Isinapuso ni Josias an Katugunan nin Diyos

Walong taon pa sana si Josias kan magin hadi siya kan Juda. Nagsasagibo kaidto nin mahika an mga tawo asin nagsasamba sa mga diyos-diyosan. Kan 16 anyos si Josias, hininguwa niyang aramon an tamang paagi nin pagsamba ki Jehova. Kan 20 anyos siya, pinunan niyang rauton an mga diyos-diyosan asin mga altar sa bilog na nasyon. Asin kan 26 na siya, ipinahirahay niya an templo ni Jehova.

Sa templo, nakua kan halangkaw na saserdoteng si Hilkias an rolyo kan Katugunan ni Jehova—posibleng an mismong rolyo na isinurat ni Moises. Dinara ini ki Josias kan saiyang sekretaryong si Safan asin binasa nin makusog. Kan dinadangog iyan ni Josias, napag-isip-isip niyang haluyon nang sinusuway kan mga tawo si Jehova. Sinabi ni Hading Josias ki Hilkias: ‘Anggutona sato si Jehova. Makipag-ulay ka saiya. Sasabihon sato ni Jehova an dapat tang gibuhon.’ Nagsimbag si Jehova paagi sa propetisang si Hulda: ‘Binayaan ako kan mga tawo sa Juda. Papadusahan sinda pero bako ngunyan na hadi pa si Josias, dahil nagpakumbaba siya.’

Kan maaraman ni Hading Josias an mensahe, nagduman siya sa templo, ipinaapod an mga taga Juda, dangan binasa niya sainda nin makusog an Katugunan ni Jehova. Nangako si Josias pati an mga sakop niya na bilog na puso sindang masunod ki Jehova.

Haluyon nang dai nagseselebrar nin Paskuwa an Juda. Pero kan mabasa ni Josias sa Katugunan na dapat iselebrar an Paskuwa taon-taon, sinabi niya sa gabos niyang sakop: ‘Magkakaigwa kita nin Paskuwa para ki Jehova.’ Kaya nagpahanda si Josias nin dakul na iaatang asin nagbilog nin sarong grupo nin mga parakanta sa templo. Dangan, isinelebrar kan nasyon an Paskuwa, na sinundan kan pitong aldaw na Kapiyestahan kan Tinapay na Daing Lebadura. Mayo pang arog kaiyan na Paskuwa puon kan panahon ni Samuel. Talagang isinapuso ni Josias an Katugunan nin Diyos. Nauugma ka daw na mag-adal manungod ki Jehova?