Kingdom News Num. 35

Magkakaminorootmootan Pa daw an Gabos na Tawo?

Luminipot Na an Pagkamoot sa Kataed

MINILYON an daing kasarigan an boot asin miserable, na daing mahagadan nin tabang. An sarong retiradang negosyante nagkomento: ‘Sarong banggi an sarong babaeng balo na nag-iistar sa eskalon na iniistaran ko nagtoktok sa sakong pinto asin nagsabi na sia napupungaw. Sinabi ko sa saiya nin magalang alagad diretsahan na sibot ako. Naghagad sia nin dispensasyon sa pakaistorbo nia sa sako asin naghale.’

Makamomondo, kan mismong bangging idto, an babaeng balo naghugot. Pakatapos kaidto, an babaeng negosyante nagsabi na nakanood sia nin “makolog na leksion.”

An kadaihan nin pagkamoot sa kataed parateng makaturotriste. Durante kan ralaban na etniko sa Bosnia asin Herzegovina, na dating kabtang kan Yugoslavia, labing sarong milyon an napiritan na humale sa saindang harong asin manampulong ribo an ginadan. Niisay? “Kan samuyang mga kataed,” an agrangay nin sarong aking babae na inalaw hale sa saiyang baryo. “Midbid mi sinda.”

Sa Rwanda ginatos na ribo katawo an ginadan, sa parate kan saindang mga kataed mismo. “An mga Hutu asin Tutsi kaidto iribaiba, nag-aaragoman, na daing labot o dai ngani nakakaaram kun siisay an Hutu asin kun siisay an Tutsi,” an ibinareta kan The New York Times. “Dangan may biglang nangyari,” asin “nagpoon an garadanan.”

Kaagid kaiyan, an mga Judio asin Arabe sa Israel magkakataraed, alagad an dakol nagkakainongisan. Siring man kaiyan an situwasyon nin dakol na Katoliko asin Protestante sa Irlandia, saka nin nagdadakol na komunidad sa ibang nasyon. Nungka kaidto sa kasaysayan na an kinaban nagkulang na marhay sa pagkamoot.

Taano ta Luminipot an Pagkamoot sa Kataed?

Itinatao kan satong Kaglalang an simbag. An saiyang Tataramon, an Biblia, inaapod an panahon na nabubuhayan niato na an “huring mga aldaw.” Ini sarong peryodo na durante kaiyan, sabi kan hula sa Biblia, an mga tawo “dai nin natural na kapadangatan.” Mapadapit sa “delikadong mga panahon [na ini] na masakit pakibagayan,” na inaapod man sa Kasuratan na “pagtatapos kan palakaw nin mga bagay,” ihinula ni Jesu-Cristo na “an pagkamoot nin dakol malipot.”—2 Timoteo 3:1-5; Mateo 24:3, 12.

Kun siring, an kadaihan nin pagkamoot ngonyan kabtang kan ebidensia na kita nabubuhay na sa huring mga aldaw kan kinaban na ini. Nakaoogma, iyan nangangahulogan man na an kinaban na ini nin maraot na mga tawo madali nang salidahan nin sarong matanos na bagong kinaban na pagkamoot an nangingibabaw.—Mateo 24:3-14; 2 Pedro 2:5; 3:7, 13.

Alagad talaga daw na may dahelan kitang maniwala na posible an siring na pagliliwat—na an gabos na tawo puedeng makanood na magkaminorootmootan asin matoninong na mamuhay na iriba?

Pagkamoot sa Kataed—Tunay na Nangyayari

“Siisay man nanggad an sakuyang kataed?” an hapot ki Jesus nin sarong abogado kan enot na siglo. Daing duwa-duwa na linalaoman niang sasabihon ni Jesus, ‘An mga kapwa mo Judio.’ Alagad sa sarong estorya manongod sa Samaritano na tataong makipagkapwa-tawo, ipinaheling ni Jesus na an mga tawong iba an nasyonalidad kataed man niato.—Lucas 10:29-37; Juan 4:7-9.

Idinoon ni Jesus na kasunod kan pagkamoot sa Dios, an pagkamoot sa kataed maninigo na gumiya sa satong buhay. (Mateo 22:34-40) Alagad igwa daw nin arin man na grupo nin mga tawo na tunay na namotan an saindang mga kataed? An enot na mga Kristiano iyo! Midbid sinda sa pagkamoot ninda sa iba.—Juan 13:34, 35.

Kumusta man ngonyan? Ginigibo daw nin siisay man an arog-Cristong pagkamoot? An Encyclopedia Canadiana nagkokomento: “An gibohon kan Mga Saksi ni Jehova pagkabuhay giraray asin pag-establisar liwat kan kagurangguranging Kristianismo na ginibo ni Jesus asin kan saiyang mga disipulo. . . . An gabos magturugang.”

Ano an boot sabihon kaiyan? Nangangahulogan iyan na an Mga Saksi ni Jehova dai tinotogotan an ano man—minsan an rasa, nasyonalidad, o etnikong pinaghalean—na magpangyari sa sainda na ikaongis an saindang mga kataed. Ni gagadanon ninda an siisay man, huli ta sa piguratibong paagi dinadaragopdop ninda an saindang mga espada na magin tarom nin arado asin an saindang mga budyak na magin mga sanggot. (Isaias 2:4) Sa katunayan, an mga Saksi midbid sa pagsadiring boot na tumabang sa saindang mga kataed.—Galacia 6:10.

Bakong makangangalas na an sarong editoryal sa Sacramento Union sa California nagsabi: “Igo nang sabihon na kun an bilog na kinaban mamumuhay sono sa kredo kan Mga Saksi ni Jehova matatapos na an pagpabolos nin dugo asin pagkaongis, asin maghahade an pagkamoot.” An sarong parasurat sa magasin na Ring sa Hungaria nagkomento: “Nakaabot ako sa konklusyon na kun Mga Saksi ni Jehova na sana an nag-eerok digdi sa daga, mawawara an mga guerra, asin an trabaho na sana kan mga pulis kontrolon an trapik asin magtao nin mga pasaporte.”

Pero totoo na magkakaipo nin sarong dakula, pambilog na kinaban na pagliliwat tanganing magkaminorootmootan an gabos na tawo. Paano mangyayari an siring na pagliliwat? (Helingon tabi an likod na pahina.)

Kun an Gabos na Tawo Magkakaminorootmootan na

An sarong pamibi na itinokdo ni Jesu-Cristo nagpapaheling na harani na an sarong dramatikong pagliliwat. Sa saiyang bantog na Sermon sa Bukid, tinokdoan kita ni Jesus na mamibi: “Dumatong logod an kahadean mo. Gibohon an boot mo digdi sa daga nin siring sa langit.”—Mateo 6:10, King James Version.

Ano an Kahadean nin Dios? Iyan sarong tunay na gobyerno, saro na namamahala hale sa langit. Iyan an dahelan na iyan inaapod na “an kahadean kan kalangitan.” Si Jesus, an “Prinsipe nin Katoninongan,” ninombrahan kan saiyang Ama na iyong mamahala dian.—Mateo 10:7; Isaias 9:6, 7; Salmo 72:1-8.

Pagdatong kan Kahadean nin Dios, ano an mangyayari sa kinaban na ini na pano nin pagkaongis? ‘Roronoton asin tataposon’ kan “kahadean” an gabos na maraot na gobyerno kan kinaban na ini. (Daniel 2:44) An Biblia nagpapaliwanag: “An kinaban maagi sana . . . , alagad an naggigibo kan kabotan nin Dios magdadanay sagkod lamang.”—1 Juan 2:17.

Mapadapit sa bagong kinaban nin Dios, an Biblia nagsasabi: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:9-11, 29; Talinhaga 2:21, 22) Magigin kanigoan kamamuraway na panahon iyan! “An kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:4) Maski an mga gadan mabubuhay na liwat, asin an enterong daga gigibohon na sarong literal na paraiso.—Isaias 11:6-9; 35:1, 2; Lucas 23:43; Gibo 24:15.

Tanganing mabuhay sa bagong kinaban nin Dios, kaipuhan kitang magkaminorootmootan, siring sa itinotokdo nin Dios na gibohon niato. (1 Tesalonica 4:9) An sarong estudyante sa Biblia na taga-Oriente nagsabi: “Tinatanaw ko an panahon na, siring sa panuga kan Biblia, an gabos na tawo nakanood nang magkaminorootmootan.” Asin makaseseguro kita na ootobon nin Dios an saiyang mga panuga! “Itinaram ko iyan,” sabi nia, “gigibohon ko man iyan.”—Isaias 46:11.

Alagad tanganing kamtan an mga bendisyon sakop kan Kahadean nin Dios, kaipuhan kamong kumua nin kaaraman sa Biblia, siring sa ginigibo kan minilyon na tawong sadiosan an puso sa bilog na kinaban. (Juan 17:3) Tatabangan kamo kan 32-pahinas na brosyur na Ano an Kahagadan sa Sato nin Dios? Kumua nin kopya paagi sa pagllenar sa kupon na yaon sa sinundan na pahina asin pagpadara kaiyan sa adres na pinakaharani sa saindo.

□ Gusto kong makaresibi kan brosyur na Ano an Kahagadan sa Sato nin Dios?

□ Tabi makipag-olay kamo sa sako mapadapit sa sarong daing bayad na pag-adal sa Biblia sa harong.

[Picture Credit Line sa pahina 2]

Nakatagong parabadil asin lobong sa Bosnia: Reuters/Corbis-Bettmann