Kapitulo 15

Paano Pinangengenotan ni Jehova an Saiyang Organisasyon?

1. Anong impormasyon manongod sa organisasyon ni Jehova an ipinahahayag kan Biblia, asin taano iyan ta mahalaga sa sato?

PAAGI sa ipinasabong na Kasuratan, si Jehova nagtatao sato nin ideya manongod sa saiyang makangangalas na langitnon na organisasyon. (Isa. 6:2, 3; Ezeq. 1:1, 4-28; Dan. 7:9, 10, 13, 14) Minsan ngani dai niato naheheling an espiritung mga linalang, ipinaaaram nia sa sato an mga paagi na an aktibidad kan banal na mga anghel nakakaapektar sa tunay na mga parasamba sa daga. (Gen. 28:12, 13; 2 Hade 6:15-17; Sal. 34:7; Mat. 13:41, 42; 25:31, 32) Ilinaladawan man kan Biblia an naheheling na kabtang kan organisasyon ni Jehova asin tinatabangan kita na masabotan kun paano nia pinangengenotan iyan. Kun kita talagang igwa nin espirituwal na pakasabot sa mga bagay na ini, ini makatatabang sato na “maglakaw na angay ki Jehova sa katuyohan na lubos na makapaogma sa saiya.”—Col. 1:9, 10.

Pakamidbid sa Naheheling na Kabtang

2. Poon kan Pentecostes nin 33 C.E. ano an nagin kongregasyon nin Dios?

² Sa laog nin 1,545 taon an nasyon nin Israel iyo an kongregasyon nin Dios. Alagad ta dai ninda naotob an tipan nin Pagboot asin isinikwal ninda an mismong Aki nin Dios. Kaya pinalataw ni Jehova an sarong bagong kongregasyon, na dian sia guminibo nin bagong tipan. An kongregasyon na ini inaapod sa Kasuratan na “nobya” ni Cristo, na kompuwesto nin 144,000 na mga pinili nin Dios na makaibanan kan saiyang Aki sa langit. (Efe. 5:22-32; Kap. 14:1; 21:9, 10) An mga naenot linahidan kan banal na espiritu kan panahon nin Pentecostes, 33 C.E. Paagi sa banal na espiritu si Jehova nagtao nin dai mamamaluan na ebidensia na iyo na ini an kongregasyon na gagamiton nia tanganing otobon an saiyang katuyohan.—Heb. 2:2-4.

3. Siisay ngonyan an minakompuwesto sa naheheling na organisasyon ni Jehova?

³ Ngonyan may natatada na sana sa 144,000 na yaon sa daga. Alagad, bilang kaotoban sa hula kan Biblia, an sarong dakulang kadaklan nin mga “ibang karnero” dinara sa aktibong pakikiasosyar sa sainda. Isinaro ni Jesu-Cristo, an Marahay na Pastor, an mga “ibang karnerong” ini sa mga kabilang sa natatada kan saiyang pinaniaki nin espiritung mga parasunod tangani na sinda minakompuwesto na sana nin “sarong aripompon” na sakop nia bilang saindang “sarong pastor.” (Juan 10:11, 16; Kap. 7:9, 10) Ini gabos minakompuwesto nin sarong burugkos na organisasyon, an naheheling na organisasyon ni Jehova ngonyan.

Teokratiko an Estruktura

4. Siisay an nangengenot sa organisasyon, asin paano?

⁴ An mga tataramon sa Kasuratan na “kongregasyon kan nabubuhay na Dios” nagpaparisa kun siisay an nangengenot dian. An organisasyon teokratiko, o pinamamahalaan nin Dios. Si Jehova an nangengenot sa saiyang banwaan paagi sa saro na Saiyang ninombrahan na magin an dai naheheling na payo kan kongregasyon, an Kagurangnan na Jesu-Cristo, asin paagi sa Saiyang ipinasabong na Tataramon, an Biblia.—1 Tim. 3:14, 15; Efe. 1:22, 23; 2 Tim. 3:16, 17.

5. (a) Paano an langitnon na pangengenot sa kongregasyon nahayag kan enot na siglo? (b) Ano an nagpapaheling na si Jesus pa man giraray an payo kan kongregasyon?

⁵ An teokratikong pangengenot na iyan narisang gayo kan an enot na mga miembro kan kongregasyon pahiroon kan banal na espiritu kan Pentecostes nin 33 C.E. (Gibo 2:1-4, 32, 33) Iyan nahayag kan an anghel ni Jehova magdirehir sa mga pangyayari na nagbunga kan pakalakop kan maogmang bareta sa Aprika. (Gibo 8:26-39) Siring man, kan an tingog ni Jesus magtao nin instruksion sa pagkakombertir ni Saulo na taga-Tarso dangan kan ponan an gibong pagmimisyonero sa tahaw kan mga Hentil. (Gibo 9:3-7, 10-17; 10:9-16, 19-23; 11:12) Alagad ta an kinakaipuhan na paggiya dai perming itinatao sa siring kamakangangalas na mga paagi. Pag-abot nin panahon mayo na nin mga tingog na nadadangog hale sa langit, mayo na nin mga anghel na nagpapaheling sa mga tawo asin mayo na nin milagrosong mga balaog kan espiritu. Pero si Jesus nanuga sa saiyang maimbod na mga parasunod: “Uya! Ako danay na nasa saindo sagkod sa pagtatapos kan palakaw nin mga bagay,” asin ipinaheling kan mga katunayan na iyan totoo. (Mat. 28:20; 1 Cor. 13:8) Bako sana na minimidbid kan mga Saksi ni Jehova an saiyang pagkapayo, kundi maliwanag man na magigin imposible para sa sainda na ipagpadagos na ibalangibog an mensahe kan Kahadean sa atubang nin grabeng pagtumang kun mayo an saiyang tabang.

6. (a) Siisay an minakompuwesto sa “maimbod asin madonong na oripon,” asin taano? (b) Ano an itinao niang asignasyon sa “oripon” na iyan?

⁶ Dai mahaloy bago an kagadanan ni Jesus sia nagtaram sa saiyang mga disipulo manongod sa sarong “maimbod asin madonong na oripon” na paniniwalaan nia bilang Kagurangnan nin espesyal na paninimbagan. An “oripon” na iyan, sono sa pagkaladawan ni Jesus, yaon kan an Kagurangnan humale sa pagsakat sa langit asin buhay pa man giraray sa panahon kan pagbuwelta ni Cristo. An siring na paglaladawan dai puwede sa sarong indibiduwal na tawo. Pero iyan puwede sa maimbod na linahidan na kongregasyon ni Cristo bilang kabilogan. Aram ni Jesus na babakalon nia sinda paagi sa saiyang dugo, kaya tama na inapod nia sinda sa kabilogan bilang saiyang “oripon.” Tinawan nia sinda nin trabaho, na isinusugo sinda gabos na gumibo nin mga disipulo dangan progresibong pakakanon sinda sa espirituwal, na tinatawan sinda kan “saindang [espirituwal na] kakanon sa igong panahon.” An pagkanombra sa sainda pinatunayan kan banal na espiritu kan Pentecostes nin 33 C.E.—Mat. 24:45-47; 28:19, 20; 1 Cor. 6:19, 20; ikomparar an Isaias 43:10.

7. (a) Anong mas dakulang mga paninimbagan an nasa “oripon” ngonyan? (b) Taano ta mahalaga an satong pagkuyog sa instruksion paagi sa intrumentong ini?

⁷ Sa pagbuwelta kan Kagurangnan, kun an “oripon” maimbod na nag-ootob kan saiyang gibohon, sia paniniwalaan nin mas dakulang mga paninimbagan. An masunod na mga taon magigin panahon para sa lakop sa kinaban na pagpatotoo sa Kahadean, asin an sarong “dakulang kadaklan” nin mga parasamba ki Jehova titiponon sa katuyohan na iligtas sinda sa “dakulang kahorasaan.” (Mat. 24:14; Kap. 7:9, 10) An mga ini man magkakaipo nin espirituwal na kakanon, asin iyan itatao sa sainda kan kompuwesto nin dakol na “oripon,” an linahidan nin espiritung mga lingkod ni Cristo. Tanganing makapaogma ki Jehova, kaipuhan na akoon niato an instruksion na itinatao nia paagi sa instrumentong ini asin humiro na lubos na kaoyon dian.

8, 9. (a) Kan enot na siglo ano an areglo para sa pagresolber sa mga hapot manongod sa doktrina asin pagtao nin kinakaipuhan na paggiya kun dapit sa paghuhulit kan maogmang bareta? (b) Anong kaagid na areglo an yaon ngonyan?

⁸ Siyempre, kun beses puwedeng lumataw an mga hapot manongod sa doktrina asin paagi. Ano na? An ika-15 kapitulo kan Mga Gibo nagsasaysay kun paano naresolberan an sarong isyu manongod sa mga kahagadan para sa nakombertir na mga Hentil. Iyan dinara sa mga apostol asin kamagurangan na lalaki sa Jerusalem, na naglilingkod bilang sentral na namamahalang grupo. An kamagurangan na lalaking idto bakong dai nasasala; sinda bakong mga tawo na noarin man dai nasasala. (Ikomparar an Galacia 2:11-14.) Pero ginamit sinda nin Dios. Pinag-adalan ninda an sinasabi kan ipinasabong na Kasuratan manongod sa bagay saka an ebidensia kan paghiro kan espiritu nin Dios sa pagbukas sa Hentil na langtad, dangan naggibo sinda nin desisyon. Binendisyonan nin Dios an areglong idto. (Gibo 15:1-29; 16:4, 5) Gikan sa sentral na grupong idto, isinugo man an mga indibiduwal tanganing mapalakop pa an paghuhulit kan maogmang bareta kaoyon sa iinautorisar mismo kan Kagurangnan.—Gibo 8:14; Gal. 2:9.

⁹ Sa satong kaaldawan an Namamahalang Grupo kompuwesto nin linahidan nin espiritung mga tugang hale sa laen-laen na kadagaan. Iyan yaon sa pankinaban na opisina prinsipal kan mga Saksi ni Jehova. Iyan maimbod na nagpapaoswag sa intereses nin purong pagsamba sa irarom kan pamayo ni Jesu-Cristo. An mga tugang na ini igwa nin punto-de-vista na kapareho kan ki apostol Pablo, na, kan magpadara nin espirituwal na hatol sa mga kapwa Kristiano, nagsurat: “Bako na kami an mga kagurangnan kan saindong pagtubod, kundi kami mga katabang para sa saindong kaogmahan, huli ta paagi sa saindong pagtubod na kamo nagtitindog.”—2 Cor. 1:24.

10. (a) Paano nadedeterminaran kun siisay an magigin kamagurangan o ministeryal na mga lingkod? (b) Taano ta maninigo kitang dayupot na makikooperar sa mga ninombrahan sa siring na mga katongdan?

¹⁰ An teokratikong areglong ini minimidbid kan mga Saksi ni Jehova sa bilog na kinaban. An gabos nindang lokal na kongregasyon nagpupunsionar na may dayupot na pakikikooperar dian. An Namamahalang Grupo an linalaoman ninda na magtagama para sa pagnombra sa kamagurangan asin ministeryal na mga lingkod na mangangataman sa marahay na pagpunsionar kan mga kongregasyon. Basado sa ano na pinipili an mga tawo para sa siring na pagnombra? An mga kahagadan malinaw na sinasabi sa Biblia. An kamagurangan na nagrerekomendar asin an mga inautorisaran na magnombra pareho igwa nin magabat na paninimbagan sa atubang nin Dios na mangapot digdi. (1 Tim. 3:1-10, 12, 13; 5:22; Tito 1:5-9) Mayo nin pagkampanya para sa siisay man na kandidato sa tahaw kan mga miembro kan kongregasyon ni ano man na pagboto kan kongregasyon. Imbes, kaoyon sa ginibo kan mga apostol kan gibohon an mga pagnombra kan enot na siglo, an mga paraataman na responsable sa pagrekomendar, asin an mga sa huri naggigibo kan pagnombra, namimibi para sa tabang kan espiritu nin Dios asin naghahagad nin paggiya sa saiyang ipinasabong na Tataramon. (Gibo 6:2-4, 6; 14:23; ikomparar an Salmo 75:6, 7.) Paagi sa satong pagkuyog sa paggiya na itinatao kan kamagurangan, ikakapaheling niato an satong pag-apresyar sa mamomoton na probisyon na ini ni Cristo na “mga balaog na lalaki” tanganing tumabang sa sato gabos na makaabot sa “pagkasararo sa pagtubod.”—Efe. 4:8, 11-16.

11. (a) Anong mahalagang mga paglilingkod an ginigibo nin mga babae sa laog kan teokratikong areglo? (b) Noarin sinda nagkakaipong magkolbong, asin taano?

¹¹ An Kasuratan nagsasabi na an mga katongdan nin pangangataman sa kongregasyon dapat na kaptan nin mga lalaki. Ini dai sa ano man na paagi nagmemenus sa mga babae, huli ta dakol sa sainda an kaiba sa mga paramana kan langitnon na Kahadean. Paagi sa mabini, malinig na gawe asin kahigosan sa pag-asikaso sa saindang pamilya, an mga Kristianong babae nakakokontribuwir man sa marahay na dangog kan kongregasyon. (Tito 2:3-5) Parate na sinda an dakol an ginigibo sa paghanap sa mga bagong interesado asin pagdara sa sainda sa organisasyon. (Sal. 68:11) Alagad an pagtotokdo sa laog kan kongregasyon inaasikaso nin mga lalaki na ninombrahan. (1 Tim. 2:12, 13) Asin kun mayo nin kuwalipikadong mga lalaki sa sarong pagtiripon na iinareglo kan kongregasyon, kun siring an sarong babae magkokolbong kun nangengenot o namimibi.a Sa siring sia nagpapaheling nin paggalang sa areglo ni Jehova, kun paanong si Jesus nagtao kan arogan para sa gabos sa pagpapasakop sa saiyang Ama.—1 Cor. 11:3-16; Juan 8:28, 29.

12. (a) Anong punto-de-vista manongod sa saindang katongdan an isinasadol kan Biblia sa kamagurangan? (b) Sa anong makangangalas na pribilehiyo puwedeng makikabtang kita gabos?

¹² Sa kinaban an tawo na igwa nin prominenteng katongdan ibinibilang na importante, alagad sa laog kan organisasyon nin Dios an reglamento iyo ini: “An minagawe bilang mas hababa sa saindo gabos iyo an dakula.” (Luc. 9:46-48; 22:24-26) Kaya an Kasuratan nagsasadol sa kamagurangan na mag-ingat na dai magpakangkagurangnan sa mga mana nin Dios kundi, imbes, magin mga arogan sa aripompon. (1 Ped. 5:2, 3) Bako sanang an pirang pinili, kundi an gabos na Saksi ni Jehova, lalaki asin babae, igwa kan makangangalas na pribilehiyo na magrepresentar sa Soberano kan uniberso, na mapakumbabang nagtataram sa saiyang ngaran asin nagsasabi sa mga tawo sa gabos na lugar manongod sa saiyang Kahadean.

13. Ginagamit an mga tekstong sitado, pag-olayan an mga hapot na nalilista sa poro kan parapong ini.

¹³ Marahay na ihapot niato sa satong sadiri: “Talaga daw na nasasabotan niato kun paano pinangengenotan ni Jehova an saiyang naheheling na organisasyon? Iyan daw ipinaririsa kan satong kaisipan, pagtaram asin mga hiro?” An pangangatanosan sa minasunod na mga punto makatatabang sa lambang saro sato na makagibo kan siring na pagsiyasat:

Kun talagang kita nagpapasakop ki Cristo bilang payo kan kongregasyon, kun siring, arog kan ipinaririsa sa minasunod na mga teksto, ano an gigibohon niato? (Mat. 24:14; 28:19, 20; Luc. 21:34-36; Juan 13:34, 35)

Sa saindang mga paghihingoa na magin mabungang Kristiano, an gabos na kabtang kan organisasyon maninigo na makamate nin guranong pagsarig sa Dios asin ki Cristo? (Juan 15:5; 1 Cor. 3:5-7)

Kun an kamagurangan naghihingoa na liwaton an kaisipan nin mga tawo tangani na an punto-de-vista ninda manongod sa mga bagay magin kaoyon sa iba pa sa organisasyon, kiisay na maboot na pagmakolog an maninigo niatong mamansayan digdi? (Efe. 4:7, 8, 11-13; 2 Cor. 13:11)

Kun may pag-apresyar niatong inaako an espirituwal na mga probisyon na minaabot paagi sa grupong “oripon” asin sa Namamahalang Grupo kaiyan, siisay an pinahehelingan niato nin paggalang? Alagad ano kun kita magtaram na may pagtatsar digdi? (Luc. 10:16; ikomparar an 3 Juan 9, 10.)

Taano ta dai kita maninigong magin sobra kamapagtatsar sa nombradong kamagurangan? (Gibo 20:28; Roma 12:10)

14. (a) Paagi sa satong paggawe sa teokratikong organisasyon, ano an ipinaheheling niato? (b) Madapit digdi, ano an oportunidad niato na patunayan na an Diablo putikon asin magtao nin kaogmahan sa puso ni Jehova?

¹⁴ Paagi sa saiyang naheheling na organisasyon sa irarom ni Cristo bilang nombradong payo na si Jehova minahiro mapadapit sa sato ngonyan. Kaya an satong paggawe sa organisasyon na ini nagpapaheling sa praktikal na paagi kan satong paninindogan manongod sa isyu nin pagkasoberano. (Heb. 13:17) Si Satanas nagsasahot na kita gabos pinahihiro nin pagmawot sa personal na pakinabang, na an pangenot na iniintindi niato iyo an satong sadiri. Alagad kun maogma niatong ipinipresentar an satong sadiri na maglingkod sa ano man na paagi na kinakaipuhan, mantang linilikayan an pagtaram asin paggibo nin mga bagay na mag-aapod nin sobrang atension sa sadiri, pinatutunayan niato na an Diablo putikon. Kun satong namomotan asin iginagalang an mga ‘nangengenot’ sa sato, na inaarog an saindang pagtubod alagad nagsasayuma na magin klase nin tawo na ‘nag-oomaw sa mga tawo para sa sadiri niang kapakinabangan,’ kita nakakapaogma sa puso ni Jehova. (Heb. 13:7; Jud. 16) Paagi sa pagkultibar sa marahay na paggalang sa organisasyon ni Jehova asin bilog na pusong pag-otob sa gibohon na ipinagigibo nia, kita nagtatao nin ebidensia na si Jehova talaga an satong Dios asin na kita sararo sa pagsamba sa saiya.—1 Cor. 15:58.

[Nota sa Ibaba]

Pagrerepaso

● Ano an naheheling na organisasyon ni Jehova ngonyan? Ano an katuyohan kaiyan?

● Siisay an ninombrahan na payo kan kongregasyon? Paagi sa anong naheheling na mga areglo na sia nagtatao nin mamomoton na paggiya sa sato?

● Anong marahay na mga kaisipan manongod sa paninimbagan asin mga tawo sa organisasyon an maninigo niatong kultibaron?