Pagpaheling nin Interes sa Kaolay

KUN ipinaaabot sa iba an mga katotoohan sa Biblia, an kaipuhan niatong gibohon bako sanang impormaran an isip. Dapat na akiton niato an puso. An sarong paagi na magibo ini iyo an pagpaheling nin sinserong personal na interes sa mga naghihinanyog sa sato. An siring na interes ikapaheheling sa laen-laen na paagi.

Konsideraron an Punto de Vista kan mga Naghihinanyog sa Saindo. Kinonsiderar ni apostol Pablo an pinaghalean asin kaisipan kan mga naghihinanyog sa saiya. Ipinaliwanag nia: “Sa mga Judio ako nagin siring sa Judio, tanganing ako makadara nin mga Judio; sa mga sakop kan ley ako nagin siring sa sakop kan ley, minsan ngani ako mismo bakong sakop kan ley, tanganing ako makadara kan mga sakop kan ley. Sa mga dai nin ley ako nagin siring sa dai nin ley, minsan ngani ako bakong dai nin ley sa Dios kundi sakop kan ley ki Cristo, tanganing ako makadara kan mga dai nin ley. Sa maluya ako nagin maluya, tanganing madara ko an maluya. Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira. Alagad ta ginigibo ko an gabos na bagay para sa kapakanan kan maogmang bareta, tanganing ikapaabot ko iyan sa iba.” (1 Cor. 9:20-23) Paano kita magigin “gabos na bagay sa gabos na klase nin tawo” ngonyan?

Kun may oportunidad kamong obserbaran an iba, dawa madali sana, bago sinda kaolayon, tibaad may marisa kamong mga nagpaparisa kan saindang interes asin mga kamugtakan. Masasabi daw nindo kun ano an okupasyon ninda? May naheheling daw kamong ebidensia kan relihioso nindang mga paniniwala? May nagpaparisa daw kan kamugtakan kan saindang pamilya? Basado sa naoobserbaran nindo, ikakabagay daw nindo an saindong pag-atubang tangani na iyan magin mas nakaaakit sa mga naghihinanyog sa saindo?

An paggibo sa saindong pag-atubang na mas nakaaakit naghahagad na isipon nindo antes pa kun paano nindo dodolokon an mga tawo sa saindong teritoryo. Sa nagkapirang lugar, kaiba digdi an mga nagbalyo hale sa ibang nasyon. Kun may mga siring sa saindong teritoryo, may nakua na daw kamong epektibong paagi nin pagpatotoo sa sainda? Mantang kabotan nin Dios na “an gabos na klase nin tawo makaligtas asin makaabot sa tamang kaaraman sa katotoohan,” gibohon na obheto nindo na iatubang an mensahe kan Kahadean sa nakaaakit na paagi sa gabos na nanonompongan nindo.​—1 Tim. 2:4.

Atentong Maghinanyog. Minsan naaaraman ni Jehova an gabos, naghihinanyog sia sa iba. Si propeta Micaya nagkaigwa nin bisyon na dian naheling si Jehova na ineenkaminar an mga anghel na ipahayag an mga ideya ninda manongod sa pag-asikaso sa sarong bagay. Dangan tinogotan nin Dios an saro sa mga anghel na gibohon an isinuherir kan anghel na ini. (1 Ha. 22:19-22) Kan si Abraham magpahayag nin kapurisawan sa gigibohon na paghokom sa Sodoma, may kabootan na dinangog sia ni Jehova. (Gen. 18:23-33) Sa satong ministeryo, paano niato maaarog an halimbawa ni Jehova sa paghinanyog?

Enkaminaron an iba na ipahayag an nasa boot ninda. Maghapot nin angay, asin pumondo nguna nin igo tangani na makasimbag sinda. Maghinanyog talaga. An makonsiderasyon na atension nindo maenkaminar sa sainda na magtaram nin suelto. Kun an simbag ninda may ihinahayag manongod sa pinagkakainteresan ninda, mataktika na maghapot pa nin orog. Mantang dai man ginigibong garo pag-usisa an orolay, hingoahon na mas mamidbid sinda. Omawon sinda sa saindang mga nasa isip kun iyan magigibo nindo nin sinsero. Dawa kun dai kamo oyon sa saindang punto de vista, magin mataktika sa pagpasalamat sa saindang mga kapahayagan.​—Col. 4:6.

Minsan siring, kaipuhan na magmaan kita na an interes niato sa mga tawo dai lumihis sa kun ano an tama. An pagmalasakit sa iba dai nagtatao sa sato nin permiso na butingtingon an pribado nindang buhay. (1 Ped. 4:15) Kaipuhan na magmaan kita na dai mamisinterpretar nin sarong bakong kasekso an maboot na interes na ipinaheheling niato. Mantang nagkakalaenlaen sa iba-ibang nasyon an ibinibilang na angay na sokol nin interes sa iba, pati ngani sa iba-ibang tawo, kaipuhan an marahay na paghusgar.​—Luc. 6:31.

An pag-andam tabang sa pagigin matibay maghinanyog. Kun malinaw sa isip niato an satong mensahe, tinatabangan kita kaiyan na magrelaks asin magtao nin atension sa iba sa natural na paagi. Nagigin pamugtak digdi an boot ninda asin tibaad mas ganahan sindang makipag-olay sa sato.

Nagpapaheling kita nin onra sa iba paagi sa paghinanyog sa sainda. (Roma 12:10) Tanda iyan na pinahahalagahan niato an mga nasa isip asin saboot ninda. Tibaad ngani huli kaiyan mas mag-atento sinda sa satong sasabihon. Kun siring, tama sana na hinahatolan kita kan Tataramon nin Dios na “magin listo kun dapit sa pagdangog, maluway kun dapit sa pagtaram.”​—Sant. 1:19.

Tabangan an Iba na Umoswag. An pagmalasakit sa iba magpapangyari sa sato na pirmeng isipon an mga nagpaheling nin interes asin songkoon giraray sinda tanganing ipaabot an mga katotoohan sa Biblia na pinakadirektamenteng nakapagpapanigo sa mga pangangaipo ninda. Kun pinaplano an masunod na pagsongko, pensaron an naaraman nindo manongod sa sainda kaidtong nakaaging mga pagsongko. Mag-andam nin impormasyon manongod sa tema na dian interesado sinda. Tawan nin pagdodoon an praktikal na halaga kan materyales, na tinatabangan sindang masabotan kun paano sinda makikinabang sa saindang nanonodan.​—Isa. 48:17.

Kun an naghihinanyog sa saindo may ihayag na situwasyon o problema na nakapupurisaw sa saiya, ibilang ining espesyal na oportunidad na ikapaabot sa saiya an maogmang bareta. Arogon an halimbawa ni Jesus, na pirmeng andam na rangahon an mga nagsasakit. (Mar. 6:31-34) Labanan an sugot na tumao nin tolos-tolos na solusyon o hababaw na hatol. Tibaad huli kaini isaboot kan tawo na mayo kamo nin sinserong interes. Imbes, magpaheling nin pakikipagkapwa. (1 Ped. 3:8) Dangan magsiyasat sa mga publikasyon na basado sa Biblia, asin ipaabot an nakapakokosog na impormasyon tangani na matabangan an tawo na maatubang an saiyang situwasyon. Siempre, an mamomoton na pagmalasakit sa naghihinanyog sa saindo maolang sa saindo na ihayag an kompidensial na mga bagay na sinasabi nia sa saindo apuera sana kun may marahay na dahelan na gibohon iyan.​—Tal. 25:9.

Nangorogna kitang maninigo na magpaheling nin personal na interes sa mga inaadalan niato sa Biblia. Mapagngayongayong horophoropon an mga pangangaipo kan lambang estudyante, asin mag-andam para sa pag-adal na nasa isip an mga pangangaipong iyan. Ihapot sa sadiri, ‘Ano daw an kaipuhan na sunod niang gibohon tangani na padagos na umoswag sa espirituwal?’ Mamomoton na tabangan an estudyante na masabotan an sinasabi kan Biblia asin kan mga publikasyon kan “fiel asin may diskresion na oripon” manongod sa bagay na iyan. (Mat. 24:45) Sa nagkapirang kaso, tibaad bakong igo an pagtao sana nin eksplikasyon. Tibaad kaipuhan na tokdoan nindo an estudyante kun paano iaaplikar an sarong prinsipyo sa Biblia, na aktuwal na magkaibanan na ginigibo an sarong bagay na nagpapaheling kan pag-aplikar kaiyan.​—Juan 13:1-15.

Kaipuhan an pagigin timbang asin marahay na paghusgar kun nagtatabang sa iba na ioyon an saindang buhay sa mga pamantayan ni Jehova. Laen-laen an pinaghalean asin abilidad nin mga tawo, asin laen-laen an rikas kan saindang pag-oswag. Magin rasonable sa inaasahan nindo sa iba. (Fil. 4:5) Dai sinda pagpiriton na gumibo nin mga pagbago sa saindang buhay. Pabayaan na an Tataramon nin Dios asin an saiyang espiritu an magmotibar sa sainda. Gusto ni Jehova na an mga tawo maglingkod sa saiya nin gikan sa boot, bakong sa kapiritan. (Sal. 110:3) Likayan an pagpahayag kan sadiri nindong mga opinyon manongod sa personal na mga desisyon na inaatubang ninda, asin dawa kun hinahagad iyan sa saindo nin iba, magmaan na dai sinda ipagdesisyon.​—Gal. 6:5.

Tumao nin Praktikal na Tabang. Minsan ngani sa pangenot nagmamalasakit si Jesus sa espirituwal na ikararahay kan mga naghihinanyog sa saiya, mapagrisa man sia sa iba nindang pangangaipo. (Mat. 15:32) Dawa kun limitado an satong kabuhayan, kadakol kan praktikal na paagi na kita puedeng makatabang.

An interes sa iba mapahiro sa sato na magin makonsiderasyon. Halimbawa, kun an kamugtakan nin panahon dahelan nin kadepisilan para sa naghihinanyog sa saindo, bumalyo sa mas angay na lugar, o iareglo na ipadagos an orolay sa ibang panahon. Kun bakong kombenyente an oras kan saindong pagsongko, mag-opresir na bumalik paghaloyhaloy. Kun may helang o nasa ospital an sarong kataed o saro na nagpaheling nin interes, ipaheling an saindong pagmalasakit paagi sa pagpadara sa saiya nin kard o halipot na surat o paagi sa pagsongko sa saiya. Kun angay, puede man kamong mag-andam nin simpleng pagkakan o gumibo nin ibang kabootan.

Mantang nag-ooswag an mga inaadalan sa Biblia, tibaad makamate sinda nin emosyonal na kakulangan huli sa dai nang gayo pakikiiba sa dating mga kaibaiba. Amigohon sinda. Makipag-estoryahan sa sainda pagkatapos kan saindang pag-adal sa Biblia asin sa ibang panahon. Enkaminaron sinda na kultibaron an marahay na mga pakikiasosyar. (Tal. 13:20) Tabangan sindang umatender sa Kristianong mga pagtiripon. Taedan sinda sa siring na mga pagtiripon, asin tabangan sinda sa pag-asikaso kan saindang mga aki tangani na an gabos mas lubos na makinabang sa programa.

Magpaheling nin Interes Gikan sa Puso. An pagpaheling nin interes sa mga tawo bakong sarong teknika na dapat na mapolbos kundi sarong kualidad kan puso. An sokol kan satong interes sa iba risang-risa sa dakol na paagi. Naririsa iyan sa kun paano kita naghihinanyog asin sa kun ano an satong sinasabi. Ipinaririsa iyan kan kabootan asin konsiderasyon na ipinaheheling niato sa iba. Dawa kun mayo kita nin sinasabi o ginigibo, ihinahayag iyan kan satong aktitud asin kan satong panlauog. Kun talagang may pagmakolog kita sa iba, daing salto na maririsa ninda iyan.

An pinakaimportanteng dahelan sa pagpaheling nin sinserong interes sa iba iyo na sa paggibo kaiyan, inaarog niato an pagkamoot asin pagkaherak kan satong langitnon na Ama. Nakatatabang ini na maakit ki Jehova an mga naghihinanyog sa sato asin sa mensahe na itinao nia sa sato na ilakop. Huli kaini, mantang ipinaaabot nindo an maogmang bareta, pagmaigotan na magrisa “bakong sa personal na interes sa sadiri sana nindong mga bagay-bagay, kundi siring man sa personal na interes sa mga bagay-bagay kan iba.”​—Fil. 2:4.