An Saindong Kabtang Tanganing Magin Kapakipakinabang an mga Pagtiripon
1 May duwang liyabe tanganing magin kapakipakinabang an mga pagtiripon—pag-andam, pakikikabtang, asin pag-aplikar. An marahay na pag-andam ginigibong pasil asin maogma an pakikikabtang. An entusiastikong mga kapahayagan nin pagtubod nakamomotibar sa mga naghihinanyog. (Efe. 4:29) An gabos na yaon mas posibleng gamiton an iinaatubang kun sinda matatabangan na masabotan kun paano ikaaaplikar an impormasyon sa saindang buhay asin sa pagtabang sa iba na magin mga disipulo.
PAG-ADAL SA TORRENGBANTAYAN ASIN SA LIBRO KAN KONGREGASYON
2 An mga pagtiripon na ini napakahalaga ta paagi kaiyan pinakakakan kan “maimbod asin madonong na oripon” an pamilya sa pagtubod. (Mat. 24:45-47) Nagtatagama daw kamo nin panahon na pag-adalan an materyales na pag-oolayan? Andam daw kamong magkomento sa mga pagtiripon?
3 Kun maingat nindong pinag-adalan an materyal, magigin andam kamong makikabtang sa orog na dakulang kaogmahan sa pagtatao. (Gibo 20:35) Dakol an naheling na nakatatabang na linyahan sa ibaba an pangenot na mga tataramon. Paagi sa pagbasa sa mga tekstong dai kinotar asin paghorophorop kun paano ini minaaplikar, magkakaigwa kamo nin pakasabot sa Makakasuratan na basihan kan simbag. Kaya na daw nindong sumimbag sa sadiri nindong mga tataramon, o kaipuhan daw na basahon nindo an simbag? An pangenot na mga katuyohan sa teokratikong pag-adal ikasapuso an impormasyon asin humiro oyon dian na may odok na pagpapahalaga.—Tal. 2:5; 4:7, 8.
TEOKRATIKONG PAADALAN SA PAGMIMINISTRO ASIN PAGTIRIPON SA PAGLILINGKOD
4 Ibinibilang daw nindo an mga pahayag nindo sa estudyante na asignasyon hale ki Jehova asin ipinaririsa ini sa saindong pag-andam? Alagad dawa kun mayo kamo nin espisipikong asignasyon, mag-adal paagi sa pagbasa sa nakaiskedyul na mga kapitulo sa Biblia asin iba pang materyal kada semana. Iyo man iyan an dapat na gibohon para sa Pagtiripon sa Paglilingkod. Kun ini ginibo nin patienot, sa oras kan pagtiripon aktibo nindong mahohorophorop an sinasabi, imbes na naghihingoang aramon pa sana an materyal.
5 An mga demonstrasyon asin eksena kan pahayag maninigong realistiko, na nagpapaheling nin lokal na mga situwasyon. Ensayohon na marhay an saindong kabtang. Saro pa, maggubing nin angay bilang marahay na halimbawa sa iba.
6 Mga magurang, tabangan an saindong mga aki na mag-andam asin sumimbag sa sadiri nindang tataramon kun may oportunidad. An totoo, kun an gabos maghihingoa na umabot nin nasa oras asin andam na makikabtang, an satong pagtiripon talagang makakaapod sa atension kan mga nagdadangog. Gigibohon daw nindo an saindong kabtang sa bagay na ini tanganing “an gabos mangyari para sa pagpakosog” sa iba na katiripon nindo?—1 Cor. 14:26.