Tama sa Oras, Proporsionado

MINSAN ngani maninigong tawan nin prinsipal na pagdodoon an kualidad kan saindong pagtotokdo, maninigo man na tawan nin atension an pagsasaoras kan saindong mga pahayag. An mga pagtiripon niato nakaiskedyul na pumoon asin matapos sa sinabing mga oras. An pakaotob kaini naghahagad kan pagkooperar kan gabos na may kabtang sa programa.

Kan mga panahon kan Biblia, iba man an punto de vista nin mga tawo sa buhay kisa punto de vista sa dakol na lugar ngonyan. An oras sinasabi kaidto sa tinatantsar sanang mga termino na arog kan “mga ikatolong oras” o “mga ikasampulong oras.” (Mat. 20:3-6; Juan 1:39) Bihira na may dahelan na mapurisaw manongod sa eksaktong pagsasaoras nin mga aktibidad sa aroaldaw. Sa nagkapirang parte kan kinaban ngonyan, arog man kaiyan an punto de vista sa oras.

Minsan siring, dawa ngani tibaad huli sa lokal na kostumbre o personal na gusto medyo bakong gayong estrikto sa oras an mga tawo, makikinabang kita sa pag-adal na tawan iyan nin angay na atension. Kun nagkapira an tinawan nin kabtang sa sarong programa, kaipuhan na konsideraron an oras na itinao sa balang kabtang. An prinsipyong “pabayaan na an gabos na bagay mangyari sa disente asin aregladong paagi” ikaaaplikar nanggad sa pagsasaoras kan mga asignasyon niato sa pagtiripon.​—1 Cor. 14:40.

Pagigin Tama sa Oras. Pag-andam an nagdedeterminar na bagay. Parate na an mga nagpapahayag na nadedepisilan sa pagsasaoras dai nakapag-andam nin igo. Tibaad sobra an pagkompiar ninda. O tibaad idinigson sana ninda an pag-andam sagkod na ultima ora na. An pagigin tama sa oras nagpopoon sa pag-apresyar sa saindong asignasyon asin pagigin andam na mag-andam nin toltol.

Pagbasa daw an asignasyon sa saindo? Enot, repasohon an Leksion 4 sagkod 7, na may labot sa pagigin suelto, pagpondo nguna, istres sa kahulogan, asin pagdodoon kan prinsipal na mga ideya. Dangan, iaplikar an hatol na iyan mantang binabasa nindo nin makosog an iinasignar sa saindo. Orasan an saindong sadiri. Kaipuhan daw na magbasa kamo nin mas marikas tangani na matapos sa laog kan itinaong oras? Rikasan sa mga parteng daing gayo importante, alagad padagos na gumamit nin pagpondo nguna asin mas maluway na rikas sa pagdoon nin importanteng mga ideya. Ensayohon nin paorootro. Mantang nag-ooswag an pagigin suelto nindo, mas magigin pasil na kontrolon an pagsasaoras nindo.

Magpapahayag daw kamo na an ginagamit mga nota? Dai kaipuhan na pakalabaan an saindong mga nota​​—na garo manuskrito na⁠—​tangani na maseguro an pagigin tama sa oras. Kan yaon kamo sa Leksion 25, may nanodan kamong mas marahay na paagi. Isaisip an limang puntong ini: (1) Mag-andam nin marahay na materyales, alagad bakong sobra man. (2) Linawon sa isip an prinsipal na mga ideya, alagad dai pagtuomon an bilog na mga sentence. (3) Markahan sa outline nindo kun guranong panahon an pinaplano nindong gamiton sa balang kabtang kan pahayag nindo o kun gurano nang panahon an maninigong nakalihis pag-abot nindo sa nagkapirang lugar. (4) Kun nag-aandam, estudyaran kun arin na mga detalye an puedeng haleon kun marisa nindo na nagsosobra na kamo sa oras. (5) Ensayohon an pagpahayag nindo.

Importante an pag-ensayo. Mantang kamo nag-eensayo, bantayan an pagsasaoras kan balang parte kan saindong pahayag. Ensayohon nin paorootro an saindong pahayag sagkod na tama na sa itinaong oras an bilog nindong pahayag. Dai paghingoahon na isuso an kadakol na materyales. Tawan nin pasobrang oras an saindong sadiri ta an pagtao kan saindong pahayag sa atubangan nin mga nagdadangog puedeng lumawig nin kadikit kisa kun solo sana kamong nag-eensayo.

Pagproporsionar kan mga Kabtang. An pagigin tama sa oras konektadong marhay sa tamang pagproporsionar kan mga kabtang nin sarong pahayag. An kadaklan na oras maninigong gamiton sa pagpahayag kan mayor na parte. Yaon dian an prinsipal na mga puntong itinotokdo. An introduksion maninigo na tama sana an lawig tangani na magibo an tolong obheto na tinokar sa Leksion 38. An mayor na parte dai maninigo na sobra kalawig kaya kulang na an oras para sa epektibong konklusyon, kaoyon kan Leksion 39.

An mga paghihingoa nindo na magin tama sa oras magbubunga nin mas marahay na pahayag asin mapaheling kan paggalang nindo sa iba na may mga kabtang sa programa saka sa bilog na kongregasyon.