Taano ta Tinotogotan nin Dios an Karatan Asin Kasakitan?

1. Paano nagpoon an karatan?

Nagpoon iyan digdi sa daga kan sabihon ni Satanas an enot na kaputikan. Sa kapinonan, sia perpektong anghel alagad ‘dai nanindogan sa katotoohan.’ (Juan 8:44) Pinatalubo nia an pagmawot na sambahon, na solamenteng para sa Dios. Nagputik sia sa enot na babaeng si Eva, asin inengganyar nia ini na sia an sunodon imbes na an Dios. Si Adan uminiba ki Eva sa pagsuway sa Dios. An desisyon ni Adan nagresulta sa kasakitan asin kagadanan.​—Basahon an Genesis 3:1-6, 19.

Kan isuherir ni Satanas na sumuway si Eva sa Dios, pinonan kan Diablo an pagrebelde sa soberaniya ni Jehova, o sa katongdan Nia bilang Kaharohalangkawe. An mayoriya sa katawohan uminiba ki Satanas sa pagsikwal sa Dios bilang Tagapamahala ninda. Huli kaini, si Satanas nagin an tagapamahala o “poon nin kinaban.”​—Basahon an Juan 14:30; 1 Juan 5:19.

2. May depekto daw an mga linalang nin Dios?

Perpekto an gabos na ginibo nin Dios. An mga tawo asin anghel na linalang nia may kakayahan na lubos na magkuyog sa saiya. (Deuteronomio 32:4, 5) Linalang nia kita na may libertad na magdesisyon kun baga magibo nin marahay o maraot. Huli sa libertad na iyan, may oportunidad kitang ipahayag an pagkamoot sa saiya.​—Basahon an Santiago 1:13-15; 1 Juan 5:3.

3. Taano ta tinotogotan nin Dios an kasakitan sagkod ngonyan?

Sa laog nin limitadong panahon, tinotogotan ni Jehova an pagrebelde sa saiyang soberaniya. Taano? Tanganing ipahiling na an gabos na klase nin pamamahala na suway sa saiya dai matao nin pakinabang sa tawo. (Parahulit 7:29; 8:9) Pakalihis nin 6,000 na taon kan kasaysayan nin tawo, malinaw an ebidensia. Dai nahale nin mga tawong namamahala an giera, krimen, inhustisya, o helang.​—Basahon an Jeremias 10:23; Roma 9:17.

Kabaliktaran kan pamamahala nin tawo, an pamamahala nin Dios kapakipakinabang sa mga nag-aako kaiyan. (Isaias 48:17, 18) Dai mahahaloy, tataposon na ni Jehova an gabos na gobyerno nin tawo. An maistar sa daga iyo sana an mga gustong pamahalaan Nia.​—Isaias 11:9.​—Basahon an Daniel 2:44.

Hilingon an video na Taano ta Tinutugutan nin Diyos an Pagsakit?

4. Igwa kita nin anong oportunidad huli sa pagpapasensia nin Dios?

Sinabi ni Satanas na naglilingkod sana ki Jehova an mga tawo huli sa makasadiring dahelan. Gusto mo daw na pahimutikan iyan? Kaya mo iyan! Huli sa pagpapasensia nin Dios, kita gabos may oportunidad na ipahiling kun baga nasa lado kita kan pamamahala nin Dios o nin tawo. Ipinapahiling niato ini paagi sa satong pamumuhay.​—Basahon an Job 1:8-12; Talinhaga 27:11.

5. Paano niato ikakapahiling na gusto tang magin Tagapamahala an Dios?

Iyan paagi sa paghanap asin paggibo kan tunay na pagsamba basado sa Tataramon nin Dios, an Biblia. (Juan 4:23) Ikakasikwal niato si Satanas bilang namamahala paagi sa dai pakikilabot sa politika asin giera, arog ni Jesus.​—Basahon an Juan 17:14.

Ginagamit ni Satanas an kapangyarihan nia sa pagpalakop nin imoral asin nakakaraot na mga gibo. Kun sasayumahan niato iyan, tibaad may mga katood asin paryente na mag-olog-olog o magkontra sa sato. (1 Pedro 4:3, 4) Kaya, dapat kitang pumili. Makikiiba daw kita sa mga namomoot sa Dios? Kukuyogon daw niato an madonong asin mamomoton na mga ley nia? Kun iyo, pinapatunayan tang nagputik si Satanas kan sabihon niang mayo nin makuyog sa Dios kun nasa kagipitan.​—Basahon an 1 Corinto 6:9, 10; 15:33.

An pagkamoot nin Dios sa katawohan garantiya na matatapos an karatan asin kasakitan. An mga nagpapahiling nin pagtubod dian mabubuhay sa daga sagkod lamang.​—Basahon an Juan 3:16.