Malinaw an Pagkasabi kan mga Termino

TANGANI na makapagkomunikar nin epektibo, dapat na kamo magtaram nin malinaw. An gusto nindong sabihon tibaad interesante, importante pa ngani, alagad an dakol kaiyan mawawaran nin halaga kun an saindong mga termino bakong pasil na masabotan.

Dai namomotibar an mga tawo nin pagtaram na dai talaga ninda nasasabotan. Dawa kun an saro makosog an boses asin dangog-dangog, kun an itinataram nia bakong sayod, dai kaiyan mapahihiro an iba. Garo sia kaiyan nagtataram sa ibang tataramon, dai masabotan kan nagdadangog. (Jer. 5:15) Ipinagigirumdom sa sato kan Biblia: “Kun an trumpeta tumanog nin malibog na apod, siisay an mag-aandam para sa pakilaban? Sa siring man na paagi, kun dai kamo magtaram paagi sa dila nin tataramon na pasil na masabotan, paano maaaraman kun ano an itinataram? Sa katotoohan, kamo magtataram sa doros.”—1 Cor. 14:8, 9.

Ano an Nagpapalibog sa Pagtaram? Puede na an dai pakabuka nin igo kan ngoso. An matagas na kalamnan sa panga asin haros dai naghihirong mga ngabil puedeng makakontribwir sa pagtaram na pugong.

An marikason na pagtaram puede man na magbunga nin tataramon na depisil na masabotan. Iyan garo pagpatokar nin rekording nin pagtaram na mas marikas kisa dinisenyong rikas kaiyan. Yaon an mga termino, alagad nawawara an dakol na pakinabang.

Sa nagkapirang kaso, an malibog na pagtaram konektado sa depekto sa mga organo sa pagtaram. Alagad dawa an mga kaipuhan na atubangon an siring na problema dakula an magigibo na magrahay paagi sa pag-aplikar kan mga suhestion sa leksion na ini.

Minsan siring, parate na an malibog na pagtaram bunga nin dai pagsayod sa mga termino—na pinagsusurusumpay an mga iyan kaya iyan depisil nang masabotan. Tibaad an kalabot sa problema paglaktaw sa mga silaba o mahahalagang letra o dai pagsayod kan saporo nin mga termino. Kun daing pakundangan na pinagsusurusumpay nin saro an mga termino, tibaad masabotan kan mga nagdadangog sa saiya an nagkapirang ideya asin frase alagad kaipuhan nindang tuodan an iba. An dai pakapronunsiar nin malinaw puedeng makaraot sa pagkaepektibo kan pagtotokdo nin saro.

Kun Paano Magtataram nin Malinaw. An saro sa nagdedeterminar na bagay sa malinaw na pakataram nin mga termino iyo an pakasabot sa komposisyon kan mga termino sa saindong lenguahe. Sa kadaklan na lenguahe, an mga termino kompuesto nin mga silaba. An mga silaba kompuesto nin saro o labi pang letra na itinataram bilang saro sana. Sa siring na mga lenguahe, an kada silaba sa parate isinasabi kun kamo nagtataram, minsan ngani bakong gabos parareho an pagdodoon. Kun gusto nindong pakarhayon an pagigin malinaw kan saindong pagtaram, luwayan asin gibohon an bilog nindong makakaya na isabi an kada silaba. Sa primero ini tibaad garo baga sobra man kaeksakto, alagad mantang kamo nag-eensayo, luway-luway na ikababalik nindo an suabeng pagtaram. Tangani na magin suelto an pagtaram, sierto na may mga termino na itataram nindo nin haros mayong pagpondo sa tahaw, alagad ini maninigong likayan kun may peligro na magin malibog an kahulogan.

Patanid: Tangani na makultibar an kasayodan nindo, puede nindong ensayohon an pagtaram asin pagbasa na sobra kaeksakto. Alagad dai itogot na iyan an magin normal nindong pagtaram. Iyan magigin artipisyal asin bakong natural.

Kun medyo pugong an saindong pagtaram, adalan na itiso an saindong payo asin irayo an saindong koko sa saindong daghan. Kun binabasa an Biblia, kaptan an libro sa igong langkaw tangani na maduko sana kamo nin kadikit kun ibinabalyo nindo an saindong pagheling hale sa mga nagdadangog pasiring sa saindong Biblia. Paagi kaini maluwas na daing olang an saindong mga tataramon.

An pakanood na ikaluwas an tension maparahay man kan saindong pagtaram. Aram na marhay na an tension sa kalamnan sa lalauogon o sa mga nagkokontrol kan paghangos nindo puedeng magkaigwa nin maraot na epekto sa mekanismo nin pagtaram. An siring na tension nakaoolang sa may armoniyang koordinasyon na maninigong yaon sa pag-oltanan kan saindong isip, mga organo sa pagtaram, asin paghangos—na maninigo na magin suabe asin natural.

An kalamnan sa panga kaipuhan na nakarelaks tangani na makasunod tolos sa pagdirehir hale sa hotok. Dapat na nakarelaks man an mga ngabil. Dapat na iyan andam na ibuka asin itiom nin marikas tangani na itaram an dakol na tanog na naghahale sa ngoso asin halonan. Kun tuog an panga asin mga ngabil, an ngoso dai mabuka nin tama, asin an tanog maagi sa mga ngipon. An ibubunga kaini lagong, pugong, malibog na pagtaram. Minsan siring, an pagrelaks kan panga asin mga ngabil dai nangangahulogan nin pagigin pabaya sa mga ugale niato sa pagtaram. Kaipuhan na ini timbangan kan ugale nin pagbilog sa mga tanog tangani na malinaw an pagpronunsiar.

Sa pag-analisar kan saindong situwasyon, tibaad maheling nindo na nakatatabang an pagbasa nin makosog. Obserbaran nin maingat kun paano nindo ginagamit an makangangalas na mga organo sa pagtaram. Binubuka daw nindo nin igo an saindong ngoso tangani na makaluwas nin daing kaolangan an mga tanog nin pagtaram? Dapat nindong girumdomon na an dila bako sanang iyo an organo sa pagtaram, minsan ngani saro iyan sa pinakaginagamit. An liog, panga sa ibaba, mga ngabil, kalamnan sa lalauogon, asin kalamnan sa halonan gabos may kabtang. Mantang kamo nagtataram, garo daw iyan ginigibo nindo na dai naghihiro an saindong lalauogon? Kun iyo, dakula an probabilidad na malibog an saindong pagtaram.

Kun may tape recorder, irekord an boses nindo mantang kamo nagtataram sa natural na paagi, arog kan gigibohon nindo sa saro kun kamo nasa ministeryo sa langtad. Irekord an nagkapirang minuto nin pagtaram na garo sana nakikipag-olay. An paghinanyog sa rekording na iyan makatatabang sa saindo na maaraman nin eksakto an ano man na tibaad problema nindo sa malinaw na pagtaram kan nagkapirang termino. Helingon kun may mga dai pakasayod, pagkapugong, o pagpahalipot sa mga termino, asin pagmaigotan na aramon an causa. Parate na mareremedyohan an kaluyahan paagi sa paghihingoang paoswagon an mga puntong pinag-olayan sa enotan.

May depekto daw kamo sa pagtaram? Ensayohon na bukahon pa nin kadikit an saindong ngoso kisa dati, asin pagmaigotan na magin mas maingat sa pagsayod. Panoon an saindong pulmon kun kamo minahangos, asin magtaram nin luway-luway. An paggibo kaini nagpangyari sa dakol na may depekto sa pagtaram na makataram nin mas malinaw. Kun kamo nagsasangotsangot, irayo an dila nindo sa ngipon nindo sa atubangan kun sinasabi an mga tanog na s asin z sa mga termino. Minsan tibaad dai biyong maresolberan an saindong problema, dai kamo madesesperar. Girumdoma na pinili ni Jehova si Moises, sarong tawo na tibaad may depekto sa pagtaram, na magpaabot nin mahahalagang marhay na mensahe sa banwaan nin Israel sagkod ki Faraon nin Egipto. (Ex. 4:10-12) Kun kamo listong kumuyog, gagamiton man nia kamo, asin bebendisyonan nia nin kapangganahan an saindong ministeryo.