Mustra Asin Panlauog

AN MGA hale sa nagkapirang kultura mas sueltong magmustra kisa mga may ibang pinaghalean. Pero, haros gabos nagtataram na nagliliwatliwat an panlauog asin nagmumustra. Totoo ini sa personal na pakikipag-olay sagkod sa pagtaram sa publiko.

An mustra natural ki Jesus asin sa enot niang mga disipulo. Sarong beses, may nagbareta ki Jesus na gusto siang makaolay kan saiyang ina asin kan saiyang mga tugang. Nagsimbag si Jesus: “Siisay an sakong ina, asin sairisay an sakong tugang?” Dangan idinudugang kan Biblia: “Iinuunat an saiyang kamot sa saiyang mga disipulo, sia nagsabi: ‘Uya! An sakong ina asin an sakong mga tugang!’ ” (Mat. 12:48, 49) Kabilang sa iba pang pagkasambit, ipinaheheling kan Biblia sa Gibo 12:17 asin 13:16 na an mga apostol na si Pedro asin Pablo sadiring boot man na naggamit nin mustra.

An mga ideya asin saboot ikinakakomunikar bako sanang sa boses kundi paagi man sa mustra asin panlauog. An dai pakagamit kaini nin toltol tibaad magtao kan impresyon nin pagkaindiperente sa parte kan nagtataram. Alagad kun marahayon an pagkakombinar kan mga paaging ini nin pakikikomunikar, nadadagdagan na marhay an pagkaepektibo nin pagtaram. Dawa kun kamo nasa telepono, kun may angay kamong paggamit nin mustra asin panlauog, mas pasil na ikapahahayag kan saindong boses an halaga kan saindong mensahe saka an personal nindong saboot manongod sa sinasabi nindo. Sa siring, baga man kamo nagtataram nin ekstemporanyo o nagbabasa, baga man an hineheling kan mga nagdadangog sa saindo kamo o an sadiri nindang kopya kan Biblia, mahalaga an mustra asin panlauog.

An saindong mustra asin an saindong panlauog dai maninigong magin garo hale sa libro. Nungka na kamo kinaipuhan na mag-adal kun paano magngingisi o kun paano maggugurobgutob. An mustra maninigo man na magpahayag nin saboot na nasa puso nindo. Mientras na mas naluwas na sana an saindong mustra, mas marahay.

May duwang pankagabsan na kategoriya an mustra: deskriptibo asin enpatiko. An mustrang deskriptibo nagpapahayag nin aksion o nagpapaheling nin sokol asin namumugtakan. Sa paadalan, kun an pinaooswag nindo paggamit nin mustra, dai makontento sa saro sana o duwa. Pagmaigotan na magmustra sa natural na paagi sa bilog nindong pahayag. Kun nadedepisilan kamong gibohon ini, tibaad makatabang sa saindo na hanapon an mga termino na nagpapaheling nin direksion, distansia, sokol, namumugtakan, o relatibong posisyon. Minsan siring, sa dakol na kamugtakan, an kaipuhan sana nindong gibohon luboson an atension sa saindong pahayag, na dai pinoproblema an itinatao nindong impresyon, kundi itinataram asin ginigibo an mga bagay na arog kan ginigibo nindo sa pan-aroaldaw na buhay. Kun pamugtak an boot nin saro, natural na minaluwas an mustra.

An mustrang enpatiko nagpapahayag nin pagsaboot asin kombiksion. Iyan nagpapalataw sa, binubuhay, asin dinudugangan nin puersa an mga ideya. Importante an mustrang enpatiko. Alagad magmaan! An mustrang enpatiko madaling magin pinagkakatodan na hiro. Kun paorootro nindong ginagamit an iyo man sanang mustra, iyan tibaad magpoon na makaapod nin atension imbes na pakarhayon an saindong pahayag. Kun sabihon kan saindong paraataman sa paadalan na may problema kamo digdi, probaran na sa kadikit na panahon an gamiton sana nindo mustrang deskriptibo. Paghaloyhaloy, ponan giraray an paggamit nin mustrang enpatiko.

Sa pagdeterminar kun guranong mustrang enpatiko an gagamiton nindo asin kun anong mustra an angay, konsideraron an saboot kan mga kaolay nindo. Tibaad dai mapamugtak an mga nagdadangog kun itinotokdo sinda. Kun an sarong lalaki sa nagkapirang kultura mamustra, arog baga kan pagtahob sa ngoso nia kan saiyang kamot tanganing ipahayag an pagkabigla, ini ibibilang na binabaye. Sa nagkapirang parte kan kinaban, ibinibilang na bakong mabini para sa mga babae na sueltong magmustra kan mga kamot. Kaya sa mga lugar na iyan, an mga tugang na babae nangorognang kaipuhan na gamiton nin tama an panlauog. Asin sa atubangan nin sadit na grupo, an sobra man na mga mustra tibaad paghelingon na makangingisi sa haros arin man na parte kan kinaban.

Mantang kamo nagkakaeksperyensia asin mas nagigin pamugtak an boot sa pagtaram, an ano man na mustrang enpatiko na gamiton nindo mapahayag nin natural kan nasa boot nindo, na ipinaheheling an saindong kombiksion asin sinseridad. Dadagdagan kaiyan nin kahulogan an saindong pagtaram.

An Ekspresyon sa Saindong Lalauogon. Labi sa arin pa man na ibang parte kan hawak, parateng ipinahahayag kan saindong lalauogon an talagang saboot nindo. An saindong mga mata, an korte kan saindong ngoso, an kiling kan saindong payo gabos may kabtang. Minsan daing tataramon, ikapahahayag kan saindong lalauogon an pagkaindiperente, pagkabalde, pagkaribong, pagngalas, o pagkaogmang marhay. Kun an siring na mga panlauog kaiba kan itinataram, iyan nakadadagdag nin bisual asin emosyonal na epekto. Ibinugtak kan Kaglalang an dakulang konsentrasyon nin kalamnan sa saindong lalauogon—labing 30 gabos. Haros kabanga digdi an ginagamit kun kamo minahuyom.

Baga man kamo nasa plataporma o nakikakabtang sa ministeryo sa langtad, hinihingoa nindong ipaabot sa mga tawo an sarong mensahe na nakaoogma, na makapagagayagaya sa saindang puso. Pinatutunayan iyan nin huyom na may init. Sa ibong na lado, kun mayo nin ekspresyon an saindong lalauogon, tibaad magpalataw ini nin pagduda sa saindong sinseridad.

Labi pa dian, an huyom nagsasabi sa iba na kamo may maboot na saboot para sa sainda. Iyan nangorognang importante sa mga aldaw na ini na an mga tawo parateng takot sa mga estranghero. An huyom nindo makatatabang sa mga tawo na mapamugtak an boot asin magin mas mapaghimate sa sinasabi nindo.