Nagpaumay si Jesus nin mga May Hilang

SA PAGDUMAN ni Jesus sa iba-ibang lugar, nagpapaumay siya nin mga may hilang. Nabaretaan ini sa mga baryo asin banwa. Kaya dinara saiya kan mga tawo an mga pilay, buta, bungog, pati an iba pang may hilang. Pinaumayan sinda gabos ni Jesus.

Labing tulong taon na an nakalihis puon kan bawtismuhan ni Juan si Jesus. Sinabi ni Jesus sa mga apostol niya na dai na mahahaloy, mapa-Jerusalem siya asin duman gagadanon siya dangan bubuhayon liwat. Pero bago iyan, padagos siyang nagpaumay nin mga may hilang.

Sarong beses, nagtutukdo si Jesus sa aldaw nin Sabbath. Aldaw iyan nin pahingalo kan mga Judio. An babaying nahihiling mo 18 taon nang dai makatindog nin tanos. Kinaputan siya ni Jesus, asin narahay siya!

Angguton an mga lider nin relihiyon. An saro sainda nagkurahaw sa mga tawo: ‘May anom na aldaw para magtrabaho. Iyan an mga aldaw para magpabulong, bako pag Sabbath!’

Pero nagsimbag si Jesus: ‘Grabe man kamo. Maski si’say saindo tatanggalon sa pagkakagakod an asno niya asin papainumon iyan dawa Sabbath. Bako daw na dapat man paumayan ngunyan na Sabbath an makahirak na babaying ini, na 18 taon nang may hilang?’ Dahil diyan, napasupog an maraot na mga tawong idto.

Paghaloy-haloy, nagpa-Jerusalem si Jesus asin an mga apostol niya. Kan harani na sinda sa Jerico, naisihan iyan nin duwang butang parapakilimos. Kaya nagkurahaw sinda: ‘Jesus, tabangi po kami!’

Hinapot ni Jesus an duwa: ‘Anong gusto nindo?’ Nagsabi sinda: ‘Kagurangnan, imuklat mo po an mga mata mi.’ Dinuutan ni Jesus an mga mata ninda asin tulos sindang nakahiling! Aram mo daw kun ta’no ta ginigibo ni Jesus an gabos na makangangalas na milagrong ini? Padaba niya pa’no an mga tawo asin gusto niyang magtubod sinda saiya. Kaya makakaasa kita na pag namahala na siya sa daga bilang Hadi, mayo nang magkakahilang.