“Papanigoan Ko an Pagal na Kalag”

1. Anong bendisyon sa bagong kinaban an partikularmenteng inaantisipar nindo?

“BAGONG kinaban.” Kun nadadangog nindo an mga tataramon na iyan, naiisip daw nindo an nagkapira sa ihinulang mga bendisyon na maheheling duman? Tibaad sangkap na hawak, dakol na masustansiang kakanon, magarong mga hayop, o sadiring istaran. Posibleng marhay na makakasabi kamo nin mga teksto sa Biblia na basehan nindo kan mga inaasahan na iyan. Minsan siring, dai paglingawan an bendisyon na ini—marahay na espirituwalidad asin emosyon. Kun mayo iyan, mawawara tolos an gabos na iba pang kagayagayahan.

2, 3. An mga isinurat ni Jeremias nakakatabang sa sato na asahan an anong espesyal na bendisyon?

² Kan ipahula nin Dios ki Jeremias an pagbalik kan mga Judio hale sa Babilonya, nasambitan Nia an mamamatean ninda: “Sasamnohan mo pa nin saimong mga pandereta an saimong sadiri asin talagang makikibayle ka sa mga nagngingisi.” (Basahon an Jeremias 30:18, 19; 31:4, 12-14.) May sinabi pa an Dios na puedeng makapahiro sa boot nindo: “Papanigoan ko an pagal na kalag, asin babasogon ko an gabos na kalag na nangluluya.” Ini an pagkatradusir kan NET Bible sa panuga nin Dios: “Lubos kong papanigoan an mga pangangaipo kan mga nakakapoy asin lubos kong papaginhawahon an kalag kan mga nadidismayo.”—Jer. 31:25.

³ Magayonon na paglaom! Sinabi ni Jehova na lubos niang papanigoan an pagal asin nangluluya an boot. Iyo, asin inootob nin Dios an ipinanuga nia. An mga isinurat ni Jeremias nagtataong kompiansa sa sato na kita papanigoan man. Dugang pa dian, an mga isinurat na iyan nakakatabang sa sato na masabotan kun paano kita mapaparigon asin magigin positibo dawa ngonyan. Apuera dian, ipinapaheling kaiyan an praktikal na mga paagi na puede niatong maparigon an iba, na tinatabangan sindang mapanigoan an pagal na kalag ninda.

4. Taano ta nasasabotan niato an namatean ni Jeremias?

⁴ Naranga si Jeremias kan panugang iyan, asin makakaranga man iyan sa sato. Taano? Girumdoma an sinambit sa Kapitulo 1 kan publikasyon na ini—na si Jeremias “sarong tawo na may mga saboot na arog kan sa sato,” arog man ni Elias. (Sant. 5:17) Isip-isipa an pira sanang dahelan kun taano ta, kun beses, si Jeremias tibaad pinangluyahan nin boot o medyo namondo pa ngani. Kasabay kaiyan, imahinara kun ano an mamamatean nindo kun kamo nasa arog man kaiyan na situwasyon asin kun taano ta tibaad pangluyahan kamo nin boot huli sa mga kamugtakan na napapaatubang sa saindo.—Roma 15:4.

5. Ano an posibleng ikinapangluya nin boot ni Jeremias?

⁵ An mga kahimanwa ni Jeremias an tibaad sarong dahelan kan saiyang pangluluya nin boot. Sia nagdakula sa Anatot. Iyan siudad nin mga Levita na pira sanang kilometro sa amihanan-sirangan nin Jerusalem. An propeta posibleng may mga kamidbid asin paryente sa Anatot. Sinabi ni Jesus na an sarong propeta dai tinatawan nin onra sa saiyang sadiring daga, asin totoo ini ki Jeremias. (Juan 4:44) An mga namamanwaan bako sanang dai interesado o daing galang ki Jeremias. Sa sarong pangyayari, sinabi nin Dios na an ‘mga lalaki sa Anatot hinahanap an kalag’ ni Jeremias, o gusto siang gadanon. Sinda may pagkontrang nagsabi: “Dai ka maghula sa ngaran ni Jehova, tanganing dai ka magadan sa samong kamot.” Grabe nanggad na huma iyan kan mga kataed asin posibleng mga paryente, na dapat kutanang kakampi nia!—Jer. 1:1; 11:21.

6. Kun kamo tinutumang nin mga katrabaho o nin iba pa, paano kamo makikinabang sa naeksperyensiahan ni Jeremias sa “mga lalaki sa Anatot”?

⁶ Kun ginigipit kamo nin mga kataed, kaeskuela, katrabaho, o pati nin nagkapirang kapamilya, maranga kamo kun paano trinatar ni Jehova si Jeremias. Kaidto, sinabi nin Dios na ‘itatao nia an saiyang atension’ sa mga taga Anatot na nagtutumang sa saiyang propeta. (Basahon an Jeremias 11:22, 23.) An pag-asegurar nin Dios siertong nakatabang ki Jeremias na malabanan an ano man na pangluluya nin boot huli sa pagtumang kan mga kahimanwa nia. Paghaloyhaloy, an atension nin Dios maresulta—asin talagang nagresulta—sa ‘kapahamakan kan mga lalaki sa Anatot.’ Kamo makakasierto man na minamasdan o tinatawan nin atension ni Jehova an mga nangyayari sa saindo. (Sal. 11:4; 66:7) An ‘pagdadanay’ nindo sa mga katokdoan kan Biblia asin paggibo kan tama puedeng makatabang pa sa nagkapirang nagtutumang na malikayan an kapahamakan na maabot kutana sa sainda.—1 Tim. 4:16.

MGA GIBO NA PUEDENG MAKAPANGLUYA NIN BOOT

7, 8. Anong klaseng pang-aabuso an tinios ni Jeremias, asin ano an nagin epekto kaiyan sa saiya?

⁷ Bako sanang berbal na panghuhuma an ginibo ki Jeremias kan mga kahimanwa nia. An sarong halimbawa iyo an ginibo kan midbid na lalaki sa Jerusalem, sarong saserdote na an ngaran Pasur.a Kan madangog nia an hula nin Dios, “hinampak ni Pasur si Jeremias na propeta asin ibinugtak sia sa pandog.” (Jer. 20:1, 2) Iyan tibaad bako sanang basta sampaling. May mga nagkongklusyon na si Jeremias ipinahampak ni Pasur nin sagkod sa 40 beses. (Deut. 25:3) Mantang si Jeremias nakokolgan sa pisikal, an mga tawo tibaad kinakantsawan sia asin nagkukurahaw nin pang-iinsulto, na linulutaban pa ngani sia. Bako sana iyan. Si Jeremias magdamlag na ipinabugtak ni Pasur sa “pandog.” An ginamit na termino sa Hebreo nagsusuherir na nagin kubado an saiyang hawak. Sa magdamlag, maringis asin puersahan nanggad na pinapagtios nin kolog si Jeremias, na posibleng pinandogan nin kahoy.

⁸ Ano an nagin epekto ki Jeremias kan siring na pagtratar? Sinabi nia sa Dios: “Pinagngingisihan ako sa bilog na aldaw.” (Jer. 20:3-7) Naisip pa ngani nia na pumondo nang magtaram para sa Dios. Minsan siring, aram nindo na iyan dai kayang gibohon asin dai ginibo ni Jeremias. Imbes, an mensahe nin Dios na iinasignar sa saiya na ipahayag nagin ‘siring sa naglalaad na kalayo na nalalaom sa mga tolang’ ni Jeremias, asin kaipuhan siang magtaram para ki Jehova.—Basahon an Jeremias 20:8, 9.

9. Taano ta nakakatabang sa sato na horophoropon an naeksperyensiahan ni Jeremias?

⁹ An pagkasaysay na iyan makakatabang sa sato kun grabe an pagtuya sa sato kan mga kamidbid niato, baga man mga paryente, kataed, katrabaho, o kaeskuela. Dai kita kaipuhan na magngalas kun an siring na pagtumang may beses na medyo nakakapangluya sa boot niato. Iyan puede man na mangyari kun kita pisikal na minamaltrato huling nagmamaigot kitang gibohon an tunay na pagsamba. An bakong sangkap na tawong si Jeremias naapektaran kan siring na mga bagay, asin bako daw na kita may pagmate man na arog kan sa saiya? Pero, dai niato dapat lingawan na sa tabang nin Dios, si Jeremias nagkaigwa giraray nin kagayagayahan asin kompiansa. Dai sia permanenteng pinangluyahan nin boot, asin kita dai man kaipuhan na permanenteng makamate nin siring kaiyan.—2 Cor. 4:16-18.

10. Paano kita tinatabangan kan Biblia na masabotan an pagbarobago kan emosyon ni Jeremias?

¹⁰ May beses na nagbarobago pa nganing gayo an emosyon ni Jeremias. Igwa man daw kamong linalabanan na arog kaiyan—tibaad pano kamo nin paglaom asin positibo dangan bigla na sana kamong nawawaran nin paglaom asin nagigin mamondo? Mapadapit sa naenot na pagmate, mangnoha an mga tataramon sa Jeremias 20:12, 13. (Basahon.) Pagkatapos kan ginibo ni Pasur sa saiya, si Jeremias naggayagaya huli sa pagigin siring sa saro sa mga dukha na ilinigtas “sa kamot kan mga paragibo nin maraot.” Kun beses, tibaad naggagayagaya man kamo, na gusto nindong mag-awit ki Jehova, pagkatapos na kamo garo baga ilinigtas o bilang reaksion nindo sa sarong maogmang pangyayari sa saindong buhay o Kristianong paglilingkod. Abaang siram kan pagmateng iyan!—Gibo 16:25, 26.

11. Kun kita may tendensiang magbarobago an emosyon, ano an maninigo niatong girumdomon manongod ki Jeremias?

¹¹ Pero, huling kita bakong sangkap, puedeng magbarobago an satong emosyon, arog ni Jeremias. Pagkatapos na magsabing “mag-awit kamo ki Jehova,” sia nakamate nin grabeng kawaran nin paglaom, na tibaad nagluluha. (Basahon an Jeremias 20:14-16.) Sia pinangluyahan na gayo nin boot kaya naisip nia kun ano pa an halaga kan pagkamundag nia! Kan sia mamondo, sinabi nia na an tawong nagpaisi kan saiyang pagkamundag dapat sumpaon kapareho kan Sodoma asin Gomorra. Alagad ini an mahalagang isyu: Padagos daw na nawaran nin paglaom si Jeremias? Sia daw suminuko, na nagpadaog na sana sa nagpapadagos na pangluluya nin boot? Dai. Imbes, siertong nagmaigot siang labanan an saiyang pangluluya nin boot, asin napangganahan nia iyan. Estudyare an sunod na isinaysay sa libro nin Jeremias. An saro pang Pasur, na prinsipe, nagdolok ki Jeremias na may darang hapot hale ki Hadeng Zedequias manongod sa mga Babilonyo na nagsasalikop sa Jerusalem. Naghiro si Jeremias, na may pagkapusoan na ipinahayag an paghokom ni Jehova asin an magigin resulta kaiyan. (Jer. 21:1-7) Malinaw nanggad, si Jeremias nagpadagos na aktibo bilang propeta!

12, 13. Ano an puede niatong gibohon tanganing malabanan an risang gayo na pagbarobago kan satong emosyon?

¹² May mga lingkod nin Dios ngonyan na nakakaeksperyensia nin pagbarobago nin emosyon. Ini posibleng may pisikal na dahelan—tibaad biglang paglangkaw o pagbaba nin hormone level o bakong balanseng biokemikal na mga proseso sa hawak—asin an sarong kualipikadong doktor tibaad magsuherir nin mga paagi na mainaan an siring na pagbarobago nin emosyon. (Luc. 5:31) Pero para sa kadaklan sa sato, bako man sobra o abnormal an kaogmahan o kamondoan na namamatean niato sa panapanahon. Posibleng marhay na an kadaklan na negatibong pagmate kabtang nin pagkabakong sangkap. Iyan tibaad resulta nin kapagalan o pagkagadan nin sarong namomotan. Kun siring kaiyan an satong situwasyon, puede niatong girumdomon na linabanan ni Jeremias an pagbarobago kan saiyang emosyon, pero sia nagdanay sa pabor nin Dios. Tanganing malabanan iyan, tibaad kaipuhan niatong liwaton an satong rutina tanganing magkaigwa nin dagdag na pahingalo. O tibaad kaipuhan niatong tawan nin panahon an satong sadiri tanganing maranga pagkatapos na magadanan asin magmondo nin grabe. Minsan siring, mahalaga man na danay kitang mag-atender sa Kristianong mga pagtiripon asin regular na makikabtang sa teokratikong mga aktibidad. Iyan mahalaga tanganing magdanay na timbang asin magayagaya sa paglilingkod sa Dios.—Mat. 5:3; Roma 12:10-12.

¹³ Baga man an saindong pangluluya nin boot bihira sanang mangyari o kabtang nin pagbarobago nin emosyon, makakatabang sa saindo an naeksperyensiahan ni Jeremias. Siring kan nasambit na, may beses na sia pinangluyahan nin boot. Minsan siring, dai nia tinogotan an pangluluya nin boot na irayo sia sa Dios na saiyang namomotan asin maimbod na pinaglilingkodan. Kan an marahay niang ginibo balosan nin maraot kan saiyang mga kalaban, sia naghagad nin tabang ki Jehova asin nagtiwala sa saiya. (Jer. 18:19, 20, 23) Magin determinado na arogon si Jeremias.—Lam. 3:55-57.

MAPAPAGINHAWA DAW NINDO AN PAGAL NA MGA KALAG?

14. Paano si Jeremias partikularmenteng nag-ako nin pagparigon sa boot?

¹⁴ Marahay na mangnohon niato kun paano si Jeremias naparigon asin kun paano nia pinarigon an ibang ‘pagal na mga kalag.’ (Jer. 31:25) An propeta partikularmenteng nag-ako nin pagparigon sa boot gikan ki Jehova. Isip-isipa kun paano kamo siertong mapaparigon kun nadangog nindo si Jehova na nagsasabi sa saindo: “Kun para sa sako, uya ginibo taka ngonyan na magin siudad na nakukutaan . . . Sierto na sinda makikilaban sa saimo, alagad dai sinda manggagana sa saimo, huling ‘ako kaibanan mo,’ an sabi ni Jehova, ‘tanganing iligtas ka.’” (Jer. 1:18, 19) May marahay na dahelan na inapod ni Jeremias si Jehova na “sakong kosog asin sakong kuta, asin sakong lugar na madudulagan sa aldaw nin kasakitan.”—Jer. 16:19.

15, 16. An paagi nin pagparigon ni Jehova ki Jeremias nagtatao nin anong ideya sa kun ano an puede nindong gibohon tanganing maparigon an iba?

¹⁵ Mahalagang mangnohon na sinabi ni Jehova ki Jeremias: “Ako kaibanan mo.” May makukua daw kamong ideya dian kun ano an puede nindong gibohon kun may midbid kamo na nangangaipo nin pagparigon? Marahay man na maisip niato na an sarong Kristianong tugang o tibaad paryente nangangaipo kaiyan, pero mas marahay na humiro tanganing tumabang sa epektibong paagi. Sa dakol na kamugtakan, an pinakaepektibong paagi iyo na arogon an ginibo nin Dios ki Jeremias—makidumamay sa nasasakitan. Dangan magtaram kamo nin mga pamparigon sa boot, alagad bakong kadakol na tataramon. Posibleng marhay na orog na makakatabang an mas dikit na tataramon kun iyan pinili tanganing mag-asegurar asin magpakosog. Dai man kaipuhan na kamo matibay magtaram. Gumamit nin simpleng mga tataramon na nagpapaheling nin interes, pagmakolog, asin Kristianong kapadangatan. Dakula an magigibo kan arog kaiyan na mga tataramon.—Basahon an Talinhaga 25:11.

¹⁶ Si Jeremias nakiolay: “O Jehova, girumdoma ako asin tawan mo ako nin atension.” Dangan ano an nangyari? An propeta nagsaysay: “Nakua an saimong mga tataramon, asin kinakan ko iyan; asin an saimong tataramon nagin para sa sako labi-labing kaogmahan asin kagayagayahan kan sakong puso.” (Jer. 15:15, 16) An saro na gusto nindong parigonon tibaad nangangaipo man nin kaparehong maboot na atension. Totoo, an saindong mga tataramon dai makakapareho kan ki Jehova. Pero, puede nindong iiba sa saindong sinasabi an nagkapira sa mga tataramon nin Dios. An siring na sinsero, odok sa puso, asin basado sa Biblia na mga tataramon tunay na makakapagayagaya sa puso kan pinangluluyahan nin boot.—Basahon an Jeremias 17:7, 8.

17. Anong mahalagang leksion an manonodan niato sa ginibo ni Jeremias ki Zedequias asin Johanan?

¹⁷ Mangnohon na apuera sa pag-ako ni Jeremias nin pagparigon gikan sa Dios, pinarigon man nia an iba. Paano? Sarong beses, sinabi ni Hadeng Zedequias ki Jeremias na sia takot sa mga Judio na nakipag-alyansa sa mga Babilonyo. An propeta nagsabi nin nakakaparigon na mga tataramon, na sinadol an hade na kuyogon si Jehova tanganing magin marahay an resulta. (Jer. 38:19, 20) Pagkabagsak kan Jerusalem asin pira na sanang Judio an natada dian, naisip kan saindang hepe sa militar na si Johanan na darahon sinda sa Egipto. Alagad sia naghapot nguna ki Jeremias. An propeta naghinanyog sa mga sinabi ni Johanan dangan namibi ki Jehova. Pagkatapos, ipinahayag nia an nakakaparigon na simbag ni Jehova, na sinasabi na marahay an ibubunga kan pagsunod sa instruksion nin Dios na dai maghale sa saindang daga. (Jer. 42:1-12) Sa duwang pangyayaring iyan, si Jeremias naghinanyog bago magtaram. An paghinanyog kaipuhan tanganing maparigon an iba. Pabayaan an nasasakitan na magpahayag kan saiyang saboot. Hinanyogon an saiyang mga ikinakahadit asin ikinakatakot. Kun angay, magsabi nin mga bagay na nakakaparigon. Dai man ipapasabong sa saindo nin Dios an sasabihon sa nangangaipo nin pagparigon, pero puede nindong iiba an positibong mga punto gikan sa Tataramon nin Dios, mga punto na nakasentro sa mga panuga sa ngapit.—Jer. 31:7-14.

18, 19. Anong halimbawa nin pagparigon sa iba an maheheling sa pagkasaysay manongod sa mga Recabita asin ki Ebed-melec?

¹⁸ Dai inako ni Zedequias asin Johanan an nakakaparigon na sadol ni Jeremias, asin an nagkapira ngonyan tibaad garo baga dai man naghihimate sa saindo. Dai pagtogotan na makapangluya iyan sa saindong boot. An iba talagang naghimate sa pagparigon sa sainda ni Jeremias, asin posibleng marhay na dakol man an mahimate sa saindo. Isip-isipa an mga Recabita, sarong grupo nin mga Quenita na katood kan mga Judio sa laog nin dakol na taon. Kabilang sa mga pagboot kan saindang apoon na si Jonadab iyo na bilang mga nakikihimanwa, dai sinda dapat mag-inom nin arak. Kan nagsasalakay an mga Babilonyo, dinara ni Jeremias an mga Recabita sa sarong kuartong kakanan sa templo. Sa instruksion nin Dios, pinuestohan sinda ni Jeremias nin arak. Huli sa paggalang sa saindang apoon asin kabaliktaran sa pagsuway kan mga Israelita, an mga Recabita makinuyog asin habong mag-inom nin arak. (Jer. 35:3-10) Ipinaabot ni Jeremias sa sainda an komendasyon gikan ki Jehova asin an Saiyang panuga para sa saindang ngapit. (Basahon an Jeremias 35:14, 17-19.) Puede nindong arogon iyan kun nagtatao kamo nin pagparigon: Sinserong magtao nin komendasyon sa iba kun posible.

¹⁹ Ginibo man iyan ni Jeremias ki Ebed-melec, sarong Etiope na minalataw na opisyal sa palasyo ni Hadeng Zedequias. An mga prinsipe nin Juda daing katanosan na ihinulog si Jeremias sa malaboy na bubon asin binayaan duman tanganing magadan. Si Ebed-melec nakiolay ki Hadeng Zedequias, na nag-autorisar sa saiya na iligtas an propeta. Ginibo iyan kan tawong ini na taga ibang nasyon, minsan ngani mapapaatubang sia sa posibleng madahas na pagtumang. (Jer. 38:7-13) Huling posibleng marhay na ruminayo ki Ebed-melec an boot kan mga prinsipeng iyan kan Juda, tibaad ikinahandal nia an saiyang magigin ngapit. Si Jeremias dai nagdanay na silensio, na naglalaom na sanang makakayanan iyan ni Ebed-melec. Sinabi nia an nakakaparigon na mga bendisyon nin Dios sa ngapit para ki Ebed-melec.—Jer. 39:15-18.

20. Ano an maninigo niatong booton na gibohon para sa satong mga tugang, hoben man o gurang?

²⁰ Tunay nanggad, mantang binabasa niato an libro nin Jeremias, makakakua kita nin marahayon na mga halimbawa kun paano niato personal na magigibo an sadol ni apostol Pablo na dapat gibohon kan mga tugang niato sa Tesalonica: “Padagos nindong rangahon asin pakosogon an lambang saro . . . Mapasaindo an dai na kutana maninigong kabootan kan satong Kagurangnan na Jesu-Cristo.”—1 Tes. 5:11, 28.