An Pagtiripon sa Paglilingkod Sinasangkapan Kita Para sa Gabos na Marahay na Gibo
1 An katuyohan kan Pagtiripon sa Paglilingkod iyo na sangkapan kita na lubos na makikabtang sa ministeryo sa langtad. (2 Tim. 3:17) Alagad kun kita dai mag-andam para sa pagtiripon o mag-aplikar kan satong nanonodan, kakadikit kan mga pakinabang.
2 An patienot na pag-andam makatatabang saindo na mas lubos na masabotan an instruksion. Repasohon an mga publikasyon na gagamiton, asin darahon nindo iyan tanganing masundan nindo an espiker asin makapakikabtang.
3 Maingat na rerepasohon kan nangengenot na paraataman an iniskedyul na mga kabtang sa pagtiripon. An may kakayahan, kuwalipikadong mga magurang asin ministeryal na lingkod iaasignar na andamon iyan. (om p. 70) An mga kongregasyon na kakadikit an magurang asin ministeryal na lingkod puwedeng iasignar an ibang kuwalipikadong tugang na lalaki na tabangan sinda. Maninigong mag-andam na gayo an kada espiker, sunodon na marhay an paggiya na itinao, asin seguradohon na dai sia sumobra sa oras.
4 An tugang na iinasignar sa mga paisi maninigong kontakon nin patienot an nangengenot na paraataman tanganing aramon kun anong mga bagay an kinakaipuhan na sambiton. Puwedeng iiba digdi an mga surat hale sa Sosyedad o mga pagirumdom manongod sa mga areglo sa paglilingkod o report. Puwedeng maaraman niato na igwa nin mga naghehelang na kaipuhan na songkoon o madangog niato an manongod sa mga aktibidad kan kongregasyon na pinaplano para sa ngapit. Magtao nin odok na atension tanganing magin kamong andam na gibohon an saindong kabtang.
5 Kun kinakaipuhan nin sarong kabtang an pagpartisipar kan mga nagdadangog, mag-andam paagi sa pagbasa sa materyal asin paghanap sa mga teksto. Isipon kun paano nindo pinaplanong iaplikar an mga suhestion asin kun ano an puwede nindong ikomento. Puwede nindong ipaheling an praktikal na halaga kan instruksion paagi sa pag-estorya nin sarong halipot na eksperyensia.
6 Kun igwa nin demonstrasyon, probaran na isipon kun ano an sasabihon nindo sa situwasyon na iyan. Mangnohon an mga argumentong ginamit. Pagmaigotan na girumdomon an sinabi nindo kan huri na namugtak kamo sa arog kaining situwasyon, asin konsideraron kun paano an mga puntong idinemonstrar makatatabang saindo na makakua nin mas mararahay na resulta sa ngapit.
7 An mga partisipante sa mga demonstrasyon asin interbio maninigong patienot na ensayohon na gayo. Maninigong aram kan kada saro kun ano an saiyang sasabihon asin gigibohon sa plataporma. An dai inensayong mga kabtang parateng dai nakamomotibar o nakapakokosog sa mga nagdadangog. May mga partisipante na nag-eensayo kan saindang kabtang pakatapos kan Pag-adal sa Torrengbantayan sa Domingo tanganing makapag-ensayo sinda sa plataporma asin maheling kun arin na mga mikropono asin tukawan an kakaipuhanon.
8 Boot niatong magin “andam manongod sa gabos na marahay na gibo.” (2 Tim. 2:21) Tinatabangan kita kan Pagtiripon sa Paglilingkod sa paggibo kaiyan. An pag-atender sa asin pag-aplikar kan satong nanonodan matabang sato na “lubos na otobon an [satong] ministeryo.”—2 Tim. 4:5.