Duwang Babayi na Makusog an Buot

PAG napapasubo sa problema an mga Israelita, nag-aagrangay sinda ki Jehova. Tinatabangan sinda ni Jehova paagi sa pagtao sainda nin mga lider na makusog an buot. Sa Bibliya inaapod sindang mga hukom. Si Josue an inot na hukom, tapos an iba pang suminunod saiya iyo si Otniel, Ehud asin Samgar. Pero an duwa sa nagtabang sa Israel mga babayi, si Debora asin Jael.

Si Debora sarong propetisa. Sinasabi saiya ni Jehova kun ano an mangyayari, tapos ipinapaisi niya iyan sa mga Israelita. Saro man siyang hukom. Nagtutukaw siya sa may puon nin palma sa bulod, asin pigdudumanan siya kan mga tawo para magpatabang sa mga problema ninda.

Kan panahon na ini, si Jabin an hadi kan Canaan. Igwa siyang 900 na karwaheng panggiyera. Makusugon an saiyang hukbo kaya dakul na Israelita an inuripon niya. An hepe kan hukbo ni Hading Jabin iyo si Sisera.

Sarong aldaw, ipinaapod ni Debora si Hukom Barak asin sinabihan ini: ‘Sinabi ni Jehova: “Mag-iba ka nin 10,000 na lalaki pasiring sa Bukid nin Tabor. Itatao ko saimo si Sisera. Dadaugon mo siya pati an hukbo niya.”’

Sinabi ni Barak ki Debora: ‘Maduman ako kun maiba ka sako.’ Nag-iba si Debora, pero sinabi niya ki Barak: ‘Bako ka an makamit kan onra, dahil itatao ni Jehova si Sisera sa kamot nin sarong babayi.’ Ini man nanggad an nangyari.

Buminaba si Barak hali sa Bukid nin Tabor para sabaton an mga suldados ni Sisera. Biglang nagpaabot nin baha si Jehova, asin dakul na kaiwal an nagkaralamos. Pero nagbaba si Sisera sa karwahe niya asin nagdulag.

Nakaabot si Sisera sa tolda ni Jael. Inagda siya ni Jael palaog asin pinainom nin gatas. Dahil kaini, nakaturog nin nanok si Sisera. Kuminua si Jael nin dakulang pako asin itinaldok iyan sa payo kan maraot na lalaking ini. Kan mag-abot si Barak, ipinahiling ni Jael an gadan na si Sisera! Kaya nagkatotoo su sinabi ni Debora.

Kan huri, ginadan man si Hading Jabin, asin nagkaigwa nin katuninungan an mga Israelita sa laog nin diit na panahon.