Pagdatong ni Jesus Bilang Hadi

PAKAPAUMAYI sa duwang butang parapakilimos, nagduman si Jesus sa sarong sadit na baryo harani sa Jerusalem. Sinabi niya sa duwang disipulo: ‘Maglaog kamo sa baryo. May mahihiling kamo duman na asno. Tanggalon nindo iyan sa pagkakagakod tapos darahon nindo sako.’

Kan darahon ki Jesus an asno, nagsakay siya diyan pa-Jerusalem. Kan harani na siya, dakulang grupo nin mga tawo an nagsabat saiya. Ilinaag kan dakul an mga balabala ninda sa may dalan. An iba nagpurutol nin mga sanga nin palma. Ilinaag man ninda iyan sa dalan asin nagkururahaw sinda: ‘Bendisyunan lugod nin Diyos an hadi na minadatong sa ngaran ni Jehova!’

Kaidtong panahon sa Israel, an bagong mga hadi nagsasakay sa asno pa-Jerusalem para mahiling kan gabos. Ini an piggigibo ni Jesus. Asin ipinapahiling kan mga tawo na gusto nindang magin hadi si Jesus. Alagad bakong gabos gusto iyan. Mahihiling ta ini sa nangyari pagduman ni Jesus sa templo.

Sa templo, nagpaumay si Jesus nin mga buta asin pilay. Kan mahiling iyan kan mga aki, pigparaumaw ninda si Jesus. Pero naanggot an mga saserdote, kaya sinabihan ninda si Jesus: ‘Dai mo nadadangog an pigsasabi kan mga aki?’

‘Nadadangog ko,’ an simbag ni Jesus. ‘Ano, dai lamang nindo nabasa sa Bibliya: “Hali sa nguso nin saradit na aki mapaluwas nin pag-umaw an Diyos”?’ Kaya padagos na inumaw kan mga aki an hading pinili nin Diyos.

Gusto tang arugon an mga aking idto, bako daw? Tibaad may mga magpurbar na pugulan kita sa pagtaram manungod sa kahadian nin Diyos. Pero padagos tang sasabihon sa iba an makangangalas na mga bagay na gigibuhon nin Jesus para sa mga tawo.

Dai pa panahon para maghadi si Jesus kan yaon siya digdi sa daga. Nuarin mangyayari iyan? Gusto kan mga disipulo niya na maisihan iyan. Hilingon ta sa sunod na istorya.