Mga Instruksion Para sa mga Igwa nin Kabtang sa Pagtiripon sa Paglilingkod
Poon sa isyung ini kan An Satong Ministeryo sa Kahadean, gigibohon na simple an pagkagibo kan iskedyul sa Pagtiripon sa Paglilingkod. An minasunod na mga instruksion asin pagirumdom may pinakabagong impormasyon asin lilinawon an sinabi sa artikulong “Kun Paano Mag-aandam Para sa Pagtiripon sa Paglilingkod,” na yaon sa An Satong Ministeryo sa Kahadean na Mayo 2009.
◼ Pahayag: Nanonongod ini sa pahayag na basado sa iinasignar na materyal na mayo nin partisipasyon an mga nagdadangog. An ispiker maninigong magkonsentrar sa kun ano an pinakamakakatabang sa kongregasyon.
◼ Hapot-Simbagan: An kabtang na ini kaparehong marhay kan Pag-adal sa Torrengbantayan, na may halipot na marhay na introduksion asin kongklusyon, asin babasahon an mga hapot para sa kada parapo. Maninigong likayan kan namamayo na magkomento nin kadakol-dakol. Puedeng basahon an importanteng marhay na mga teksto kun itinotogot nin oras. Dai babasahon an mga parapo apuera sana kun may instruksion na basahon iyan.
◼ Pagtokar: Ini sarong pahayag na may dikit na partisipasyon an mga nagdadangog. Bako ining deretsong pahayag sana, asin bako man ining enterong hapot-simbagan.
◼ Mga Demonstrasyon Asin Interbio: An instruksion na idemonstrar nangangahulogan na an tugang na inasignaran kan kabtang may paninimbagan na iiba an sarong demonstrasyon; dai man kaipuhan na sia mismo an magdemonstrar. An mga pipilion niang mademonstrar maninigong may kakayahan asin arogan, saka maninigo siang patienot na gumibo nin areglo sa sainda kun posible. Marahay na dai pagkuanon an mga parahayag na bagohan asin mayo pang eksperyensia na magdemonstrar kun paano isasagibo an gibohon tangani sanang matawan sinda nin oportunidad na magkaigwa nin kabtang sa plataporma, alagad an nagkapira sa sainda puedeng gamiton na kagharong. An mga parahayag na nagdedemonstrar maninigong nakaatubang sa mga nagdadangog. An mga kukuanon sa interbio dapat na magtao kan saindang komento sa plataporma imbes na sa tukawan ninda. An mga demonstrasyon asin interbio maninigong praktison. Kun an pagtiripon nag-oobertaym na kaya dapat nang pahalipoton kan tugang an kabtang nia, dai nia hahaleon an mga demonstrasyon o interbio. An ministeryal na mga lingkod maninigong maghapot sa parakoordinar kan grupo nin kamagurangan o ibang magurang sa kongregasyon bago magpili nin mga partisipante.
Kun may espesyal na mga instruksion an sarong napapalaen na kabtang, maninigong maingat na sunodon an mga ini. Kun an mga kabtang sa Pagtiripon sa Paglilingkod gigibohon segun sa sinasabi sa enotan, an mga tugang na lalaki makakatabang na “mangyari sa disente asin aregladong paagi” an mga Pagtiripon sa Paglilingkod.—1 Cor. 14:40.