Ano an Maogmang Bareta Dapit sa Relihion?

1. Marahay daw an gabos na relihion?

May sinserong mga tawo sa gabos na relihion. Sarong marahay na bareta na nahihiling asin nagmamakolog sa sainda an Dios. Alagad makamomondo na an relihion ginagamit para sa maraot na mga katuyohan. (2 Corinto 4:3, 4; 11:13-15) Segun sa mga bareta, may mga relihion na kalabot pa ngani sa terorismo, pagpoho nin rasa, giera, asin pag-abuso sa aki. Makamomondo nanggad ini para sa sinserong mga nagtutubod sa Dios!​—Basahon an Mateo 24:3-5, 11, 12.

An tunay na relihion nagpapamuraway sa Dios, pero an falsong relihion nakakapaanggot sa saiya. Nagtotokdo iyan nin mga ideyang mayo sa Biblia, kaiba na an falsong mga katokdoan dapit sa Dios asin sa mga gadan. Alagad, gusto ni Jehova na maaraman nin mga tawo an katotoohan dapit sa saiya.​—Basahon an Ezequiel 18:4; 1 Timoteo 2:3-5.

2. Ano an maogmang bareta dapit sa relihion?

Marahay sana ta an Dios dai nadadaya nin mga relihion na naghihingakong namomotan sia, alagad an talagang namomotan iyo an kinaban ni Satanas. (Santiago 4:4) Inaapod kan Tataramon nin Dios an gabos na falsong relihion bilang ‘Dakulang Babilonya.’ An Babilonya iyo an suanoy na siudad na ginikanan nin falsong relihion pagkatapos kan Baha kan panahon ni Noe. Dai na mahahaloy, biglang tataposon nin Dios an relihion na nandadaya asin nang-aapi sa katawohan.​—Basahon an Kapahayagan 17:1, 2, 5, 16, 17; 18:8.

May maogma pang bareta. Dai nalilingawan ni Jehova an sinserong mga tawo na nasa falsong mga relihion sa bilog na kinaban. Pinagsasararo nia sinda paagi sa pagtokdo sa sainda kan katotoohan.​—Basahon an Miqueas 4:2, 5.

3. Ano an maninigong gibohon nin sinserong mga tawo?

May pagmakolog si Jehova sa mga mamomoton sa kun ano an totoo asin marahay. Dinadagka nia sinda na bayaan an falsong relihion. An mga namomoot sa Dios andam na gumibo nin pagbabago tanganing mapaogma sia.​—Basahon an Kapahayagan 18:4.

Kan enot na siglo, kan madangog nin sinserong mga tawo an maogmang bareta hale sa mga apostol, huminiro sinda na may kagayagayahan. Nanodan ninda ki Jehova an bagong klase nin pamumuhay na mas maogma huli ta iyan may katuyohan asin paglaom. Sinda marahay na halimbawa para sa sato ngonyan huling hinimate ninda an maogmang bareta paagi sa pag-enot ki Jehova sa buhay ninda.​—Basahon an 1 Tesalonica 1:8, 9; 2:13.

An mga minabaya sa falsong relihion maogmang inaako ni Jehova sa saiyang pamilya nin mga parasamba. Kun aakoon mo an maogmang imbitasyon nia, makakamtan mo an pakikikatood nia, an bago asin mamomoton na pamilya nin mga kapwa nagsasamba sa saiya, asin an buhay na daing katapusan.​—Basahon an Marcos 10:29, 30; 2 Corinto 6:17, 18.

4. Paano papagayagayahon nin Dios an gabos na nasyon?

An nagdadangadang na paghokom sa falsong relihion sarong maogmang bareta. Papaginhawahon kaiyan sa pang-aapi an bilog na kinaban. An katawohan dai na noarin man madadaya asin magkakabaranga huli sa falsong relihion. An gabos na nabubuhay magkakasararo sa pagsamba sa solamenteng tunay na Dios.​—Basahon an Kapahayagan 18:20, 21; 21:3, 4.