Pagkinabang sa Aroaldaw na Pagbasa sa Biblia

“Maogma an tawo na . . . an . . . kaogmahan yaon sa ley ni Jehova, asin sa saiyang ley sia maingat na nagbabasa aldaw asin banggi.”​—SALMO 1:​1, 2.

1. (a) Anong maheheling tolos na karatula an yaon sa sarong kampi nin sarong edipisyo nin pabrika sa pankinaban na opisina prinsipal kan Watch Tower Society? (b) Paano kita makikinabang kun personal niatong isasapuso an sadol?

“BASAHON AN TATARAMON NIN DIOS NA BANAL NA BIBLIA AROALDAW.” Sa darakulang letra, an mga tataramon na iyan maheheling sa sarong kampi nin sarong edipisyo sa Brooklyn, Nueva York, na pinag-iimprentahan nin mga Biblia asin mga babasahon sa Biblia kan Watchtower Bible and Tract Society. An sadol na iyan bako sanang para sa mga tawo sa kinaban na nakakaheling kan karatula. Narerealisar kan mga Saksi ni Jehova na kaipuhan man nindang isapuso iyan. An mga regular na nagbabasa kan Biblia asin personal na iinaaplikar iyan nakikinabang sa pagtotokdo, sa pagsagwe, sa pagtatanos, asin sa disiplina sa katanosan na itinatao kaiyan.​—2 Timoteo 3:​16, 17.

2. Paano idinoon ni Tugang na Russell an halaga kan pagbasa sa Biblia?

² Pinahahalagahan na marhay kan mga Saksi ni Jehova an saindang mga pantabang sa pag-adal sa Biblia, kabale An Torrengbantayan, asin regular nindang ginagamit iyan. Alagad aram ninda na mayo sa mga ini na makasasalida sa Biblia mismo. Kaidtong 1909, si Charles Taze Russell, an enot na presidente kan Watch Tower Bible and Tract Society, nagsurat sa mga parabasa kan magasin na Watch Tower: “Nungka nindong paglingawan na an Biblia iyo an satong Modelo asin minsan pa itinao nin Dios an satong mga pantabang iyan ‘mga pantabang’ asin bakong mga pansalida sa Biblia.”

3. (a) Ano an epekto kan “tataramon nin Dios” sa mga nagbabasa kaiyan? (b) Gurano kaparate na binabasa asin pinag-aadalan kan mga taga-Berea an Kasuratan?

³ An ipinasabong na Kasuratan igwa nin rarom asin puwersa na mayo sa ibang libro. “An tataramon nin Dios buhay asin mapuwersa asin mas matarom kisa arin man na minasbad na may duwang tarom asin nakalalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakamimidbid kan mga kaisipan asin pagmawot kan puso.” (Hebreo 4:12) An disipulong si Lucas maogmang tinawan nin komendasyon an mga taga-Berea, na inapod sindang “orog karahay an kamawotan.” Bako sana na may pagkagalaga nindang inako an tataramon sono sa pagkahulit ni apostol Pablo asin kan kaibaiba niang si Silas kundi ‘maingat man na siniyasat an Kasuratan aroaldaw’ tanganing madeterminaran an Makakasuratan na basihan kan itinotokdo.​—Gibo 17:11.

Pagbasa Kaiyan Aroaldaw

4. Ano an ipinaririsa kan Kasuratan manongod sa kun gurano kaparate na maninigo niatong basahon an Biblia?

⁴ An Biblia dai espisipikong nagsasabi kun gurano kaparate na iyan maninigo tang basahon. Minsan siring, isinurat dian an hatol ni Jehova ki Josue na ‘maingat na basahon an libro kan katogonan sa aldaw asin sa banggi’ tanganing humiro sia na may kadonongan asin magkaigwa nin kapangganahan sa paggibo kan saiyang asignasyon na itinao nin Dios. (Josue 1:8) Sinasabi kaiyan sa sato na an siisay man na maghade sa suanoy na Israel kaipuhan na magbasa kan Kasuratan sa “gabos na aldaw kan saiyang buhay.” (Deuteronomio 17:19) Iyan nagsasabi pa: “Maogma an tawo na dai naglakaw sa hatol kan mga maraot . . . Kundi an saiyang kaogmahan yaon sa ley ni Jehova, asin sa saiyang ley sia maingat na nagbabasa aldaw asin banggi.” (Salmo 1:​1, 2) Siring man, an Ebanghelyo na isinurat ni Mateo nagsasabi sa sato na kan sayumahan ni Jesu-Cristo an mga paghihingoa ni Satanas na sugotan Sia, nagkotar Sia sa ipinasabong na Hebreong Kasuratan, na nagsasabi: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’” (Mateo 4:4) Gurano kaparate na kita nangangaipo nin pisikal na pagkakan? Kada aldaw! An pagkakan nin espirituwal na kakanon aroaldaw orog pa nganing mahalaga huli ta apektado kaiyan an satong mga paglaom para sa buhay na daing sagkod.​—Deuteronomio 8:3; Juan 17:3.

5. Paano an aroaldaw na pagbasa sa Biblia makatatabang sato na “maglakaw na angay ki Jehova” kun ginigipit kita kan mga pagbalo sa pagtubod?

⁵ An kada saro sa sato nangangaipong parigonon aroaldaw kan Tataramon nin Dios. Kada aldaw​—sa harong, sa trabaho, sa eskuwelahan, sa mga tinampo, kun namamakal, sa satong ministeryo—​ginigipit kita kan mga angat sa satong pagtubod. Paano niato aatubangon an mga ini? Tolos-tolos daw na magigirumdoman an mga pagboot asin prinsipyo sa Biblia? Imbes na dagkahon an pakamate nin pagsarig sa sadiri, an Biblia nagpapatanid: “Mag-ingat an siisay man na naghohona na nagtitindog na dai sia mapukan.” (1 Corinto 10:12) An aroaldaw na pagbasa sa Biblia matabang sa sato na “maglakaw na angay ki Jehova sa katuyohan na lubos na makapaogma sa saiya” imbes na togotan an kinaban na moldehon kita.​—Colosas 1:​9, 10; Roma 12:2.

An Pangangaipo na Paorootrong Basahon an Biblia

6. Taano ta kapakipakinabang na paorootrong basahon an Biblia?

⁶ An pagbasa kan Biblia laen na marhay sa pagbasa nin sarong libro nin nobela. An kadaklan na popular na nobela sinadya para sa sararoan na pagbasa; oras na maaraman kan saro an estorya asin kun paano iyan natapos, sagkod na sana iyan dian. Sa kabaliktaran, dawa pirang beses ta nang nabasa an Biblia, dakula an satong pakinabang sa pag-otro kaiyan. (Talinhaga 9:9) Sa may pagmansay na tawo, an Kasuratan danay na nagkakaigwa nin bagong kahulogan. An mga hula mapadapit sa huring mga aldaw nagigin orog na kahangahanga para sa saiya sa liwanag kan saiyang naheling, nadangog, asin personal na naeksperyensiahan sa nakaagi pa sanang mga bulan. (Daniel 12:4) Mantang pinahihiwas nia an saiyang sadiring eksperyensia sa buhay asin nakakapanggana sia sa mga problema, mas lubos na nasasabotan kan may pagmansay na parabasa sa Biblia an hatol na kaidto tibaad dai nia isinasaboot an pagbasa. (Talinhaga 4:18) Kun sia maghelang nin grabe, an mga panuga kan Biblia dapit sa paghale nin kolog asin pagrahay nin salud orog na minararom an kahulogan sa saiya kisa kaidto. Kun may magadan na dayupot na mga katood asin mga miembro nin pamilya, an panugang pagkabuhay liwat orog na nagigin mahalaga.

7. Ano an matabang sa sato kun pinoponan ta an bagong paninimbagan sa buhay, asin taano?

⁷ Puwedeng personal na nindong nabasa an Biblia asin iinaaplikar na nindo an mga hatol kaiyan sa laog nin dakol na taon. Pero posible na pinoponan nindo ngonyan an bagong mga paninimbagan sa buhay. Nagpaplano na daw kamong mag-agom? Kamo daw magigin nang sarong magurang? Pinaniwalaan daw kamo nin paninimbagan sa kongregasyon bilang sarong magurang o ministeryal na lingkod? Kamo daw saro nang pambilog na panahon na paraebanghelyo, na nadagdagan nin mga oportunidad sa paghuhulit asin pagtotokdo? Kapakipakinabang nanggad na basahon giraray an bilog na Biblia na nasa isip an bagong mga paninimbagan na iyan!​—Efeso 5:​24, 25; 6:4; 2 Timoteo 4:​1, 2.

8. Paano puwedeng ipaheling kan naliwat na mga kamugtakan an pangangaipo na orog pang pag-adalan an mga bagay na sa paghona ta aram ta na?

⁸ Kan nakaagi tibaad marahay an saindong ginibo sa pagpaheling kan mga bunga kan espiritu. (Galacia 5:​22, 23) Pero tibaad huli sa naliwat na mga kamugtakan kamo napapaatubang sa pangangaipo na makanood nin dakol pa dapit sa diosnon na mga kuwalidad na iyan. (Ikomparar an Hebreo 5:8.) An sarong dating nagbibiyaheng paraataman na nakamate na kaipuhan na bayaan nia an saiyang espesyal na paglilingkod tanganing atamanon an saiyang nagkakaedad nang mga magurang nagsabi: “Naghohona ako kaidto na marahay nang gayo ako sa pagpaheling kan mga bunga kan espiritu. Ngonyan namamatean ko na garo ako nagpopoon na naman.” Kaagid kaiyan, puwedeng manompongan nin mga agom na lalaki asin babae na an agom makuri an pisikal asin emosyonal na kamatean na sa pagtao nin personal na pag-asikaso, an tension sa panapanahon nagigin dahelan nin mga reaksion na nakakapanluya sa sainda. An regular na pagbasa sa Biblia sarong gikanan nin dakulang karangahan asin tabang.

Kun Noarin Puwedeng Gibohon an Pagbasa sa Biblia

9. (a) Ano an makatatabang sa sibot-sibot na tawo na makanompong nin panahon para sa aroaldaw na pagbasa sa Biblia? (b) Taano an pagbasa kan Tataramon nin Dios ta espesyalmenteng mahalaga para sa kamagurangan?

⁹ Siyempre, para sa mga tawo na dati nang sibot-sibot, sarong angat an paghanap nin panahon na gibohon nin regular an dagdag pang bagay. Minsan siring, puwede kitang makinabang sa halimbawa ni Jehova. Ihinahayag kan Biblia na ginigibo nia an mga bagay sa ‘itinalaan na mga panahon.’ (Genesis 21:2; Exodo 9:5; Lucas 21:24; Galacia 4:4) An pag-apresyar sa halaga kan regular na pagbasa kan Tataramon nin Dios makatatabang sato na magtalaan nin panahon para dian sa satong pan-aroaldaw na iskedyul. (Efeso 5:​15-17) An kamagurangan sa partikular kaipuhan na magtagama nin panahon para sa regular na pagbasa sa Biblia tangani na an hatol na saindang itinatao magigin klarong basado sa mga prinsipyo sa Biblia asin tangani na an espiritu na saindang ipinaheheling magpapabanaag kan “kadonongan hale sa itaas.”​—Santiago 3:17; Tito 1:9.

10. Anong oras nakakapagbasa an mga aroaldaw na parabasa kan Biblia?

¹⁰ An dakol na nagigin mapanggana an programa nin personal na pagbasa sa Biblia ginigibo an saindang pagbasa kun amay na aga bago ninda ponan an mga aktibidad sa aldaw. Nanonompongan kan iba na mas marahay nindang nagigibo iyan nin regular sa ibang oras. An mga audiocassette sa Biblia (kun igwa) nakakatabang sa mga nagbibiyahe na pakinabangan an oras sa pagbiyahe, asin an ibang Saksi naghihinanyog dian mantang nag-aasikaso kan ordinaryong mga trabaho sa harong. An mga programa na nagin mapanggana para sa manlaenlaen na Saksi sa Europa, Aprika, Amerika del Norte, Amerika del Sur, asin sa Oriente ipinaheheling sa pahina 20 asin 21, sa artikulong “Kun Noarin Ninda Iyan Binabasa Asin Kun Paano Sinda Nakikinabang.”

11. Paano magigibo an aroaldaw na pagbasa sa Biblia dawa medyo limitado an oras?

¹¹ An pinakaimportante bakong an kadakolan nin oras na idinudusay sa saindong pagbasa sa Biblia sa arin man na sarong okasyon kundi an pagigin regular sa paggibo kaiyan. Puwedeng manompongan nindong kapakipakinabang na magbasa nin dirediretso sa laog nin sarong oras o labi pa, na naggigibo nin dugang na pagsiyasat asin lubos na nag-aatento sa materyal. Alagad itinotogot daw iyan nin regular kan saindong iskedyul? Imbes na togotan na umagi an mga aldaw na dai lamang nagbasa sa Biblia, bako daw na mas marahay na magbasa sa laog nin 15 minutos o maski 5 minutos kada aldaw? Magin determinado kamo na gumibo nin aroaldaw na pagbasa sa Biblia. Dangan dugangan an pagbasang iyan nin mas hararom na pagsiyasat kun posible.

Laen-laen na Paagi sa Pagbasa kan Biblia

12. Ano an programa sa pagbasa sa Biblia kan bagong mga miembro kan pamilyang Bethel asin kan mga estudyante sa Gilead?

¹² Dakol an paagi na puwedeng basahon an Biblia. Kapakipakinabang na basahon iyan poon sa Genesis sagkod sa Kapahayagan. Hinahagad sa gabos na miembro kan pamilyang Bethel sa bilog na globo na naglilingkod sa pankinaban na opisina prinsipal o sa saro kan mga sanga kan Sosyedad na basahon an bilog na Biblia durante kan enot na taon kan saindang paglilingkod sa Bethel. (Parateng kalabot dian an pagbasa nin tolo sagkod limang kapitulo, depende sa lawig kaiyan, o apat sagkod limang pahina, kada aldaw.) An mga estudyante sa Paadalan sa Biblia kan Watchtower sa Gilead dapat man na basahon an bilog na Biblia bago sinda maggraduwar. Linalaoman na tatabangan sinda kaini na gibohon na kabtang kan saindang buhay an pagbasa sa Biblia aroaldaw.

13. Anong pasohan an irinirekomendar sa bagong mabautismohan na mga Saksi?

¹³ Kapakipakinabang para sa mga bagong mabautismohan na Saksi na gibohon nindang pasohan na basahon an bilog na Biblia. Kan 1975, sa panahon na nag-aandam sia para sa bautismo, an sarong soltero sa Pransia hinapot nin sarong magurang sa kongregasyon kun baga igwa sia nin depinidong programa para sa pagbasa sa Biblia. Poon kaidto nababasa nia an bilog na Biblia kada taon, na parateng ginigibo an saiyang pagbasa sa aga bago sia magtrabaho. Kun manongod sa ibinunga, sinabi nia: “Orog kong namidbid si Jehova. Nasasabotan ko kun paanong an gabos na saiyang ginigibo konektado sa saiyang katuyohan asin kun ano an saiyang reaksion kun may minalataw na mga kaolangan. Nasasabotan ko na si Jehova, kadungan kaiyan, matanos asin marahay sa gabos niang gibo.”

14. (a) Tanganing makapoon nin programa sa personal na pagbasa sa Biblia na magpapadagos, ano an kinakaipuhan? (b) Ano an puwedeng makatabang sa sato na magirumdoman an pankagabsan na sumaryo kan kada libro sa Biblia mantang binabasa niato iyan?

¹⁴ Nabasa na daw nindo an bilog na Biblia? Kun dai pa, ngonyan na an marahay na panahon na pumoon. Gumibo nin sarong depinidong programa, dangan magdanay dian. Determinaran kun pirang pahina o kun pirang kapitulo an babasahon nindo kada aldaw, o determinaran sana kun gurano kadakol na oras an gagamiton nindo asin kun noarin. Bakong gabos makakatapos na basahon an Biblia sa sarong taon, alagad an mahalaga iyo na regular na basahon an Tataramon nin Dios, na ginigibo iyan aroaldaw kun posible man sana. Mantang binabasa nindo an Biblia, puwedeng manompongan nindong nakakatabang an paggamit nin nagkapirang reperensia sa pagtadom sa saindong isip kan pankagabsan na sumaryo kan materyal. Kun may Insight on the Scriptures sa saindong tataramon, bago nindo ponan an pagbasa nin sarong partikular na libro sa Biblia, repasohon an halipot na sumaryo kan tampok na mga kabtang kaiyan na itinao sa Insight.a Partikularmenteng mangnohon an mga tema na nasa mas maitom na letra. O gamiton man an mas detalyadong sumaryo na itinao sa librong “All Scripture Is Inspired of God and Beneficial.”b

15. (a) Anong mga suhestion na itinao sa pahina 16 asin 17 an makatatabang na mapaoswag an saindong pagbasa sa Biblia? (b) Imbes na gibohon na rituwal an pagbasa nin nagkapirang pahina, sa anong mahalagang bagay kita maninigong magtao nin orog na atension?

¹⁵ Kapakipakinabang an sunod-sunod na pagbasa sa Biblia, alagad dai magin rituwal na parabasa sana. Dai magbasa nin nagkapirang pahina kada aldaw tangani sanang makasabi kamo na natatapos nindong basahon an Biblia kada taon. Arog kan ipinaheheling sa kahon na “Mga Suhestion Tanganing Mapaoswag an Saindong Pagbasa sa Biblia” (pahina 16 asin 17), dakol an paagi na puwede nindong basahon asin ikaogma an Biblia. Ano man na paagi an ginagamit nindo, seguradohon na pinapakakan nindo kapwa an saindong isip asin an saindong puso.

Saboton an Saindong Binabasa

16. Taano ta mahalaga na magkaigwa nin panahon na maghorophorop sa satong binabasa?

¹⁶ Kan nagtotokdo sa saiyang mga disipulo, idinoon ni Jesus an halaga kan pagsabot ninda sa saiyang sinasabi. An mahalaga, bakong pakasabot sana sa isip, kundi an saindang ‘pakasabot kaiyan sa saindang puso’ tanganing iaplikar ninda iyan sa saindang buhay. (Mateo 13:​14, 15, 19, 23) An mahalaga sa Dios iyo an kun ano an tawo sa laog, asin ini an irinirepresentar kan puso. (1 Samuel 16:7; Talinhaga 4:23) Kaya, apuwera sa pagsierto na nasasabotan ta an sinasabi kan mga teksto sa Biblia, kaipuhan kitang maghorophorop dian, na iniisip an mga implikasyon kaiyan sa sato mismong buhay.​—Salmo 48:9; 1 Timoteo 4:15.

17. Sa anong nagkapirang punto-de-vista puwede kitang maghorophorop sa satong binabasa sa Kasuratan?

¹⁷ Pagmaigotan na mamidbid an pundamental na mga prinsipyo sa mga tala sa Biblia tanganing ikaaplikar nindo ini sa mga situwasyon na inaatubang nindo. (Ikomparar an Mateo 9:13; 19:​3-6.) Mantang kamo nagbabasa asin naghohorophorop sa makangangalas na mga kuwalidad ni Jehova, gamiton an oportunidad na iyan na parigonon an saindong personal na relasyon sa saiya, na pataluboon sa boot nindo an makosog na pakamate nin diosnon na debosyon. Kun nagbabasa kamo nin mga pahayag dapit sa katuyohan ni Jehova, horophoropon kun ano an saindong magigibo kaoyon kaini. Kun nakakabasa kamo nin direktang hatol, imbes na sabihon sana sa saindong sadiri, ‘Aram ko na iyan,’ ihapot, ‘Ginigibo ko daw an sinasabi kaiyan?’ Kun iyo, ihapot sa sadiri, ‘Sa anong mga paagi ko iyan magigibo “nin lubos pa?”’ (1 Tesalonica 4:1) Mantang nanonodan nindo an mga kahagadan nin Dios, mangnohon man an buhay na mga halimbawa sa Biblia kan mga namuhay kaoyon sa mga kahagadan na ini asin kan mga dai. Horophoropon kun taano ta sinunod ninda an dalan na ginibo ninda asin kun ano an ibinunga. (Roma 15:4; 1 Corinto 10:11) Kun binabasa nindo an manongod sa buhay ni Jesu-Cristo, girumdomon na si Jesus iyo an saro na pinaniwalaan ni Jehova kan paghade sa bilog na daga; gamiton an oportunidad na parigonon sa boot nindo an paghimuyawot para sa bagong kinaban nin Dios. Siring man, mag-isip nin mga paagi na lubos pa nindong maaarog an Aki nin Dios.​—1 Pedro 2:21.

18. Paano an pagbasa sa Biblia matitimbangan niato kan satong paggamit nin materyal sa pag-adal na itinatao paagi sa “maimbod asin madonong na oripon”?

¹⁸ Siyempre, an pagbasa sa Biblia dai maninigong sumalida sa paggamit nindo kan ekselenteng materyal sa pag-adal na itinatao paagi sa “maimbod asin madonong na oripon.” Iyan kabtang man kan probisyon ni Jehova​—saro na mahalagang marhay. (Mateo 24:​45-47) Seguradohon na an regular na pagbasa kan mismong Tataramon nin Dios igwa nin pangenot na lugar sa saindong buhay. Kun mapupuwede nanggad, “BASAHON AN TATARAMON NIN DIOS NA BANAL NA BIBLIA AROALDAW.”

[Mga Nota sa Ibaba]

Ano an Saindong Simbag?

◻ Taano ta kapakipakinabang na magbasa sa Biblia kada aldaw?

◻ Taano ta kaipuhan niato na paorootrong basahon an Biblia?

◻ Sa saindo mismong iskedyul, ano an marahay na oras para sa aroaldaw na pagbasa sa Biblia?

◻ Mantang paorootro kamong nagbabasa kan Biblia, ano an makatatabang tanganing magin laen-laen an paagi kan saindong programa?

◻ Taano ta mahalagang marhay na maghorophorop sa satong binabasa?

[Kahon sa pahina 16, 17]

Mga suhestion tanganing mapaoswag an saindong pagbasa sa Biblia

(1) An dakol na tawo binabasa an mga libro sa Biblia sono sa pagkasunodsunod kan kinatodan nang pagkaimprenta kaiyan, poon sa Genesis sagkod sa Kapahayagan. Puwede man nindong basahon iyan sono sa pagkasunodsunod kan orihinal na pagkasurat kaiyan. Girumdomon na an Biblia sarong koleksion nin 66 na ipinasabong na libro, sarong banal na libreriya. Tanganing magkaigwa nin pagkalaenlaen, puwedeng booton nindo na basahon an nagkapirang libro na nagtatampok nin kasaysayan, dangan an iba na an kadaklan na laog mga hula, kasunod an iba na mga surat nin paghatol, imbes na sunodon sana an pagkasunodsunod kan mga pahina. Tandaan an saindong nabasa, asin seguradohon na basahon an bilog na Biblia.

(2) Pakabasa nindo nin sarong kabtang kan Kasuratan, hapoton an saindong sadiri kun ano an ihinahayag kaiyan manongod ki Jehova, sa saiyang katuyohan, sa saiyang mga paagi; kun paano iyan maninigong makaapektar sa saindo mismong buhay; kun paano nindo iyan puwedeng gamiton sa pagtabang sa iba.

(3) Ginagamit bilang giya an tsart na “Main Events of Jesus’ Earthly Life” na ipinublikar sa irarom kan temang “Jesus Christ” sa Insight on the Scriptures (siring man sa “All Scripture Is Inspired of God and Beneficial”), basahon an magkakaparehong tala kan kada kabtang sa mga Ebanghelyo, sunod-sunod. Dugangan ini paagi sa pagheling sa katimbang na mga kabtang sa librong The Greatest Man Who Ever Lived.

(4) Kun binabasa nindo sa Mga Gibo kan mga Apostol an tala dapit sa buhay asin ministeryo ni Pablo, basahon man an konektadong ipinasabong na mga surat. Kaya, kun nasasambitan an dapit sa manlaenlaen na siudad o lugar na pinaghulitan ni Pablo, umontok asin basahon an mga surat na kan huri ipinadara nia sa mga kapwa Kristiano sa mga lugar na iyan. Nakatatabang man na sundan an saiyang mga pagbiyahe sa mapa, arog kan yaon sa likod kan New World Translation.

(5) Kadungan kan saindong pagbasa sa Exodo sagkod sa Deuteronomio, basahon an surat sa mga Hebreo tanganing makua an paliwanag dapit sa dakol na makahulang arogan. Sa temang “Law” sa Insight on the Scriptures, helingon an tsart na “Some Features of the Law Covenant.”

(6) Kun nagbabasa nin mga libro manongod sa mga hula, tawan nin panahon an pagrepaso sa konektadong kasaysayan sa likod kaiyan na yaon sa Biblia. Halimbawa, kun binabasa an librong Isaias, repasohon kun ano an sinasabi sa iba pang kabtang manongod ki hadeng Uzias, Jotam, Acaz, asin Ezequias, na nasambitan sa Isaias 1:1. (2 Hade, kapitulo 15-20; 2 Cronica, kapitulo 26-32) O kun binabasa an Haggeo asin Zacarias, tawan nin panahon an pagrepaso kan yaon sa libro nin Esdras.

(7) Pumili nin sarong libro sa Biblia, basahon an sarong kabtang kaiyan (puwedeng sarong kapitulo), dangan gumibo nin pagsiyasat, na ginagamit an Watch Tower Publications Index o an nasa komputer na Watchtower Library kun igwa sa saindong tataramon. Iaplikar an materyal sa saindo mismong buhay. Gamiton iyan sa mga pahayag asin sa ministeryo sa langtad. Dangan basahon an saro na naman na kabtang.

(8) Kun igwa nin publikasyon kan Watch Tower na nagpapaliwanag kan sarong libro sa Biblia o sarong kabtang kaiyan, parateng helingon iyan mantang binabasa nindo an kabtang na iyan kan Biblia. (Halimbawa: sa Awit ni Salomon, an The Watchtower na Disyembre 1, 1957, pahina 720-34; sa Ezequiel, an “The Nations Shall Know That I Am Jehovah”​—How?; sa Daniel, an “Your Will Be Done on Earth” o an Our Incoming World Government​—God’s Kingdom; sa Haggeo asin Zacarias, an Paradise Restored to Mankind​—By Theocracy!; sa Kapahayagan, an Revelation​—Its Grand Climax At Hand!)

(9) Mantang kamo nagbabasa, helingon an nagkapirang reperensia sa ibang kabtang kan Biblia. Mangnohon an 320 teksto sa Hebreong Kasuratan na direktang kinotar sa Kristianong Griegong Kasuratan asin an ginatos na iba pang teksto na nasasambitan, saka an itinaong pag-aplikar. An mga reperensia sa ibang kabtang kaiyan nagtotokdo sa mga kaotoban kan hula na narerekord sa Biblia, sa mga detalye dapit sa biograpiya asin geograpiya, asin sa kaagid na mga ideya na puwedeng maglinaw sa mga kapahayagan na tibaad nadedepisilan kamong saboton.

(10) Ginagamit an Reference Edition kan New World Translation, kun igwa sa saindong tataramon, helingon an mga nota sa ibaba asin mga artikulo sa apendise na konektado sa saindong binabasa. Ipinaheheling kaini an basihan kan ginamit na mga traduksion asin iba pang paagi na puwedeng tradusiron an mahalagang mga ekspresyon. Puwedeng boot man nindong pagkompararon an pagkatradusir kan nagkapirang bersikulo sa ibang traduksion nin Biblia.

(11) Pakabasa nindo kan kada kapitulo, isurat an halipoton na sumaryo kan pangenot na ideya sa kapitulong iyan. Gamiton iyan bilang basihan sa pagrepaso asin paghorophorop sa ngapit.

(12) Mantang binabasa nindo an Biblia, markahan an piniling mga teksto na nangorognang boot nindong girumdomon, o kopyahon iyan sa mga kard asin ibugtak ini sa lugar na maheheling nindo iyan kada aldaw. Tuomon iyan; maghorophorop dian; gamiton iyan. Dai nindo pagprobaran na magtuom tolos nin kadakol, tibaad saro o duwa sana kada semana; dangan pumili nin dagdag pa sa sunod na pagbasa nindo kan Biblia.

[Mga retrato sa pahina 15]

Kamo daw nagbabasa kan Biblia o naghihinanyog sa rekording kaiyan kada aldaw?