Hapot

◼ Paano maninigong ponan an pambukas na kanta sa Teokratikong Paadalan sa Pagmiministro, Pagtiripon sa Paglilingkod, Pampublikong Pahayag, asin Pag-adal sa Torrengbantayan, asin siisay an mapakanta?

An piniling pambukas na mga kanta para sa kada semana sa Teokratikong Paadalan sa Pagmiministro nakalista sa Iskedyul sa Teokratikong Paadalan sa Pagmiministro na yaon sa suplemento kan An Satong Ministeryo sa Kahadean na Oktubre. An pambukas asin pantapos na mga kanta para sa Pagtiripon sa Paglilingkod kada semana maheheling sa pahina 2 kan An Satong Ministeryo sa Kahadean. Siring man, an mga numero kan kakantahon para sa semanal na Pag-adal sa Torrengbantayan yaon sa pahina 2 kan kada isyu kan An Torrengbantayan. An asignadong mga kanta ibinibilang na kabtang kan bilog na pagtiripon asin kun siring maninigo na an mapakanta iyo an tugang na namamayo kan pagtiripon imbes na an tsirman kan sinusundan na pagtiripon.

Halimbawa, an paraataman sa Teokratikong Paadalan sa Pagmiministro maogmang aakoon an mga nagdadangog, mapakanta kan pambukas na awit, pamamayohan an paadalan, dangan aapodon sa plataporma an enot na ispiker sa Pagtiripon sa Paglilingkod. An tugang na may kabtang sa Pagtiripon sa Paglilingkod iyo an maninigong magpakanta bilang pambukas kan Pagtiripon sa Paglilingkod.

Sa siring man na paagi, an tsirman an mabukas kan Pampublikong Pahayag. Maogma niang aakoon an gabos na nag-aatender asin iimbitaran sinda na makiiba sa pag-awit kan pambukas na kanta na pinili kan ispiker. An tsirman (o tibaad an ibang kualipikadong tugang na iinasignar antes pa) an mabukas kan pagtiripon paagi sa pamibi. Iiintrodusir nia an ispiker asin sasabihon nia an tema kan ipapahayag kaini. Pakatapos kan pahayag, papasalamatan sa halipot kan tsirman an pagtotokdo, alagad dai na nia kaipuhan na sabihon giraray an mga punto na ipinahayag pa sana kan ispiker. Ipapaisi nia an tema kan pampublikong pahayag para sa masunod na semana, dangan iimbitaran nia an gabos na nag-atender na magdanay para sa Pag-adal sa Torrengbantayan. Dai na kaipuhan kan tsirman na hapoton an mga nagdadangog kun boot nindang ipadara sa inimbitaran na ispiker kan kongregasyon an pagkamoot asin mga pataratara. Dangan, aapodon na sa plataporma kan tsirman an namamayo sa Pag-adal sa Torrengbantayan.

An namamayo sa Pag-adal sa Torrengbantayan an mapakanta kan enot na kanta na gagamiton sa panahon kan pag-adal. Pamamayohan nia an pag-adal kaoyon kan ipinublikar na mga instruksion dangan sasabihon nia an pantapos na kanta. Sa parate, aapodon kan namamayo sa Pag-adal sa Torrengbantayan an tugang na nagtao kan pampublikong pahayag tanganing iyo an mangenot sa pantapos na pamibi.

An pagsunod sa pangkagabsan na mga giyang ini makakatabang na seguradohon na an satong mga pagtiripon kan kongregasyon pinapamayohan sa sararong paagi.