Kun Paano Ginigibo an Pag-organisar Asin Pangangataman sa Kongregasyon

SA INOT na surat ni apostol Pablo sa mga taga Corinto, sinambit niya an sarong importanteng katotoohan manungod sa Diyos. Isinurat niya: “An Diyos bako Diyos nin karibarawan kundi nin katuninungan.” Dangan may sinabi pa siya manungod sa mga pagtiripon kan kongregasyon: “Gibuhon nindo an gabos na bagay sa kagalang-galang asin aregladong paagi.”—1 Cor. 14:33, 40.

² Sa mismong kapinunan kan surat na iyan, nagtao an apostol nin konseho may koneksiyon sa dai pagkauruyon sa laog kan kongregasyon nin Corinto. Sinadol ni Pablo an mga tugang duman na “magtaram na may pagkauruyon” saka ‘magin lubos na sararo sa pag-iisip asin sa dalagan nin kaisipan.’ (1 Cor. 1:10, 11) Dangan nagtao siya nin konseho sa sainda manungod sa mga bagay na nakakaapektar sa pagkasararo kan kongregasyon. Paagi sa paggamit kan hawak nin tawo bilang ilustrasyon, ipinahiling niya na kaipuhan an pagkasararo asin kooperasyon. Sinadol niya an gabos sa Kristiyanong kongregasyon, ano man an katungdan ninda, na magpahiling nin pagkamuot asin pagmakulog sa kada saro. (1 Cor. 12:12-26) An pagkasararo asin kooperasyon na iyan kan mga nasa kongregasyon nagpaparisa na magigin organisado iyan.

³ Pero paano oorganisaron an Kristiyanong kongregasyon? Siisay an maorganisar kaiyan? Ano an magigin mga areglo diyan? Sairisay an maglilingkod sa nombradong mga katungdan? Kun gagamiton ta an Bibliya bilang giya, makakakua kita nin malinaw na simbag sa mga hapot na ini.—1 Cor. 4:6.

INORGANISAR SA TEOKRATIKONG PAAGI

⁴ An Kristiyanong kongregasyon inestablisar kan aldaw kan Pentecostes 33 C.E. Ano an manunudan ta manungod sa kongregasyon kan inot na siglo? An pag-organisar asin pangangataman diyan ginibo sa teokratikong paagi, an buot sabihon, nasa irarom kan pamamahala (sa Griego, kraʹtos) nin Diyos (the·osʹ). An duwang terminong ini mababasa bilang “Diyos” asin “kakusugan” sa 1 Pedro 5:10, 11. An ipinasabong na rekord kan nangyari sa Jerusalem haros 2,000 na taon na an nakaagi malinaw na nagpaparisa na an Diyos an nag-establisar kan kongregasyon nin linahidan na mga Kristiyano. (Gibo 2:1-47) Iyan an harong na itinugdok niya, an pamilya niya. (1 Cor. 3:9; Efe. 2:19) An paagi nin pag-organisar asin pangangataman na pinunan kan inot na siglo an sinusunod kan Kristiyanong kongregasyon ngunyan.

⁵ Kan magpuon an kongregasyon kan inot na siglo, mga 120 sana an disipulo. Sa sainda inot na ibinubo an banal na espiritu, bilang kautuban kan Joel 2:28, 29. (Gibo 2:16-18) Pero kan aldaw man na idto, mga 3,000 pa an nabawtismuhan sa tubig asin nagin kabilang sa kongregasyon nin mga pinaniaki sa espiritu. Inako ninda an tataramon manungod sa Cristo asin “nagpadagos sinda sa paghimati sa itinutukdo kan mga apostol.” Pagkatapos kaiyan, “padagos na idinadagdag sa sainda ni Jehova aroaldaw idtong mga tawong iliniligtas niya.”—Gibo 2:41, 42, 47.

⁶ Marikason an pagdakula kan kongregasyon sa Jerusalem mala ngani ta nagreklamo an Judiong halangkaw na saserdote na pinano na kan mga disipulo an Jerusalem kan katukduan ninda. Dakul na Judiong saserdote an nagin mga disipulo man sa Jerusalem asin napabilang sa kongregasyon.—Gibo 5:27, 28; 6:7.

⁷ Sinabi ni Jesus: “Kamo magigin mga saksi ko sa Jerusalem, sa bilog na Judea saka Samaria, asin sa pinakaharayong parte kan daga.” (Gibo 1:8) Asin nangyari nanggad ini. Kan magkaigwa nin grabeng pagpersegir sa Jerusalem pagkagadan ni Esteban, an mga disipulong nag-iistar duman nagkawararak sa bilog na Judea asin Samaria. Pero sain man sinda napaduman, padagos sindang nagpahayag kan maugmang bareta asin naggibo nin dakul pang disipulo, asin kabilang diyan an nagkapirang Samaritano. (Gibo 8:1-13) Paghaloy-haloy, naihulit man an maugmang bareta sa mga bakong turi, mga bakong Judio, sa ibang mga nasyon. (Gibo 10:1-48) Huli kaiyan, dakul an nagin disipulo asin nagkaigwa nin bagong mga kongregasyon sa luwas kan Jerusalem.—Gibo 11:19-21; 14:21-23.

⁸ Anong mga areglo an ginibo para masiyerto na an kada bagong kongregasyon magin organisado asin napapangatamanan uyon sa paagi nin Diyos—sa teokratikong paagi? Paagi sa paghiro kan espiritu nin Diyos, may ginibong areglo na magnombra nin katabang na mga pastor na mangangataman sa aripumpon. Sa mga kongregasyon na dinalaw ni Pablo asin Bernabe kan inot nindang pagbiyahe bilang misyonero, nagnombra sinda nin mga magurang na lalaki, o mga elder. (Gibo 14:23) An kagsurat kan Bibliya na si Lucas nagsaysay manungod sa pakikipag-ulay ni Pablo sa kamagurangan kan kongregasyon sa Efeso. Sinabi sa sainda ni Pablo: “Ingatan nindo an saindong sadiri asin an bilog na aripumpon, huli ta ninombrahan kamo kan banal na espiritu na magin mga paraataman ninda, tanganing pasturan an kongregasyon nin Diyos, na binakal niya kan dugo kan saiyang sadiring Aki.” (Gibo 20:17, 28) Nagin kuwalipikado sindang magin mga elder sa kongregasyon huli ta naabot ninda an mga kahagadan suno sa Kasuratan. (1 Tim. 3:1-7) An kapwa trabahador ni Pablo na si Tito inawtorisaran na magnombra nin elder sa mga kongregasyon sa Creta.—Tito 1:5.

⁹ Mantang nagdadakul an mga kongregasyon, an mga apostol asin kamagurangan sa Jerusalem nagpadagos na maglingkod bilang an panginot na mga paraataman kan nagin nang internasyonal na Kristiyanong kongregasyon kan inot na siglo. Naglingkod sinda bilang namamahalang grupo kaiyan.

¹⁰ Sa surat ni Pablo sa kongregasyon sa Efeso, ipinaliwanag niya na sa pakikikooperar sa espiritu nin Diyos, mapapagdanay kan Kristiyanong kongregasyon an pagkasararo paagi sa pagsunod sa pagkapayo ni Jesu-Cristo. Sinadol kan apostol an mga Kristiyano duman na magin mapakumbaba asin papagdanayon “an pagkasararong itinatao kan espiritu” saka matuninong na makiasosyar sa gabos na nasa kongregasyon. (Efe. 4:1-6) Dangan kinotar niya an Salmo 68:18 asin inaplikar iyan sa probisyon ni Jehova na magnombra nin mga lalaking may espirituwal na kuwalipikasyon na maglilingkod bilang mga apostol, propeta, ebanghelisador, pastor, saka paratukdo para maitao an mga pangangaipo kan kongregasyon. Bilang mga balaog ni Jehova, papakusugon ninda an bilog na kongregasyon tanganing an gabos magin maygurang sa espirituwal asin nakakapaugma sa Diyos.—Efe. 4:7-16.

SINUSUNOD KAN MGA KONGREGASYON NGUNYAN AN HALIMBAWA KAN MGA APOSTOL

¹¹ Sa ngunyan, sinusunod sa gabos na kongregasyon kan Mga Saksi ni Jehova an paagi nin pag-organisar na ginibo kan mga apostol. Nagkakasararo sinda bilang pambilog na kinaban na kongregasyon na pinapanginutan kan mga linahidan nin espiritu. (Zac. 8:23) Nagin posible ini paagi ki Jesu-Cristo. Arog kan ipinanuga niya, talagang nagdadanay siyang kaiba kan saiyang linahidan na mga disipulo “sa gabos na aldaw sagkod sa pagtatapos kan sistema nin mga bagay.” An mga tawo na nagigin kabilang sa nagdadakulang kongregasyon inaako an maugmang bareta nin Diyos, bilog na pusong idinudusay an saindang buhay ki Jehova, asin nagpapabawtismo bilang mga disipulo ni Jesus. (Mat. 28:19, 20; Mar. 1:14; Gibo 2:41) Minimidbid ninda “an marahay na pastor,” si Jesu-Cristo, bilang Payo kan bilog na aripumpon, na kompuwesto nin linahidan na mga Kristiyano asin “ibang mga karnero.” (Juan 10:14, 16; Efe. 1:22, 23) Pinapagdanay kan “sarong aripumpon” na iyan an pagkasararo ninda paagi sa maimbod na pagmidbid sa pagkapayo ni Cristo saka pagpasakop sa instrumentong ginagamit kan organisasyon, “an maimbod asin mapagmansay na uripon,” na ninombrahan ni Cristo. Lugod na padagos tang itao an lubos na kumpiyansa asin pagtitiwala sa instrumentong ini ngunyan.—Mat. 24:45.

AN PAPEL KAN LEGAL NA MGA KORPORASYON

¹² Tanganing makapagtao nin espirituwal na kakanon sa tamang panahon asin ikahulit an maugmang bareta kan Kahadian bago umabot an katapusan, may binilog na mga korporasyon. An legal na mga korporasyon na ini nakarehistro bilang pagsunod sa ley nin manlain-lain na nasyon. Nagtatarabangan an mga iyan para mas maparikas an paghuhulit kan maugmang bareta sa bilog na kinaban.

AN PAGKAORGANISAR KAN SANGAY

¹³ Basta may maestablisar na sangang opisina, nagnonombra nin Komite kan Sangay na kompuwesto nin tulo o labi pang elder na mangangataman sa gibuhon sa nasyon o mga nasyon na sakop kan partikular na sangay na iyan. An sarong miyembro kan komite naglilingkod bilang koordineytor kan Komite kan Sangay.

¹⁴ An lokal na mga kongregasyon na sakop kan kada sangay inoorganisar asin piggugrupo-grupo sa mga sirkito. Magkakalain an kadakulaan kan mga ini, depende sa lugar asin lengguwahe saka sa bilang nin mga kongregasyon na yaon sa mga lugar na sakop kan sangay. Sarong paraataman nin sirkito an ninonombrahan para maglingkod sa mga kongregasyon sa kada sirkito. An sangang opisina nagtatao sa paraataman nin sirkito nin mga giya asin instruksiyon kun paano aasikasuhon an saiyang mga paninimbagan.

¹⁵ Minimidbid kan mga kongregasyon an mga areglo kan organisasyon, na ginibo para sa kapakinabangan kan gabos. Iginagalang ninda an areglo sa pagnombra nin mga elder, na nangangataman sa gibuhon sa mga sangay, sirkito, asin kongregasyon. Nag-aasa sinda sa maimbod asin mapagmansay na uripon para sa espirituwal na kakanon sa tamang panahon. An maimbod na uripon ngunyan lubos man na nagpapasakop sa pagkapayo ni Cristo, sinusunod an mga prinsipyo sa Bibliya, asin naghihimati sa paggiya kan banal na espiritu. Mantang kita gabos nagkakasararo asin nagtitinarabangan, naeeksperyensiyahan ta an mga resulta na kapareho kan naeksperyensiyahan kan mga Kristiyano kan inot na siglo: “Padagos nanggad na napapakusog an pagtubod kan mga kongregasyon asin padagos na nagdadakul an bilang kan mga tugang aroaldaw.”—Gibo 16:5.