Bagong Iskedyul sa Pagtiripon kan Kongregasyon
1, 2. Anong mga pagbabago sa mga pagtiripon an mangyayari poon sa Enero 2009?
1 Durante kan semana nin Abril 21-27, 2008, nadangog kan pambilog na kinaban na kasararoan nin magturugang an sarong nakakaogmang paisi. “Poon sa Enero 1, 2009, an Pag-adal sa Libro kan Kongregasyon gigibohon na kadungan kan Teokratikong Paadalan sa Pagmiministro asin kan Pagtiripon sa Paglilingkod. An apod sa Pag-adal sa Libro kan Kongregasyon magigin nang Pag-adal sa Biblia kan Kongregasyon (Congregation Bible Study).”
2 Iskedyul Para sa Semanal na Pagtiripon na Ini: An total na lawig kan pagtiripon na ini, kabale na an mga kanta asin pamibi, magigin 1 oras asin 45 minutos. An pagtiripon poponan paagi sa kanta asin pamibi (5 min.), na susundan kan Pag-adal sa Biblia kan Kongregasyon (25 min.). An Teokratikong Paadalan sa Pagmiministro (30 min.) masunod tolos pakatapos kaiyan. Dangan, poponan paagi sa sarong kanta (5 min.) an Pagtiripon sa Paglilingkod (35 min.). An pagtiripon tataposon paagi sa kanta asin pamibi (5 min.). Tanganing tabangan kamo sa pag-andam para sa mga pagtiripon na ini, an iskedyul para sa Pag-adal sa Biblia kan Kongregasyon, Teokratikong Paadalan sa Pagmiministro, asin Pagtiripon sa Paglilingkod ipupublikar kada bulan sa An Satong Ministeryo sa Kahadean.
3. Paano gigibohon an Pag-adal sa Biblia kan Kongregasyon?
3 Pag-adal sa Biblia kan Kongregasyon: An pagtiripon na ini gigibohon sa kaparehong paagi nin pagkondukta kan Pag-adal sa Torrengbantayan. Dai kaipuhan na magpoon paagi sa pagrepaso kan pinag-adalan kan nakaaging semana. Imbes, an pagtiripon maninigo na magkaigwa nin halipoton sana na introduksion. Tatawan kaini nin igong panahon an gabos na presente na makatao nin halipot na mga komento. An nangengenot na paraataman an maasignar nin kamagurangan na masarosalida sa pagkondukta sa pagtiripon na ini, na laen-laen na magurang kada semana.
4. Sa anong paagi mababago an Pagtiripon sa Paglilingkod?
4 Pagtiripon sa Paglilingkod: An Pagtiripon sa Paglilingkod pareho pa man giraray alagad mas halipot na an mga kabtang kaini. Sa parate, kaipuhan nin limang minuto para sa mga paisi. Inaasahan na igo na ini para sa mahalagang marhay na mga paisi saka para sa nagkapirang surat hale sa sangang opisina. An mga paising arog nin areglo sa paglilingkod sa langtad, mga iskedyul sa paglinig, report sa kuenta, asin rutinang mga surat hale sa sangang opisina dai na kaipuhan na basahon sa plataporma alagad ipapaskil iyan sa information board tanganing mabasa kan mga tugang. An mga tinawan nin kabtang sa programa maninigong mag-andam na marhay asin maingat na magsunod sa itinaong oras asin mga instruksion.
5. Durante kan semana nin pagsongko kan paraataman sa sirkito, ano an magigin iskedyul kan pagtiripon kan kongregasyon?
5 Pagsongko kan Paraataman sa Sirkito: An semanal na iskedyul kan paraataman sa sirkito dai liliwaton. Sa Martes gigibohon an Teokratikong Paadalan sa Pagmiministro asin an Pagtiripon sa Paglilingkod na susundan nin kanta. Dangan an paraataman sa sirkito matao nin 30 minutos na pahayag. Arog kan ginigibo na ngonyan durante kan semana kan saiyang pagsongko, saro pang banggi an iiiskedyul para sa Pag-adal sa Biblia kan Kongregasyon na susundan nin kanta asin pahayag sa paglilingkod kan paraataman sa sirkito. Tataposon an pagtiripon paagi sa kanta asin pamibi.
6. Ano an papel kan paraataman sa grupo?
6 Mga Pagtiripon Bago Maglingkod sa Langtad: An mga paraataman sa grupo aasignaran kan grupo nin kamagurangan na mag-asikaso sa mga grupo sa paglilingkod sa langtad asin magpastor sa mga indibiduwal na minakompuesto sa grupo. Kun sarong ministeryal na lingkod an kaipuhan na nombrahan sa katongdan na iyan, maninigo siang apodon na “lingkod sa grupo.”
7. Ano an satong maaasahan sa bago niatong iskedyul sa pagtiripon kan kongregasyon?
7 Base sa impormasyon na ini, magkakaigwa kita nin oportunidad na ikaogma an nakakapagtokdo asin nakakapakosog na banggi nin espirituwal na bangkete. Tatabangan kita kaini na magin epektibong mga parahulit asin paratokdo, na sinanay para sa mas mabungang ministeryo.—Efe. 4:13, 14; 2 Tim. 3:17.
8. Paano an patienot na pag-andam niato bilang indibiduwal matabang sa sato saka sa iba?
8 An pag-adal nin patienot para sa pagtiripon na ini matabang sa sato na malinaw na magkonsentrar sa pangenot na mga puntong idinodoon durante kan kada programa. Kita gabos magkakaigwa nin oportunidad na magkomento, na nakakakontribwir sa pagrinibayan nin pagparigon sa boot. (Roma 1:11, 12; Heb. 10:24) Maninigo na an satong katuyohan iyo na ‘an satong pag-oswag mahayag sa gabos’ paagi sa ‘paggamit kan tataramon kan katotoohan sa tamang paagi.’—1 Tim. 4:15; 2 Tim. 2:15.
9. Ano an satong determinasyon, asin taano?
9 Naggagayagaya kita sa mahalagang pagbabagong ini sa satong mga pagtiripon kan kongregasyon. Logod na padagos na aprobetsaran niato gabos an paggiya na itinatao kan “maimbod asin mapagmansay na oripon” saka magdanay kita na dayupot sa satong Dakulang Pastor mantang inaandam nia kita sa dakulang “kahorasaan” na nagdadangadang na ngonyan.—Mat. 24:21, 45; Heb. 13:20, 21; Kap. 7:14.