An Biblia—Sarong Libro na Maninigong Basahon
PASIL na maubosan nin superlatibong mga paglaladawan kun an saro nagtataram manongod sa Biblia. Iyan pa man giraray an librong pinakamahiwas an sirkulasyon sa bilog na kasaysayan. An Biblia iyo an pinakagurang, pinakadakol an traduksion, pinakakinokotar, pinakamaimpluwensia, asin pinakaiginagalang na libro. Posibleng iyan man an pinakakontrobersial. Asin siertong iyan an libro na nakaligtas sa pinakadakol na pangangalad, pagsolo, asin maringis na paglamag. Pero, makamomondo nanggad, igwa nin sarong superlatibong paglaladawan na dai na puwedeng ikaaplikar sa Biblia. Posible na bako na iyan an libro sa kinaban na pinakadakol an nagbabasa.
Mantang an mga tawo tibaad igwa nin Biblia sa saindang harong, dakol an nakakamate na sibot-sibot sindang marhay na gumamit nin panahon sa aktuwal na pagbasa kaiyan. An pagbasa popular na apisyon kaidto. Pero, ngonyan, an kadaklan mas gusto na gamiton an saindang ekstrang panahon sa pagheling nin telebisyon o paggibo nin ibang bagay. An mga nagbabasa pa parateng gusto an madali asin pasil. An pagbasa sa Biblia nagkakaipo nin konsentrasyon, asin an kadaklan na tawo dai na nagkokonsentrar na gayo sa saindang binabasa.
Alagad an Biblia dai nagdanay tangani sanang pabayaan sa satong lalagan nin mga libro. Igwa nin mararahay na dahelan kun taano ta maninigong basahon iyan. Konsiderara an nagkapirang katunayan dapit dian.
Bakong Makangangalas na Nagtagal Iyan!
An termino sa Ingles na “Bible” gikan sa terminong Griego na bi·bliʹa, na nangangahulogan “saradit na libro.” Ipinagigirumdom kaini sa sato na an Biblia binibilog nin nagkapirang libro—an iba bakong gayong saradit! Isinurat an mga iyan sa laog nin desisais na gatos na taon. Minsan ngani an parasurat mga lalaki, pinasabngan sinda nin mas halangkaw na Gikanan. An sarong parasurat sa Biblia nagsabi: “An hula nagdatong bakong sa kabotan nin tawo, kundi an mga tawo nagtaram hale sa Dios huling sinda pinahiro kan banal na espiritu.” (2 Pedro 1:21) An totoo sa Makakasuratan na hula totoo man sa iba pa sa Biblia. Ining ipinasabong nin Dios na “saradit na libro” pano-pano kan haralangkaw na kaisipan ni Jehova Dios. (Isaias 55:9) Bakong makangangalas na an Biblia nagtagal sa haloyon na panahon!
Para sa mga lingkod nin Dios, an Biblia an pinakamahalagang libro poon pa kaidto. Minaoyon sinda ki apostol Pablo, mismong saro sa mga parasurat kan Biblia. Nagsabi sia: “An gabos na Kasuratan ipinasabong nin Dios asin kapakipakinabang para sa pagtokdo.” (2 Timoteo 3:16) Kaya, an Biblia an basihan kan pagtubod kan mga Saksi ni Jehova ngonyan. Dinideterminaran kaiyan an mga doktrina ninda asin ginigiyahan an saindang paggawe. Bilog na puso nindang irinirekomendar na an gabos basahon an sarong kabtang kan Tataramon nin Dios kada aldaw asin horophoropon na may pag-apresyar an mga laog kaiyan.—Salmo 1:1-3.
An Ugale na Pagbasa sa Biblia
An ugale na pagbasa sa Kasuratan nagin kapakipakinabang sa nakaaging mga panahon. An mga hade sa Israel pinagbotan na gumibo nin sadiri nindang isinurat sa kamot na kopya kan Pagboot—na ngonyan importanteng kabtang kan Biblia—asin basahon iyan sa aroaldaw bilang danay na pagirumdom manongod sa kabotan nin Dios para sa sainda. (Deuteronomio 17:18-20) An dai paggibo kaini nagcausa kan pagbagsak kan dakol na hade.
An halaga kan pag-adal sa Kasuratan iiniilustrar sa kamugtakan kan gurang na propetang si Daniel. Huli sa saiyang personal na pag-adal kan mga kabtang kan Biblia na nag-eksister sa saiyang kaaldawan, si Daniel, mantang desterrado sa Babilonya, “nakasabot paagi sa mga libro” na an sarong importanteng hula na isinurat ni Jeremias maootob na.—Daniel 9:2.
Sa panahon kan pagkamundag ni Jesus, an ‘matanos asin debotadong’ si Simeon may pagsarig na naglaom na maheling an saro na magigin an Cristo, o an Mesiyas. Pinanugaan si Simeon na dai sia magagadan kun dai pa nia maheling an Cristo. An pagsambit nia sa hula ni Isaias kan kinakarga an omboy na si Jesus nagpapaheling na si Simeon sarong atentibong parabasa kan mga libro kan Biblia na nakasurat na kan saiyang kaaldawan.—Lucas 2:25-32; Isaias 42:6.
Kan naghuhulit si Juan na Bautisador, “an mga tawo naghahalat” kan Mesiyas. Ano an ipinaheheling kaini? Isinusuherir kaiyan na an dakol sa mga Judio pamilyar sa Mesiyanikong mga hula na nasusurat sa Kasuratan. (Lucas 3:15) Interesante ini, huli ta kan mga aldaw na idto an mga libro bakong madaling makua. An mga kopya kan libro sa Biblia kinaipuhan na maingat na isurat, asin kun siring an mga iyan mahalon man asin depisil makua. Paano an mga tawo nagin pamilyar sa mga laog kaiyan?
Sa dakol na kamugtakan, paagi sa pagbasa sa publiko. Halimbawa, ipinagboot ni Moises na sa espisipikong mga panahon, maninigong basahon an bilog na Pagboot na itinao nin Dios sa nagkatiripon na mga Israelita. (Deuteronomio 31:10-13) Pag-abot kan enot na siglo C.E., an pagbasa sa publiko kan mga libro sa Biblia lakop nang gayo. Nagkomento an disipulong si Santiago: “Poon kan suanoy na mga panahon si Moises nagkaigwa nin mga naghulit manongod sa saiya sa surunodsunod na siudad, huli ta binabasa sia nin makosog sa mga sinagoga kada sabbath.”—Gibo 15:21.
Ngonyan, pasil na magkaigwa nin personal na kopya kan Biblia. Minsan paano an pira sa ‘saradit na librong’ ini makukua sa mga lenguahe kan 98 porsiento kan populasyon sa kinaban. Kaya makamomondo na dakol an bakong interesado sa pag-aram sa kun ano an sinasabi kan Biblia sa sainda. Ini puwedeng sarong sientipikong panahon, pero an Tataramon nin Dios, an Biblia, nangongorog pa man giraray na “kapakipakinabang para sa pagtokdo.” Nagtatao iyan nin marahay na sadol manongod sa moral, mga relasyon nin tawo, asin dakol pang ibang tema. Saro pa, an Biblia nagtatao kan solamente siertong paglaom para sa sarong matoninong na ngapit.
Basahon Iyan nin Regular
Kun siring, an mga Saksi ni Jehova ginibong prominenteng kabtang kan saindang gibohon na dagkahon an regular na pagbasa sa Biblia. Nasa darakulang letra sa edipisyo kan pabrika sa saindang pankinaban na opisina prinsipal sa Brooklyn, Nueva York, minalataw an sadol: “BASAHON AN TATARAMON NIN DIOS NA BANAL NA BIBLIA AROALDAW.” Minilyon na nag-aaragi an naheling na an mga tataramon na ini, asin linalaoman na dakol an naghimate kaiyan.
Sa labing 73,000 na kongregasyon kan mga Saksi ni Jehova sa bilog na kinaban, an mga sesyon kan Teokratikong Paadalan sa Pagmiministro ginigibo kada semana. An sarong kabtang kan kurso iyo an pagbasa sa publiko nin sarong piniling kabtang kan Biblia. An gabos na nag-aatender igwa man nin asignasyon na basahon serosemana an pirang kapitulo kan Biblia sa saindang pribadong mga harong. An mga nakasusubaybay sa iskedyul na ini sa katapustapusi nababasa an bilog na Biblia.
An areglong ini kaoyon kan saro sa mga librong inaadalan na ginagamit sa paadalan na ini. An Theocratic Ministry School Guidebook nagsasabi: “An saindong personal na iskedyul maninigong kabale an panahon para sa pagbasa sa Biblia mismo. Igwa nin dakulang halaga sa pagbasa kaiyan poon sa kapinonan sagkod sa katapusan. . . . Alagad an saindong pasohan sa pagbasa dai maninigong tangani sanang matapos an materyal, kundi na kuanon an punto-de-vista kaiyan sa kabilogan na may intension na magirumdoman. Tawan nin panahon na horophoropon an sinasabi kaiyan.”
An ibang publikasyon na prinodusir kan mga Saksi ni Jehova nagpapakosog man sa pagbasa sa Biblia. Halimbawa, sa kapadis kan magasin na ini, an Awake!, naglataw an minasunod na pagpapakosog para sa mga hobenes: “Natapos na daw nindong basahon . . . an Biblia? Iyo, an Biblia sarong dakulang libro, pero taano ta dai pagbarangabangaon sa saradit na kabtang an pagbasa kaiyan? . . . An ‘orog karahay an kamawotan’ na mga taga-Berea ‘maingat na siniyasat an Kasuratan aroaldaw.’ (Gibo 17:11) Kun susundan nindo an aroaldaw na iskedyul nin pagbasa na 15 minutos sana kada aldaw . . . , matatapos nindo an pagbasa sa Biblia sa laog nin sarong taon.” Iyo, an mga Saksi ni Jehova nakakamate na an modernong aldaw na mga Kristiano maninigong magin pamilyar na gayo sa Kasuratan, siring kan mga lingkod nin Dios kan suanoy na mga panahon.
Nasa isip ini, an mga Saksi nakapalakop nin ika-20 siglong bersion nin pagbasa kan Biblia sa publiko. Sa nagkapirang lenguahe, guminibo sinda nin mga cassette recording nin pagbasa na kinokobrehan an bilog na Biblia. Para sa dakol napatunayan ining marahay na tabang sa pakapanggana sa mga kaolangan sa pagbasa sa Biblia. May mga nagdadangog sa mga recording na ini mantang nagtatrabaho sa harong, nagmamaneho kan saindang sasakyan, o naggigibo nin pira pang ibang bagay. An pagtukaw asin matoninong na paghinanyog sa pagbasa kan sarong kabtang kan Biblia mantang nagsusubaybay sa saindong sadiring kopya sarong maogmahon na eksperyensia.
Kun dai pa kamo nagbabasa sa Biblia aroaldaw, taano ta dai nindo ugaleon na gibohon iyan? Ini dai kinakaipuhan na halawig kada aldaw, pero dakula an magigin mga pakinabang, huli ta an pag-aplikar kan Kasuratan papangyayarihon kamo na humiro nin madonong asin magkamit nin kapakipakinabang sa espirituwal na buhay. Mahiro man kamo kaoyon kan pagboot na ini na itinao haloy na sa Israelitang poon na si Josue: “An librong ini kan katogonan dai dapat sumuhay sa saimong ngoso, asin maingat na basahon mo iyan sa aldaw asin sa banggi, tanganing ika makapag-ingat na gumibo oyon sa gabos na nasusurat dian; huli ta paagi kaiyan magigin kang mapanggana asin mahiro ka na may kadonongan.”—Josue 1:8.
An mga pahina kan Biblia naghahayag kan mamomoton na katuyohan ni Jehova para sa makinuyog na katawohan. An tamang kaaraman manongod sa saiyang ipinasabong na Tataramon nagbubunga nin tunay na kaogmahan asin kan paglaom na buhay na daing sagkod sa Paraiso sa sarong magayon na bagong kinaban nin daing katapusan na mga bendisyon. (Lucas 23:43; 2 Pedro 3:13) Aprobetsaran logod nindo an saindong oportunidad na basahon asin pag-adalan an Biblia asin pag-aaboton an magayon na buhay na ini.