Lubos na Makinabang sa Pagtiripon sa Paglilingkod
1 An odok sa pusong kapahayagan kan lambang lingkod nin Dios maninigo na: “Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang saro an sakong puso na matakot sa saimong ngaran.” (Sal. 86:11) An Pagtiripon sa Paglilingkod nagtatao nin espisipikong mga instruksion tanganing tabangan kita na mahaman an gibohon ni Jehova na paghuhulit kan maogmang bareta kan Kahadean. Kamo daw talagang nakikinabang sa Pagtiripon sa Paglilingkod paagi sa pagsapuso kan itinataong hatol?
MGA PAKINABANG SA MARAHAY NA PAG-ANDAM
2 Tanganing magkamit kan pinakadakulang pakinabang, kaipuhan an patienot na pag-andam. Taano? An lubos na pag-andam pinipreparar an isip asin puso na umako nin pagtotokdo. Paagi sa patienot na pag-adal asin paghorophorop sa materyal, orog nindong masasabotan asin magigirumdoman an iinatubang na espirituwal na kakanon. Magigin mas makahulogan an saindong mga komento, pakikikabtang sa mga demonstrasyon, o pagtao nin mga pahayag. An saindong puso mapapano nin satispaksion ta itinao nindo an pinakamakakaya nindo.—Ex. 23:19a; Tal. 16:23.
3 Kun nag-aandam makatatabang na an kada miembro kan pamilya may kopya kan publikasyon na ginagamit. An pag-andam nangorognang mahalaga para sa mga naasignaran nin kabtang sa Pagtiripon sa Paglilingkod. An mga asignasyon maninigo na gibohon nin amay pa tanganing may bastanteng panahon na makapag-andam an mga partisipante.
MGA PAKINABANG SA PAKIKIKABTANG ASIN PAG-APLIKAR
4 Narisa daw nindo na an pakikikabtang sa mga pagtiripon nakatatabang na gayo sa saindong pagkaogma dian? Arog kan ipinaliwanag kan The Watchtower kan Hulyo 1, 1972 sa pahina 411: “Nakakamtan an tunay na kagayagayahan kun an saro nagpapahayag kan saiyang pagtubod ki Jehova sa tahaw kan saiyang Kristianong mga tugang. Iyan bako sanang pakamate na kamo obligadong magkomento dangan magrelaks na asin bahala na an iba sa natatada pang kabtang kan pagtiripon. . . . An pagkamoot niato ki Jehova an nakapapano sa sato asin naglilipwas kaya boot niato na . . . ipahayag an satong pagkamoot sa saiya.”
5 Bilang an Kaharohalangkaweng Paratokdo, si Jehova naglalaom na magkabunga an pagtotokdo nia sa saiyang banwaan. (Helingon an Deuteronomio 17:10.) An paggibo asin pag-aplikar kan saindong nanonodan sa Pagtiripon sa Paglilingkod magtatao nin pakinabang sa saindo, asin makasasabi kamo, “Ginibo ko na an siring sa ipinagboot mo sa sako.”—Ezeq. 9:11.
6 Magkakamit man kamo kan kagayagayahan na iligtas an saindong sadiri asin an mga naghihinanyog sa saindo. (1 Tim. 4:16) Daing duwa-duwa, dakol an espirituwal na mga pakinabang sa Pagtiripon sa Paglilingkod. Kamo logod asin an saindong pamilya magin desidido na lubos na aprobetsaran iyan!