindang nawaran nin trabaho. An kuwartang natipon na pandeposito sa harong kinaipuhan na ipan-arkila.
Nininerbiyos manongod sa ngapit, kinaipuhan na idigson ninda an gabos nindang plano—pati an pagpapamilya. “Limang taon poon ngonyan,” sabi ni Nancy, “sa paghona ko sana dai kami makababalik sa dati ming kamugtakan. Gabos iyan mayo na, asin dai ko aram kun iyan mabalik pa.”
Ini nag-iilustrar nanggad kan makamomondong epekto nin pagkawara nin trabaho! Pero ibinubuyagyag man kaiyan an madayang kapangyarihan nin kuwarta. An yaon ngonyan puwedeng mawara sa aga. Arog kan realistikong ipinatanid kan Biblia: “An saimong pirak puwedeng mawara sa panale, na garo baga tinubuan iyan nin mga pakpak asin luminupad na siring sa agila.”—Talinhaga 23:5, Today’s English Version.
An pag-ako sa pagigin madaling mawara nin kuwarta mas madaling sabihon kisa gibohon. “An kuwarta iyo an unibersal na pansokol,” sabi kan Psychology Today manongod sa kaisipan nin kadaklan dapit sa kuwarta. “Iyan an pansokol niato sa mga bagay, sa parate pati sa boot niato.” An pagkabangkag sa paghanap nin kuwarta nagdara pati sa mga mayaman sa dai nahahaleng paghadit, depresyon, asin iba pang helang.
An Halaga nin Kadonongan
Alagad ta igwa nin mas kaipuhan kisa kuwarta. Iyan sinasabi kan Biblia sa Eclesiastes 7:12: “An kadonongan para sa proteksion kun paanong an kuwarta para sa proteksion.” Dangan idinudugang kan bersikulo an sarong katotoohan manongod sa kadonongan na nagpapaheling na iyan orog sa kuwarta: “An kadonongan mismo nagpapadanay na buhay sa mga nakasasadiri kaiyan.”
Kaiba sa kadonongan an kakayahan na gamiton an tamang paghusgar kun kita napapaatubang sa mapan-angat na mga kamugtakan. Kun napapaatubang kita sa pagkawara nin trabaho, an tamang paghusgar maninigong magsabi sato na an tunay na halaga nin buhay dai nasosokol sa piso asin sentimo. An tamang paghusgar makatatabang man sato na papagdanayon na tama an satong mga ipinaoorog, tinatawan nin tamang atension.
Ano an mga Ipinaoorog Nindo?
Ano an inienot nindo sa saindong buhay? An saindo daw na trabaho mas mahalaga kisa saindong pag-ibaiba mag-agom? An saindo daw na harong mas mahalaga kisa saindong mga aki? An kuwarta daw mas mahalaga kisa saindong salud? Aroaldaw kita nagdedesisyon basado sa satong sistema sa pagmotibar, o mga ipinaoorog. Kun napapaatubang sa pinansial na mga problema, an mga ipinaoorog na iyan an magdidikta kun ano an gigibohon niato. Sa ano nakasentro an mga ipinaoorog nindo?
Si Jesu-Cristo nagsabi: “Maogma idtong mga nakamamate kan saindang espirituwal na pangangaipo.” (Mateo 5:3) Mangnoha na ipinaheling ni Jesus na an espirituwalidad sarong pangangaipo, dapat ipaorog, bako sanang sarong kuwalidad na pagmamaigotan na aboton kun areglado na an gabos na iba pang bagay sa buhay.
Sarong angat na ipaorog an espirituwal na pangangaipong iyan mantang nasasakitan na tagamahan nin materyal an pamilya. Pero, an mga ginigibo iyan, arog kan sabi ni Jesus, maogma. Minsan ngani naghihingoang makakua kan mga paragastos tanganing mabuhay, sinda mayo kan “dai masabing mga pagsakit nin isip” na namamatean nin saro kun inienot an kuwarta. (1 Timoteo 6:10, Phillips) Sinda man nararanga kan mga tataramon ni David na nasusurat sa Salmo 37:25: “Ako nagin hoben man, asin naggurang man, alagad dai ako noarin man nakaheling nin siisay man na matanos na lubos na pinabayaan, ni an saiyang mga aki na nakikilimos nin tinapay.”
Panigoan an Saindong Espirituwal na Pangangaipo
An espirituwal na pangangaipo nin tawo nasa naturalesa na. An kaipuhan nia bako sanang kakanon, gubing, asin istaran. Orog pa dian an itinatao kan espirituwalidad, na sinisimbag an mga hapot na arog kan, ‘Taano ta yaon ako digdi?’ asin, ‘Pasaen daw an kinaban na ini—asin an sakong buhay?’
An pagkatakot sa “ekonomikong apokalipsis” nakapahiro sa dakol na mamatean an saindang espirituwal na pangangaipo. An Newsweek nagbabareta: “An benta nin makahulang mga libro—mga libro na nag-iinterpretar sa presenteng mga pangyayari bilang tanda kan Biblia sa katapusan kan kinaban—mas halangkaw nin 50 sagkod 70 porsiento kisa nakaaging taon.” Minsan siring, tanganing mapanigoan an espirituwal na pangangaipong iyan, kaipuhan na hanapon nin saro an tamang kaaraman, bako sanang mga pagbanabana nin tawo.
Inaagda mi kamo na siyasaton an Tataramon nin Dios, an Banal na Biblia. Iyan may praktikal na kadonongan na makatatabang saindo na maatubang an mga kahaditan sa buhay. Labi pa kaiyan, an Biblia makatatao saindo nin tamang kaaraman sa kahulogan kan “delikadong mga panahon na masakit pakibagayan” ngonyan. (2 Timoteo 3:1) Paagi sa pagsurat sa mga kagpublikar sa magasin na ini, puwedeng ikaareglo an libreng pag-adal sa Biblia. Orog kisa kasuarin pa man ngonyan na an panahon na hanapon an praktikal na kadonongan para sa presente—asin tamang kaaraman manongod sa ngapit—hale sa Tataramon nin Dios, an Biblia.
[Ritrato sa pahina 27]
An espirituwal na mga pamantayan dapat na pahalagahan