“Magkakaminorootmootan Pa daw an Gabos na Tawo?”
1 Sarong magayon, nakapupukaw sa boot, asin nakaoogmang mensahe an ibabalangibog sa bilog na kinaban sa 169 lenguahe. Ano an mensaheng ini? Asin paano iyan ipapaabot?
2 An mensahe dapit sa pagkamoot sa kataed. Iyan makukua sa Kingdom News Num. 35, na may titulong “Magkakaminorootmootan Pa daw an Gabos na Tawo?” An Kingdom News na ini sinisiyasat sa halipot an presenteng kamugtakan nin mga bagay-bagay sa bilog na kinaban, na ipinaheheling na an kawaran nin pagkamoot sa tahaw nin mga tawo an pinakacausa nin grabeng kamondoan asin kakologan. Ipinaliliwanag kaiyan kun taano ta, partikularmente sa satong kaaldawan, luminipot an pagkamoot sa kataed asin kun ano an kahulogan kaini para sa ngapit.
3 Kadungan kaiyan, ipinaheheling kan Kingdom News Num. 35 na an tunay na pagkamoot sa kataed nag-eeksister sa tahaw kan minilyon na nabubuhay sa kinaban ngonyan. Ipinamimidbid kaiyan an mga nakikikabtang sa ibinalik na pagsamba kan enot na siglo, na mamimidbid paagi sa pagkamoot sa kataed na itinokdo ni Jesu-Cristo.—Luc. 10:25-37.
4 An Kingdom News Num. 35 nagtatapos paagi sa paliwanag sa kun paano an bilog na kinaban nin katawohan magibo sa dai na mahahaloy nin pagkamoot sa kataed sa irarom kan administrasyon kan Kahadean nin Dios paagi ki Cristo. An mga nagbabasa kan mensaheng ini ineenkaminar na kumua kan brosyur na Ano an Kahagadan sa Sato nin Dios? asin pag-adalan kun paano magigin kabtang kaining mamomoton na areglo sa bilog na kinaban na detalyadong ilinaladawan sa Tataramon nin Dios.
5 Siisay an Magdadara kan Mensaheng Ini? An Mga Saksi ni Jehova sa bilog na kinaban ihihiras an mensaheng ini nin pagkamoot sa kataed sa saindang mga kamidbid, kataed, asin paryente ngonyan na mga bulan nin Oktubre asin Nobyembre. An gabos na kualipikado ineenkaminar na makikabtang sa pagdistribwir sa publiko kan Kingdom News Num. 35.
6 An pinakapasohan kan kampanyang ini iyo na animaron an interes nin mga tawo sa pagkaigwa nin pag-adal sa Biblia magsalang sa brosyur na Kahagadan o sa librong Kaaraman. Dugang pa, an bilog na pusong paghihingoa kan kada saro sa mga lingkod ni Jehova magbubunga nin dakulaon na patotoo sa Dios nin pagkamoot, si Jehova, asin sa saiyang Aki, si Jesu-Cristo.