An Librong Pinakamahiwas an Pagkawaras sa Kinaban
“An Biblia iyo an librong pinakadakol an nagbabasa sa kasaysayan. . . . Mas dakol na kopya kan Biblia an ikinawaras kisa sa kan ano pa man na ibang libro. An Biblia trinadusir man nin mas dakol na beses, asin sa mas dakol na lenguahe, kisa sa ano pa man na ibang libro.”—“The World Book Encyclopedia.”1
SA NAGKAPIRANG bagay, an kadaklan na libro arog nin mga tawo. Sinda minalataw, tibaad magin popular, asin—apuera sa nagkapirang klasiko—nagigin daan asin nawawara. An mga libreriya parateng nagseserbing garo sementeryo nin dai mabilang na libro na laos na, dai na binabasa asin, garo man sana gadan na.
Minsan siring, an Biblia pambihira dawa sa mga klasiko. Maski iyan pinonan na isurat kaidtong 3,500 na taon na an nakaagi, iyan buhay pang marhay ngonyan. Iyan nanggad an may pinakamahiwas na sirkulasyon na libro sa ibabaw nin daga.a Kada taon, mga 60 milyones na kopya kan enterong Biblia o mga kabtang kaiyan an iwinawaras. An enot na edisyon na inimprenta gikan sa hale-haleng tipo luminuwas sa imprentahan kan imbentor na Aleman na si Johannes Gutenberg kaidtong mga 1455. Poon kaidto kinakarkulong apat na bilyon na Biblia (an bilog o kabtang sana) an naimprenta. Mayo nin ibang libro, sa relihion man o bako, na nakararani man lamang sa kabilangan na ini.
An Biblia iyo man an librong trinadusir sa pinakadakol na lenguahe sa kasaysayan. An kompletong Biblia o mga kabtang kaiyan trinadusir sa labing 2,100 na lenguahe asin dialekto.b Labing 90 porsiento kan pamilya nin tawo an makababasa kan kisuerra kabtang kan Biblia sa sadiri nindang lenguahe.2 Sa siring an librong ini nakabalyo sa linderos nin mga nasyon asin napangganahan an mga kaolangan sa rasa asin etniko.
An mga estadistika sana tibaad dai makatao nin nagpapahirong dahelan na siyasaton nindo an Biblia. Minsan siring, an mga kabilangan sa sirkulasyon asin traduksion nakagugulat, na nagpapatunay na an Biblia nagugustohan sa bilog na kinaban. Segurado na an librong pinakamabenta asin trinadusir sa pinakadakol na lenguahe sa bilog na kasaysayan nin tawo maninigo sa saindong pag-estudyar.
[Mga Nota sa Ibaba]
a An sunod na pinakamahiwas an pagkawaras na publikasyon hinohona na iyo an pula an tutob na pulyetong Quotations From the Works of Mao Tse-tung, na kinakarkulong 800 milyones na kopya kaiyan an ikinapabakal o ikinawaras.
b An mga estadistika mapadapit sa kabilangan nin mga lenguahe basado sa mga kabilangan na ipinublikar kan United Bible Societies.
[Ritrato sa pahina 6]
Biblia ni Gutenberg, sa Latin, an enot na kompletong libro na inimprenta gikan sa hale-haleng tipo