Naghabon an Sarong Israelita

HILINGA an pigtatago kan lalaking ini! Sarong magayon na bado, sarong pidaso nin bulawan, asin mga pirak. Kinua niya iyan sa siyudad nin Jerico. Pero ano kuta su dapat na ginibo sa mga bagay sa Jerico? Nagigirumduman mo?

Dapat sinurulo iyan, asin su bulawan saka plata dapat dinara sa kaban nin yaman sa tabernakulo ni Jehova. Buot sabihon, an mga tawong ini dai nagsunod sa Diyos. Hinabon ninda an mga bagay na sadiri ni Jehova. An lalaki iyo si Acan, asin an kairiba niya mga kapamilya niya. Hilingon ta an nangyari.

Pagkatapos habunon ni Acan an mga bagay na ini, nagsugo si Josue nin mga tawuhan para salakayon an siyudad nin Ai. Pero nadaog sinda. May nagkagaradan, asin an iba nagdurulag. Munduon si Josue. Suminubsob siya sa daga asin namibi ki Jehova: ‘Ta’no ta pinabayaan nindong mangyari ini samuya?’

Nagsimbag si Jehova: ‘Tumindog ka! Nagkasala an Israel. May mga kinua sinda na dapat kutang suluon o darahon sa tabernakulo. Naghabon sinda nin magayon na bado asin itinago iyan. Dai ko kamo bebendisyunan sagkod na dai nindo iyan pigsusulo, pati na si nagkua kaiyan.’ Sinabi ni Jehova ki Josue na ihahayag niya kun si’say an maraot na tawong iyan.

Tinipon ni Josue an bilog na banwaan, asin pinili ni Jehova an maraot na si Acan. Sinabi ni Acan: ‘Nagkasala ako. Nahiling ko an magayon na bado, an bulawan, saka mga pirak. Gustuhon ko iyan kaya kinua ko. Itinago ko ’yan sa irarom kan daga sa tolda mi.’

Kan kuanon ini asin darahon ki Josue, sinabi niya ki Acan: ‘Ta’no ta ipinahamak mo kami? Ipapahamak ka ngunyan ni Jehova!’ Kaya ginapo kan mga tawo si Acan asin an pamilya niya sagkod na magadan. Bako daw na ipinapahiling kaini na dai ta dapat kuanon an bakong sato?

Pagkatapos kaiyan, nakipaglaban giraray an Israel sa Ai. Tinabangan na ni Jehova an banwaan niya asin nanggana sinda.