Kun Paano Mag-aandam Para sa Pagtiripon sa Paglilingkod
1. Ano an katuyohan kan Pagtiripon sa Paglilingkod, asin paano kita makikinabang nanggad dian?
1 An Pagtiripon sa Paglilingkod dinisenyo tanganing masangkapan kita para sa mabungang ministeryo. An pangenot na tinotokar dian iyo an paghuhulit kan maogmang bareta kan Kahadean, paggibo nin mga disipulo, asin pagpahayag kan nagdadangadang na paghokom nin Dios. (Mat. 28:20; Mar. 13:10; 2 Ped. 3:7) Makikinabang nanggad kita sa importanteng pagtiripon na ini kun kita preparadong marhay asin andam na magpartisipar.
2. Paano kita puedeng mag-andam na maghinanyog sa sarong pahayag?
2 Pahayag: Sa pangkagabsan, an reperensia kan pahayag naheheling sa mga instruksion sa ispiker. Puede nindong repasohon an itinaong reperensia, kaiba an sitadong mga teksto, asin horophoropon kun paano nindo ikakaaplikar an impormasyon sa saindong ministeryo.
3. Ano an puede niatong gibohon tanganing mag-andam para sa hapot-simbagan?
3 Hapot-Simbagan: An kabtang na ini gigibohon arog na marhay kan Pag-adal sa Torrengbantayan, na may halipot na introduksion asin kongklusyon. Kuritan an mayor na mga punto sa kada parapo, asin magin andam na magtao nin halipot asin makahulogan na mga komento.
4. Paano kita makakapag-andam para sa kabtang na pakikipag-olay sa mga nagdadangog?
4 Pakikipag-olay sa mga Nagdadangog: An kabtang na ini itatao bilang pahayag, alagad papapartisiparon kan ispiker an mga nagdadangog. Kun kinukuritan nindo an mayor na mga punto asin binabasa an sitadong mga teksto, tibaad makapagkomento kamo kun maghapot an ispiker. An tugang na nangengenot sa kabtang na ini gigibohon an gabos na paghihingoa na papartisiparon an mga nagdadangog sa pagtokar kan pangenot na mga punto.
5. Ano an makakatabang sa sato tanganing makinabang na marhay sa mga demonstrasyon?
5 Mga Demonstrasyon: An nagkapirang kabtang may kaibang realistikong mga demonstrasyon tanganing ipaheling kun paano gagamiton sa teritoryo an mga impormasyon na tinokar. An kamagurangan o eksperyensiadong mga parahayag o payunir papakiolayan na magdemonstrar. Puedeng kaiba sa pag-andam nindo kan kabtang na ini an pag-antisipar kun paano gigibohon an presentasyon na iyan. Kun idinemonstrar an sarong sampol na presentasyon, horophoropon kun paano nindo sasabihon iyan sa sadiri nindong mga tataramon asin kun paano nindo ibabagay iyan sa manlaenlaen na kagharong. Seguradohon na igwa kamo kan publikasyon o magasin na gagamiton sa demonstrasyon. Durante kan saindong Pampamilyang Pagsamba, magigin kapakipakinabang para sa saindo na praktison an nagkapira sa mga presentasyon na ini.
6. Ano an nagkapirang dahelan sa pag-andam para sa Pagtiripon sa Paglilingkod?
6 Mas nakakaogma an Pagtiripon sa Paglilingkod kun kita andam asin kun inaantisipar niato an marahayon na instruksion na itatao. An paggibo kaiyan magreresulta sa orog na pagparinigonan nin boot. (Roma 1:11, 12) Kun tinatawan niato nin panahon an pag-andam para sa Pagtiripon sa Paglilingkod, kita orog na masasangkapan na otobon an sugo sa sato.—2 Tim. 3:17.