May Marahay na mga Amigo si Josias

Sa paghuna mo, dipisil daw gibuhon kun ano an tama?— Iyan an iniisip kan dakul. Sinasabi kan Bibliya na talagang nadipisilan an sarong aki, na an pangaran Josias, na gibuhon an tama. Pero igwa siyang marahay na mga amigo na nagtabang saiya. Aramon ta an istorya ni Josias saka kan mga amigo niya.

An ama ni Josias iyo si Amon na hadi kan Juda. Marauton si Amon saka nagsasamba sa mga diyos-diyosan. Kan magadan si Amon, si Josias na an nagin hadi kan Juda. Pero walong taon pa sana siya! Sa hiling mo, maraot man daw siya arog kan saiyang ama?— Bako!

Dawa akion pa si Josias, gusto na niyang sunudon si Jehova. Kaya nakiamigo sana siya sa mga tawong padaba si Jehova. Tinabangan ninda si Josias na gibuhon kun ano an tama. Sairisay an pira sa mga amigo niya?

Saro sainda si Sofonias. Siya an propetang nagsabi sa mga taga Juda na maraot an mangyayari sainda pag nagsamba sinda sa mga diyos-diyosan. Nagdangog si Josias ki Sofonias. Si Jehova an pigsamba niya, bako an mga diyos-diyosan.

An saro pa sa mga amigo ni Josias iyo si Jeremias. Haros magkaedad sinda, saka magkarani an pig-iistaran ninda kan nagdadakula sinda. Mag-amigong maray sinda kaya kan magadan si Josias, nagsurat si Jeremias nin espesyal na kanta manungod sa grabeng pagkapungaw niya ki Josias. Nagtabangan sinda na gibuhon an tama saka sunudon si Jehova.

Ano an manunudan mo sa ginibo ni Josias?— Dawa akion pa si Josias, gusto na niyang gibuhon kun ano an tama. Aram niyang an dapat na mga amigo niya mga tawong padaba si Jehova. An dapat man na pilion mong mga amigo iyo idtong padaba si Jehova saka makakatabang saimo na gibuhon an tama!