Mapararahay Nindo an Saindong Memorya

LINALANG ni Jehova Dios an hotok nin tawo na may makangangalas na abilidad na makagirumdom. Dinisenyo nia iyan na magin burabod na magagamit na dai nawawara an mahahalagang marhay na bagay na ibinugtak dian. An disenyo kan hotok kabagay kan katuyohan nin Dios na an mga tawo mabuhay sagkod lamang.—Sal. 139:14; Juan 17:3.

Alagad tibaad naniniwala kamo na an kadakol na ilinalaog nindo sa saindong isip nawawara. Garo baga iyan mayo na sa oras na iyan kaipuhan nindo. Ano daw an magigibo nindo tanganing maparahay an saindong memorya?

Magkainteres

An interes mahalagang bagay sa pagparahay sa memorya. Kun uugaleon niato na magin mapagmasid, magin interesado sa mga tawo asin sa nangyayari sa palibot niato, napupukaw an satong isip. Dangan magigin mas pasil para sa sato na magkaigwa nin kaagid na interes kun kita may nababasa o nadadangog na nagdadanay an halaga.

Bakong pambihira na an saro madepisilan na magirumdoman an ngaran nin mga tawo. Pero, bilang mga Kristiano, aram niato na importante an mga tawo—an mga kapwa Kristiano, an mga napatototoohan niato, asin an mga nakakaolay niato mantang inaasikaso niato an kaipuhan na mga bagay sa buhay. Ano daw an makatatabang sa sato na magirumdoman an mga ngaran na talagang maninigo niatong magirumdoman? Ilinista ni apostol Pablo an ngaran nin 26 sa sarong kongregasyon na sinuratan nia. Ipinaririsa an interes nia sa sainda kan bagay na bako sanang aram nia an saindang ngaran kundi sinambit nia an espesipikong mga detalye may labot sa dakol sa sainda. (Roma 16:3-16) An nagkapirang nagbibiaheng paraataman kan Mga Saksi ni Jehova sa presenteng aldaw matibay sa paggirumdom sa mga ngaran, dawa sinda pabarobalyo nin kongregasyon kada semana. Ano an nakatatabang sa sainda? Tibaad ugaleon ninda na gamiton nin nagkapirang beses an ngaran nin sarong tawo sa enot nindang pag-oolay. Hinihingoa nindang iasosyar an ngaran kan tawo sa saiyang lalauogon. Saro pa, nakikiibaiba sinda sa manlaenlaen na indibiduwal sa ministeryo sa langtad asin kun iribang nagkakakan. Kun kamo may nakakamidbid, magigirumdoman daw nindo an ngaran kan tawong iyan? Ponan sa pagkaigwa nin marahay na dahelan na magirumdoman an ngaran; dangan probaran an nagkapira sa mga suhestion na nasambitan sa enotan.

Importante man an paggirumdom sa binabasa nindo. Ano daw an makatatabang sa saindo na umoswag sa bagay na ini? Pareho may kabtang an interes sagkod pagsabot. Kaipuhan na igo an interes nindo sa saindong binabasa tangani na ikasentro nindo dian an bilog nindong atension. Dai nindo matatandaan an impormasyon kun an saindong isip harayo mantang naghihingoa kamong magbasa. Mas marahay an pagsabot kun ikinokonektar nindo an impormasyon sa mga bagay na pamilyar sa saindo o sa dati na nindong aram. Ihapot sa sadiri: ‘Paano asin noarin ko daw ikaaaplikar an impormasyon na ini sa sakong buhay? Paano ko daw iyan magagamit sa pagtabang sa iba?’ Mas marahay man an pagsabot kun an babasahon nindo mga frase imbes na indibiduwal na mga termino. Mas madali nindong makukua an mga ideya asin mamimidbid an mayor na mga punto, kaya an mga iyan mas pasil na magirumdoman.

Magtao nin Oras sa Pagrepaso

An mga eksperto sa linya nin edukasyon idinodoon an halaga nin pagrepaso. Sa sarong pag-analisar, pinatunayan nin sarong propesor sa kolehio na sa sarong minutong pagrepaso tolos-tolos nadodoble an natatandaan na impormasyon. Kaya pagkatapos tolos kan saindong binabasa—o kan dakulang kabtang kaiyan⁠—repasohon sa isip an mayor na mga ideya tangani na ikatanom ini sa saindong isip. Isipon kun paano nindo ipaliliwanag sa sadiri nindong tataramon an ano man na bagong punto na nanodan nindo. Paagi sa pagrepresko kan saindong memorya pagkabasa tolos nindo nin sarong ideya, mapalalawig nindo an panahon na matatandaan nindo an punto.

Dangan sa sunod na pirang aldaw, humanap nin oportunidad na marepaso an nabasa nindo paagi sa paghiras kan impormasyon sa iba. Magigibo nindo iyan sa sarong miembro nin pamilya, kakongregasyon, katrabaho, kaeskuela, kataed, o nanompongan nindo sa ministeryo sa langtad. Probaran na otrohon bako sanang an mayor na mga detalye kundi pati an pangangatanosan sa Kasuratan na ginamit dian. An paggibo kaini magtatao nin pakinabang sa saindo, na nakatatabang na ikatanom sa saindong memorya an importanteng mga bagay; iyan magtatao man nin pakinabang sa iba.

Horophoropon an Importanteng mga Bagay

Apuera sa pagrepaso kan saindong nabasa asin pagsabi kaiyan sa iba, maririsa nindo na kapakipakinabang an paghorophorop sa importanteng mga bagay na nanodan nindo. Ginibo iyan kan mga kagsurat kan Biblia na si Asaf asin David. Sabi ni Asaf: “Gigirumdomon ko an mga gibo ni Jah; ta gigirumdomon ko an makangangalas na ginibo mong aksion kan suanoy. Asin hohorophoropon ko nanggad an gabos mong aktibidad, asin tatawan ko nin atension an saimong mga ginibo.” (Sal. 77:11, 12) Isinurat man ni David: “Durante kan mga pagbantay sa banggi hinohorophorop taka,” asin “ginigirumdom ko an mga aldaw kaidtong suanoy; hinohorophorop ko an gabos mong aktibidad.” (Sal. 63:6; 143:5) Ano ginigibo nindo iyan?

An siring na hararom, konsentradong pag-isip na saindong pinepensar an mga ginibo ni Jehova, an saiyang mga kualidad, asin an mga kapahayagan kan saiyang kabotan bako sanang nakatatabang sa saindo na tandaan an mga detalye. Kun uugaleon nindo an siring na pag-isip, itutudok kaiyan sa saindong puso an mga bagay na talagang mahalagang marhay. Momoldehon kaiyan an saindong panlaog na personalidad. An ibubungang mga memorya magigin an saindong kairairaroming mga kaisipan.—Sal. 119:16.

An Papel kan Espiritu nin Dios

Kun hinihingoang girumdomon an mga katotoohan may labot sa mga aktibidad ni Jehova asin sa mga itinaram ni Jesu-Cristo, dai kita pinababayaan na nagsosolo. Kan banggi bago sia magadan, sinabihan ni Jesus an saiyang mga parasunod: “Mantang nagdadanay pa akong kaiba nindo isinabi ko an mga bagay na ini sa saindo. Alagad an paratabang, an banal na espiritu, na isusugo kan Ama sa ngaran ko, an sarong iyan matokdo sa saindo kan gabos na bagay asin mapagirumdom sa saindo kan gabos na bagay na isinabi ko sa saindo.” (Juan 14:25, 26) Kabilang sa mga yaon si Mateo asin Juan. Nagin daw paratabang sa sainda an banal na espiritu? Iyo nanggad! Pakalihis nin mga walong taon, natapos ni Mateo an pagsurat kan enot na detalyadong kasaysayan kan buhay ni Cristo, kaiba an daing kaagid sa halaga na mga memorya kan Sermon sa Bukid asin kan detalyadong tanda kan presensia ni Cristo saka kan pagtatapos kan sistema nin mga bagay. Sisenta y singkong taon pagkagadan ni Jesus, isinurat ni apostol Juan an saiyang Ebanghelyo, kaiba an mga detalye kan sinabi ni Jesus kan ultimong banggi na nakaibaiba kan mga apostol an Kagurangnan bago nia isinakripisyo an saiyang buhay. Daing duda, si Mateo asin Juan pareho may buhay na marhay na mga memorya kan mga sinabi saka ginibo ni Jesus kan sinda kaiba nia, alagad dakula an nagin papel kan banal na espiritu sa pagsierto na mayo sindang nalingawan na importanteng mga detalye na gusto ni Jehova na ibugtak sa saiyang nasusurat na Tataramon.

Nagigin paratabang daw an banal na espiritu sa mga lingkod nin Dios ngonyan? Iyo nanggad! Siempre, dai ilinalaog kan banal na espiritu sa satong isip an mga bagay na dai niato noarin man nanodan, alagad iyan talagang nagigin paratabang na ipagirumdom sa satong isip an importanteng mga bagay na napag-adalan niato kaidto. (Luc. 11:13; 1 Juan 5:14) Dangan, kun kaipuhan, an satong kakayahan sa pag-isip pinupukaw na ‘magirumdoman an mga kasabihan na itinaram kaidto kan banal na mga propeta asin an togon kan Kagurangnan asin Paraligtas.’—2 Ped. 3:1, 2.

‘Dai Ka Dapat Malingaw’

Paorootrong pinatanidan ni Jehova an Israel: ‘Dai ka dapat malingaw.’ Dai man boot sabihon na inaasahan nia na magirumdoman ninda an gabos sa sangkap na paagi. Alagad dai sinda dapat na mawiling marhay sa personal na mga okupasyon na ipagilid na sana ninda an saindang paggirumdom sa mga ginibo ni Jehova. Dapat na papagdanayon nindang buhay an saindang memorya kan pagliligtas sa sainda ni Jehova kan gadanon kan saiyang anghel an gabos na panganay nin Egipto saka kan bangaon ni Jehova an Dagat na Pula dangan tinikop iyan, na linamos si Faraon asin an saiyang hukbo. Dapat na girumdomon kan mga Israelita na itinao sa sainda nin Dios an saiyang Ley sa Bukid nin Sinai asin na giniyahan nia sinda sa kaawagan asin palaog sa Dagang Panuga. Dai sinda dapat na malingaw sa sentido na an mga memorya kan mga bagay na ini dapat na padagos na magkaigwa nin hararom na epekto sa saindang pan-aroaldaw na buhay.—Deut. 4:9, 10; 8:10-18; Ex. 12:24-27; Sal. 136:15.

Kita maninigo man na magmaan na dai malingaw. Mantang inaatubang niato an mga sakit sa buhay, kaipuhan na girumdomon niato si Jehova, na isinasaisip kun anong klase siang Dios asin an pagkamoot na ipinaheling nia sa pagregalo kan saiyang Aki, na nagtao nin pantubos sa satong mga kasalan tangani na kita magkaigwa nin sangkap na buhay sagkod lamang. (Sal. 103:2, 8; 106:7, 13; Juan 3:16; Roma 6:23) An regular na pagbasa kan Biblia asin aktibong pagpartisipar sa mga pagtiripon kan kongregasyon saka sa ministeryo sa langtad papagdadanayon na buhay sa sato an mahahalagang marhay na katotoohan na ini.

Kun napapaatubang sa mga pagdedesisyon, dakula man o sadit, girumdomon an mahahalagang marhay na katotoohan na iyan, asin pabayaan iyan na makaimpluwensia sa saindong pag-isip. Dai malingaw. Pagiya ki Jehova. Imbes na helingon sana an mga bagay sa punto de vistang sa laman o magsarig sa kapusokpusokan nin sarong pusong bakong sangkap, ihapot sa sadiri, ‘Ano daw na hatol o mga prinsipyo sa Tataramon nin Dios an maninigong magkaigwa nin labot sa sakong desisyon?’ (Tal. 3:5-7; 28:26) Dai nindo magigirumdoman an mga bagay na nungka nindong nabasa o nadangog. Alagad mantang nagtatalubo kamo sa tamang kaaraman asin pagkamoot ki Jehova, madakol an reserbang kaaraman na ikapagigirumdom sa saindo kan espiritu nin Dios, asin an nagdadakula nindong pagkamoot ki Jehova mamotibar sa saindo na gumawe kaoyon dian.