Ano an Nangyayari Pag an Saro Nagadan?

An kagadanan iyo an kabaliktaran nin buhay. An kagadanan garo nanok na pagturog. (Juan 11:​11-14) An mga gadan dai nakakadangog, nakakahiling, nakakataram, o nakakaisip nin ano man. (Eclesiastes 9:​5, 10) An bakong tunay na relihiyon nagtutukdo na an mga gadan nagduduman sa kinaban nin mga espiritu tangani na mamuhay kaiba kan saindang mga apuon. Bako iyan an itinutukdo kan Bibliya.

An mga nagadan daing ikakatabang sa sato, saka dai ninda kita magigibuhan nin maraot. Kaugalian nin mga tawo na gumibo nin mga ritwal asin pag-atang na sa paniniwala ninda makakapaugma sa mga nagadan. Ini ikinakaanggot nin Diyos ta iyan basado sa saro sa mga kaputikan ni Satanas. Dai man iyan makakapaugma sa nagadan, ta sinda daing buhay. Dai ta dapat katakutan o sambahon an mga gadan. An Diyos sana an dapat tang sambahon.​—Mateo 4:10.

An mga gadan mabubuhay giraray. An mga gadan pupukawon ni Jehova sa pagkabuhay sa sarong paraisong daga. Mangyayari iyan sa maabot pang panahon. (Juan 5:​28, 29; Gibo 24:15) May kakayahan an Diyos na pukawon an mga nagadan kun paanong kaya mo nanggad na pukawon an sarong tawong nagtuturog.​—Marcos 5:​22, 23, 41, 42.

An ideya na kita dai nagagadan kaputikan na pinalakop ni Satanas na Diyablo. An mga tawo pinapaniwala ni Satanas asin kan saiyang mga demonyo na an espiritu kan mga gadan buhay asin kayang magtao nin hilang asin iba pang mga problema. Dinadaya ni Satanas an mga tawo, kun beses paagi sa mga pangaturugan asin bisyon. Marauton para ki Jehova an ginibo kan mga nagpupurbar na kaulayon an mga gadan.​—Deuteronomio 18:​10-12.