Paggamit nin Mikropono

DAKULANG panahon asin paghihingoa an inuubos kan satong Kristianong mga tugang na lalaki asin babae sa pag-atender sa Kristianong mga pagtiripon. Tangani na sinda makinabang sa sinasabi, dapat na makadangog sinda nin malinaw.

Kan kaaldawan kan suanoy na Israel, mayo nin de koryenteng pagpakosog kan boses. Kan si Moises magtaram sa nasyon nin Israel sa Kaplanodohan nin Moab bago sinda lumaog sa Dagang Panuga, paano nakadangog an gabos na nagdadangog sa saiya, na minilyon an kabilangan? Posible na si Moises naggamit nin sistema nin mga tawong magpapasapasa na paagi kaiyan sunod-sunod na inootro an saiyang mga tataramon nin mga lalaki na nasa tamang lagwat sa bilog na kampo. (Deut. 1:1; 31:1) Dai nahaloy pakaponi kan mga Israelita kan pagkongkistar ninda sa daga na nasa solnopan na kampi kan Jordan, an nasyon tinipon ni Josue sa atubangan kan Bukid nin Gerizim asin Bukid nin Ebal, na minalataw na yaon sa kababan na nasa tahaw an mga Levita. Duman an bilog na banwaan nakadangog asin suminimbag sa mga bendisyon asin maldisyon nin Dios na sinabi sa sainda. (Jos. 8:33-35) Posible na sa okasyon man na ini, ginamit an mga tawong magpapasapasa, alagad daing duda na nakatabang man an marahayon na akustika kan lugar na idto.

Pakalihis nin mga 1,500 na taon kan “may dakulaon na kadaklan na nagtiripon” sa Dagat nin Galilea tanganing magdangog ki Jesus, suminakay sia sa sarong baroto, ruminayo sa baybayon, asin tuminukaw tanganing magpahayag sa kadaklan. (Mar. 4:1, 2) Taano si Jesus ta nagtaram hale sa sarong baroto? Minalataw na huli ta an boses nin tawo nadadangog nin klarong-klaro sa ibabaw nin toninong na tubig.

Sagkod kan kapinonan kan ika-20 siglo, an kosog asin pagkaklaro kan boses kan nagpapahayag parate na iyong nagdedeterminar kun pira sa mga nagdadangog an makadadangog sa sinasabi. Minsan siring, poon kan mga taon nin 1920, naaprobetsaran kan mga lingkod ni Jehova an de koryenteng pagpakosog kan boses nin tawo sa saindang mga kombension.

Kasangkapan sa Pagpakosog kan Boses. An siring na kasangkapan kayang pakosogon nin dakol na doble an boses kan nagpapahayag pero papagdanayon pa man giraray an kualidad saka tono kan saiyang boses. Dai hinahagad sa nagpapahayag na puersahon an saiyang cuerdas vocales. Dai kaipuhan na magsakit an mga naghihinanyog tangani na masabotan an sinasabi. Imbes, puede sindang magkonsentrar sa mensahe.

Dakula an ginigibo tangani na maseguro na may marahay na kasangkapan sa pagpakosog kan boses sa mga kombension asin asamblea kan Mga Saksi ni Jehova. Saro pa, dakol na Kingdom Hall an naggagamit nin kasangkapan sa pagpakosog kan boses kan mga nagdidiskurso, namamayo sa mga pagtiripon, o nagbabasa sa plataporma. Asin may mga kongregasyon na igwa man nin mga mikropono na ginagamit kan mga nagdadangog kun nagkokomento sa oras kan mga pagtiripon. Kun igwa nin siring na kasangkapan an saindong kongregasyon, adalan na gamiton iyan nin toltol.

Nagkapirang Pundamental na Giya. Tangani na magamit nin tama an kasangkapan, isaisip an minasunod na mga punto: (1) An mikropono maninigo na sa pankagabsan mga apat sagkod anom na pulgada an distansia sa saindong ngoso. Kun haranihon an mikropono, tibaad maraot an saindong mga tataramon. Kun iyan harayoon, magigin malibog an saindong boses. (2) Maninigo na nasa atubangan nindo an mikropono, bakong sa gilid. Kun hinihiro nindo an saindong payo patoo o pawala, magtaram sana kun paatubang sa mikropono an saindong lalauogon. (3) Gamiton an mas makosog asin mas mapuersa nin kadikit na boses kisa kun nakikipag-olay kamo. Alagad dai kaipuhan na magkurahaw. An kasangkapan sa pagpakosog kan boses papaaboton an boses nindo sagkod sa mga nasa pinakaporo kan mga nagdadangog sa saindo. (4) Kun kaipuhan kamong mag-ighim o napapaabo o napapahatsing kamo, seguradohon na irayo an payo nindo sa mikropono.

Kun Nagdidiskurso. Pagtindog nindo sa atubangan kan podyum, may tugang na sa ordinaryong kamugtakan mapakarhay kan mikropono. Tumindog sa natural na paagi na nakaatubang an lalauogon nindo sa mga nagdadangog mantang ginigibo nia iyan. Ibugtak an saindong nota sa podyum, asin seguradohon na dai naoolang kan mikropono an pagheling nindo dian.

Pagpoon nindong magtaram, hinanyogon kun kumusta an tanog kan boses nindo sa pagluwas kaiyan sa laudispiker. Makosogon daw iyan, o may mga tataramon daw na garo minaputok? Tibaad kaipuhan kamong sumibog nin saro o duwang pulgada. Kun sinasalimbadan nindo an saindong nota, girumdoma na maninigo sana kamong magtaram asin magbasa kun an saindong lalauogon nakaatubang sa mikropono o medyo harohalangkaw dian, bakong sa ibaba kaiyan.

Kun Nagbabasa sa Plataporma. Pinakamarahay na kaptan an saindong Biblia o ibang publikasyon tangani na paatubang sa mga nagdadangog an saindong lalauogon. Mantang nasa atubangan gayod nindo an mikropono, tibaad kaipuhan na kaptan nindo an saindong binabasa nin medyo nakagilid. Nangangahulogan ini na an payo nindo maninigong medyo nasa ibong kan mikropono. Kun siring, pagbasa nindo, deretso sa mikropono an boses nindo.

An kadaklan na tugang na nagbabasa sa Pag-adal sa Torrengbantayan minatindog asin nagtataram sa mikroponong patindog. Pinapangyayari kan posisyon na ini na sinda mas sueltong makahangos asin makabasa na mas pano nin ekspresyon. Girumdomon na dakulang kabtang kan pagtiripon an pagbasa kan mga parapo. An pakinabang na nakukua kan mga nagdadangog depende, sa dakulang sokol, sa pakadangog sa pagbasa kan materyales.

Kun Nagkokomento Durante kan Pagtiripon. Kun naggagamit nin mga mikropono an saindong kongregasyon para sa pakikikabtang kan mga nagdadangog, girumdomon na kaipuhan pa man giraray na magtaram nin malinaw asin igo an kosog nin boses. Kun nagkokomento, hingoahon na kaptan an publikasyon na inaadalan nindo o an saindong Biblia. Paagi kaini malinaw nindong maheheling an materyales mantang nagtataram kamo sa mikropono.

Sa nagkapirang kongregasyon may asignadong mga tugang na magdara kan mikropono sa mga inapod na magkomento. Kun arog kaiyan sa saindong kongregasyon, kun kamo inapod, papagdanayon na nakaitaas an saindong kamot tangani na maheling kan tugang na nagkakapot kan mikropono kun saen kamo nakatukaw asin madali siang makaabot sa saindo. Kun an mikropono kinakaptan sana, magin andam na aboton iyan. Dai ponan an saindong pagkomento sagkod na mayo pa sa posisyon an mikropono. Pagkatapos kan komento nindo, ibalik tolos an mikropono.

Kun May Kabtang sa Demonstrasyon. An paggamit nin mikropono durante nin sarong demonstrasyon nagkakaipo nin espesyal na pagplano antes pa. Kun may patindogan an mikropono, libre an duwa nindong kamot para sa saindong Biblia asin sa saindong nota. An paggamit nin kinakaptan sanang mikropono tibaad magtao nin mas dakulang libertad sa paghiro, alagad tibaad kaipuhan na iareglo nindo na kaptan iyan kan kapadis nindo. Sa siring magigin libre an mga kamot nindo sa pagkapot kan saindong Biblia. Ini maninigo na ensayohon nindo asin kan saindong kagharong tangani na makanood an kapadis nindo kun paano iyan kakaptan nin tama. Girumdomon man na kun nasa plataporma, maninigo na dai kamo magtalikod sa mga nagdadangog, nangorogna kun kamo nagtataram.

Sa mga demonstrasyon sa Pagtiripon sa Paglilingkod, tibaad nagkapira an partisipante, asin tibaad pabarobalyo sinda nin lugar sa plataporma. Sa siring, tibaad nagkapirang mikropono an kaipuhan. An mga ini maninigong ibugtak na sa tamang lugar antes pa o itao sa mga partisipante pagduman ninda sa plataporma. An pagseguro na nasa tamang lugar sa tamang panahon an mga mikropono nagkakaipo nin pagplano antes pa. An pag-ensayo kan mga demonstrasyon bago iyan iatubang nagtatao nin oportunidad na matokdoan an mga partisipante sa epektibong paggamit nin mga mikropono. Kun dai makapag-eensayo sa plataporma, tibaad madonong na an mga partisipante may kapotan na arog kadakula nin mikropono tangani na mapraktis an tamang posisyon. Pakatapos kan demonstrasyon, maninigo na maingat na ibaba kan mga partisipante an mga mikroponong kinakaptan sana, na nagmamaan na dai masikyod sa kordon nin ibang mikropono sa pagbaba ninda sa plataporma.

An pagtao niato nin atension sa paggamit nin mikropono direktang konektado sa saro sa prinsipal na mga obheto kan satong mga pagtiripon, arin na baga, an pagtinawanan nin pakinabang paagi sa pag-orolay niato sa Tataramon nin Dios. (Heb. 10:24, 25) Paagi sa pakanood na gamiton nin epektibo an mikropono, personal kitang makakokontribwir sa importanteng obhetong ini.