Hapot

◼ Paano niato seseguradohon na nasa oras an mga pagtiripon kan kongregasyon?

Marikason an oras kun kita may isinasaysay na nakaoogmang bagay sa mga katood. Sa dahelan na ini, puedeng magin angat an paggibo kan mga kabtang sa pagtiripon na nasa itinalaan na oras. Ano daw an makakatabang?

Pumoon na nasa oras. Kun nagtitiripon an bilog na kongregasyon, puedeng makatabang na imbitaran an mga magdadangog na tumukaw na saro o duwang minuto bago pa pumoon tanganing makapoon an pagtiripon sa designadong oras sa aregladong paagi. (Ecl. 3:1) An mga pagtiripon na kalabot an mas saradit na grupo, siring baga kan mga pagtiripon bago lumuwas sa paglilingkod sa langtad, maninigong dai maatraso sa paghalat sa mga tibaad umabot nin huri.

Maingat na mag-andam. An sarong paagi sa pagigin nasa oras iyo an patienot na pag-andam. Malinaw na isaisip an obheto kan asignasyon. Aramon an prinsipal na mga punto, asin idoon ini. Likayan na malingling sa saradit na detalye. Pagdanayon na simple an pag-atubang. Kun an kabtang may kaibang mga demonstrasyon o interbio, ensayohon iyan antes pa. Sagkod sa mapupuede, orasan an kabtang nindo mantang pinapraktis nindo iyan nin makosog.

Bangabangaon an materyales nindo. Baga man an asignasyon nindo sarong pahayag o pakikipag-olay sa mga nagdadangog, puedeng manompongan nindong nakakatabang na bangabangaon an materyales sa mga kabtang. Magdesisyon kun gurano kadakol na oras an gagamiton sa kada kabtang, asin isurat ini sa pagirilid kan saindong nota. Dangan subaybayan an oras nindo durante kan pag-atubang. Sa pakikipag-olay sa mga nagdadangog, likayan an natatagong peligro na akoon an kadakol na komento sa enot na kabtang kaya kaipuhan na nindong maghidale sa mas importanteng pag-aadalan na yaon sa huri. An mga namamayo sa Pag-adal sa Torrengbantayan maninigong magtao nin supisyenteng oras tangani na pag-olayan an kahon sa repaso sa katapusan. Maninigo man sindang mag-ingat na dai gamiton an oras na itinalaan para sa pantapos na awit asin pamibi.

Magtapos na nasa oras. Kun an sarong pagtiripon may nagkapirang kabtang, arog baga kan Pagtiripon sa Paglilingkod, an lambang ispiker maninigong nakakaaram kun noarin poponan asin tataposon an saiyang kabtang. Ano an puedeng gibohon kun garo baga maobertaim na an pagtiripon? An saro o labi pa sa mga tugang na lalaki na mamamayo puedeng remedyohan an oras paagi sa pagkonsentrar sa prinsipal na mga punto asin paghale sa nagkapirang detalye na bakong gayong mahalaga. An abilidad na magibo ini sarong tanda nin ekspertong paratokdo.

Bilang mga nagdadangog, makakatabang kita sa tugang na namamayo paagi sa pagpapadanay kan satong mga komento na halipot asin direkta sa punto. Kun siring, kita gabos makakokontribwir sa mga pagtiripon na ginigibo “sa disente asin aregladong paagi.”​—1 Cor. 14:40.