Ikaogmang Marhay an Tataramon nin Dios
MAOGMA an tawo na an “pagkaogmang marhay yaon sa ley ni Jehova.” Binabasa nin siring na tawo an Tataramon nin Dios “sa maluya sanang tingog aldaw asin banggi.” (Sal. 1:1, 2) Naeeksperyensiahan daw nindo an pagkaogmang marhay na iyan? Paano nindo madudugangan an kagayagayahan na itinatao sa saindo kan Tataramon nin Dios?
Maghinanyog Mantang Nagtataram si Jehova
Dai sana basahon an mga tataramon. Iladawan sa isip an mga situwasyon na binabasa nindo. Imahinaron an boses kan mga kinokotar. Mantang binabasa nindo an enot na mga kapitulo kan Biblia, dangoga an paghayag mismo ni Jehova, nin tangga-tangga, kan ginigibo tanganing an daga gibohon na angay sa tawo. Hinanyoga mantang sinasabi nia sa saiyang Aki, an Pangenot na Trabahador, na nag-abot na an oras na lalangon an enot na mga tawo. Iladawan an eksena: Nagrebelde si Adan asin Eva, hinokoman sinda nin Dios asin, pagkatapos, pinalayas nia sinda sa Paraiso. (Genesis, kap. 1-3) Matea an may pagkangirhat na paggalang kun binabasa nindo na ipinamimidbid nin sarong tingog hale sa langit si Jesu-Cristo bilang an Aki nin Dios, an namomotan na marhay, an isinugo nin Dios na itao an saiyang buhay para sa katawohan. (Mat. 3:16, 17) Probaran na imahinaron an reaksion ni apostol Juan kan madangog niang sinabi ni Jehova: “Uya! ginigibo kong bago an gabos na bagay.” (Kap. 21:5) Totoo nanggad, an pagbasa kan Tataramon nin Dios sa paaging ini nakaoogmang marhay na eksperyensia!
Padagos na basahon an ipinasabong na rekord, asin mamimidbid nindo si Jehova bilang sarong personang mamuraway asin nakapupukaw nin may pagkangirhat na paggalang. Makakamate kamo nin makosog na atraksion sa Sarong ini na namomoot sa sato, tinatratar kitang may pagkaherak, tinatabangan kita kun padagos kitang may kapakumbabaan na naghihingoa na otobon an saiyang kabotan, asin tinotokdoan kita kun paano kita magigin mapanggana sa gabos niatong ginigibo.—Jos. 1:8; Sal. 8:1; Isa. 41:10.
Mientras na mas dakol an oras na ginagamit nindo sa pagbasa kan Biblia, mas orog man an magigin pagkakontento nindo mantang nagtatalubo an kaaraman nindo sa kabotan nin Dios para sa saindo. Alagad malabi pa dian nin igo an pagkaogmang marhay. Kun an pagbasa nindo nagtatao sa saindo kan tabang na kaipuhan nindo tanganing madonong na maatubang an mga problema, an magigin saboot nindo kapareho kan salmista na nagsabi: “An saimong mga pagirumdom makangangalas. Kaya ngani iyan inotob kan sakuyang kalag.” (Sal. 119:129) Maggagayagaya man kamo mantang namamansayan nindo sa Kasuratan an mga prinsipyo na nakatatabang na moldehon an saindong kaisipan asin an saindong mga mawot sa diosnon na paagi.—Isa. 55:8, 9.
An Biblia nagtatao nin moral na giya na nagpoprotehir sa sato sa kapahamakan asin nagtotokdo sa sato kan tamang dalan. Mantang binabasa niato iyan, naririsa niato na si Jehova sarong Ama na nakaaaram kan ibubungang mga problema kun kita napadadara sa bakong sangkap na mga horot nin laman. Habo nia na kita magdusa kan teribleng mga epekto na dai malilikayan na ibubunga nin pagmenos sa saiyang haralangkaw na pamantayan sa moral. Sia may pagmakolog sa sato asin gusto nia na kamtan niato an pinakamarahay na pamumuhay. An pagbasa niato kan saiyang Tataramon nakatatabang sa sato na mas lubos na maapresyar kun gurano kadakulang bendisyon na sia an satong Dios asin langitnon na Ama.
Basahon an Biblia Aroaldaw
An salmista nagsabi manongod sa tawo na nagbabasa kan Tataramon nin Dios aroaldaw: “An gabos niang ginigibo mapapakarhay.” (Sal. 1:3) Iyo, sa ibong kan satong mga pagkabakong sangkap, sa ibong kan pamumuhay niato sa maraot na sistema nin mga bagay ni Satanas, asin sa ibong kan mga paghihingoa kan Diablo na sibaon kita, an regular na pagbasa asin pag-aplikar kan nasa Tataramon nin Dios magpapangyari sa sato na mapakarhay sa gabos na may labot sa satong relasyon ki Jehova.
Mantang kita ginigipit kan daan na sistemang ini, an paglaog sa isip kan mga kaisipan kan Kaglalang dawa sa laog nin pipira sanang mahalagang marhay na segundo kada aldaw makatatao sa sato nin kosog. An nagkapira na nabilanggo huli sa saindang pagtubod daing ibang nababasa kundi an suruwaysuway na bersikulo na nanompongan nindang kinotar sa mga artikulo sa diaryo. An mga ini ginunting ninda, tinuom ninda, asin hinorophorop ninda. Binendisyonan ni Jehova an saindang mga paghihingoa ta ginibo ninda an itinotogot kan saindang mga kamugtakan sa paglaog sa isip kan kaaraman hale sa Tataramon nin Dios. (Mat. 5:3) Pero, an kadaklan sa sato mas dakulang marhay dian an katalingkasan. Dai niato maninigong isipon na an madalian na pagbasa nin sarong bersikulo sa Biblia sarong beses kada aldaw magkakaigwa nin milagrosong epekto. Minsan siring, mapapasatuya an mga bendisyon kun liliwaton niato an satong mga ipinaoorog tangani na mabasa an sarong kabtang kan Biblia kada aldaw, isip-isipon iyan, asin iaplikar iyan sa satong buhay.
Sa katotoohan, puedeng maraot an pinakamarahay niatong mga plano. Kun iyan nangyayari, ipinaoorog niato an mga bagay na talagang mahalaga. Halimbawa, dai niato tutuyohon na dai uminom nin tubig sa laog nin saro o duwang aldaw. Kun siring, ano man an mangyari sa satong buhay sa aroaldaw, maninigo na idusay niato an kadikit na oras na magpapresko sa tubig nin katotoohan.—Gibo 17:11.
Basahon an Bilog na Tataramon nin Dios
Personal na daw nindong nabasa an enterong Biblia? An nagkapira nagabatan na isip-isipon an pagbasa poon Genesis sagkod Kapahayagan. Huli kaini, an dakol na gustong basahon an enterong Biblia nagpoon sa pagbasa nguna kan Kristianong Griegong Kasuratan. Taano? Tibaad huli ta mas madali nindang masabotan kun paano an mga librong iyan kan Biblia aplikado sa sainda bilang indibiduwal na naghihingoang makasunod sa mga gira ni Cristo. O tibaad huli ta garo baga bakong gayong halawig na basahon an Kristianong Griegong Kasuratan—labi sana nin kadikit sa un-kuarto kan Biblia. Alagad pakabasaha ninda kan 27 librong iyan, itinao ninda an saindang atension sa 39 libro kan Hebreong Kasuratan asin pinonan na basahon saka ikaogma iyan. Kan matapos ninda an Hebreong Kasuratan, nakaestablisar na sinda nin ugaleng regular na pagbasa kan Biblia, kaya nagpadagos sinda, na binabasa an Kristianong Griegong Kasuratan sa ikaduwang beses, asin dai na sinda noarin man nagpondo. Logod na gibohon man nindong parasiempreng ugale an aroaldaw na pagbasa kan Tataramon nin Dios.
May saro daw sa saindong pamilya o kongregasyon na dai nakababasa? Taano ta dai iopresir na basahan an tawong iyan kan Biblia nin regular? Makikinabang kamo, asin makikinabang man sia mantang hinohorophorop nia an saiyang nadadangog dangan iinaaplikar iyan sa saiyang buhay.—Kap. 1:3.
Pag-abot nin panahon, tibaad gusto nindong gumibo nin espesyal na mga proyekto may koneksion sa saindong pagbasa kan Biblia. An nagkapira digdi makadadagdag sa saindong apresasyon sa relasyon kan manlaenlaen na kabtang kan Biblia. Kun an saindong Biblia may mga reperensia sa pagirilid, tibaad itokdo kaini sa saindo an makasaysayan na mga detalye asin kaagid na mga salaysay. Tibaad makatabang iyan sa saindo na mamansayan an mga kamugtakan kaya isinurat an manlaenlaen na salmo saka an mga surat kan mga apostol ni Jesu-Cristo. An Insight on the Scriptures nagtatao nin abundang suplay nin impormasyon sa likod nin mga tawo, lugar, asin kualidad na sinasabi sa Biblia. An mga tsart nag-aapod nin atension sa kaotoban nin mga hula sa Biblia, ipinaheheling kun siisay na mga hade asin propeta an magkakatemporanyo, asin nagtatao nin haros eksaktong petsa kan dakol na pangyayari sa Biblia.
Mantang hinohorophorop nindo an saindong nanonodan, masasabotan nindo an mga dahelan kun taano ta nangyari an nagkapirang kamugtakan sa tahaw kan banwaan nin Dios. Maaaraman man nindo kun taano ta siring an nagin pagtratar ni Jehova sa saiyang banwaan. Maheheling nindo kun paano hinuhusgaran ni Jehova an gawe-gawe nin mga gobyerno, banwaan, asin indibiduwal. Ini matao sa saindo nin orog na pakarorop sa saiyang kaisipan.
An kasaysayan sa Biblia magigin mas interesante sa saindo kun ilinaladawan nindo sa isip an rehion na pinangyarihan kaiyan. An mga mapa kan kadagaan sa Biblia naghahayag kan topograpiya saka mga distansia sa pag-oltanan nin mga lugar. Halimbawa, poko mas o menos saen duminakit an mga Israelita sa Dagat na Pula? Gurano kahiwas an Dagang Panuga? Gurano karayo kan binaklay ni Jesus sa pag-otob nia kan saiyang ministeryo digdi sa daga? Anong magagayon na lugar an naheling ni Pablo sa saiyang mga pagbiahe sa pagmimisyonero? An mga mapa asin geograpikong mga deskripsion nagtatao nin mga detalye na matao nin buhay sa saindong pagbasa. Saen kamo makakakua nin mga mapa kan kadagaan sa Biblia? An nagkapira yaon sa New World Translation of the Holy Scriptures. An mga tomo kan Insight may mga 70 mapa, asin may indise nin mapa sa poro kan enot na tomo. Gamiton an Watch Tower Publications Index sa paghanap nin ibang mapa. Kun mayo an mga reperensiang ini, gamiton an mga mapa na ipinupublikar sa An Torrengbantayan tangani na makatabang sa saindo sa saindong pagbasa kan Biblia.
Sa Hebreong Kasuratan, irinukyaw ni Hadeng David si Jehova, na sinasabi: “Kanigoan kamahalagang marhay kan saimong mga kaisipan! O Dios, gurano kadakol kan bilog na kabilangan kaiyan!” (Sal. 139:17) Sa Kristianong Griegong Kasuratan, si Jehova inomaw ni apostol Pablo huli ta Sia “suminirang sa satong puso tanganing iyan magliwanag sa mamuraway na kaaraman dapit sa Dios paagi sa lalauogon ni Cristo.” (2 Cor. 4:6) Dakol na siglo an pag-oltanan ni David asin Pablo; pero, pareho sinda naogmang marhay sa Tataramon nin Dios. Iyo man kamo kun kamo matao nin oras na basahon an gabos na itinao sa saindo ni Jehova sa mga pahina kan saiyang ipinasabong na Tataramon.