Dinadara kan mga Parahulit kan Kahadian sa Korte an Kaso Ninda

1, 2. (a) Kun dapit sa paghuhulit, sa ano nagin mapanggana an mga lider nin relihiyon, pero ano an ginibo kan mga apostol? (b) Taano ta dai kinuyog kan mga apostol an pagbabawal sa paghuhulit?

KATATAPOS pa sana kan Pentecostes 33 C.E. Pirang semana pa sana puon kan establisaron an Kristiyanong kongregasyon sa Jerusalem. Malinaw na nahiling ni Satanas na ini an tamang panahon para salakayon iyan. Bago dumakula asin kumusog an kongregasyon, gusto na niyang paraon iyan. Tulos-tulos na minaniobra ni Satanas an mga pangyayari para ipagbawal kan mga lider nin relihiyon an paghuhulit kan Kahadian. Minsan siring, makusog an buot na nagpadagos sa paghuhulit an mga apostol, asin dakul na lalaki saka babayi an ‘nagturubod sa Kagurangnan.’—Gui. 4:18, 33; 5:14.

² Huli sa kaanggutan, huminiro giraray an mga nagkokontra—ibinilanggo an gabos na apostol. Minsan siring, kan bangging idto, binuksan kan anghel ni Jehova an mga pinto kan bilangguan, asin kan mag-aagahon na naghulit giraray an mga apostol! Inaresto giraray sinda asin dinara sa mga namamahala, na nag-akusar sa mga apostol nin pagbalga sa dekreto na nagbabawal sa paghuhulit. Daing takot na nagsimbag sinda: ‘Kami kaipuhan na magkuyog nin urog sa Diyos kisa mga tawo.’ Grabe an kaanggutan kan mga namamahala kaya gusto nindang “gadanon” an mga apostol. Pero sa delikadong oras na idto, nagpatanid sa mga namamahala an iginagalang na marhay na paratukdo sa Ley na si Gamaliel: ‘Mag-ingat kamo. Dai kamo makilabot sa mga tawong ini, asin pabayai nindo sinda.’ Makangangalas ta sinunod kan mga namamahala an sadol niya asin pinalibre na an mga apostol. Ano an ginibo kan maimbod na mga lalaking idto? Huling dai natatakot, ‘dai sinda nag-untok sa pagtukdo, asin sa paghulit na si Jesus iyo an Cristo.’—Gui. 5:17-21, 27-42; Tal. 21:1, 30.

3, 4. (a) Anong epektibo asin haloy nang pamamaagi an ginagamit ni Satanas para salakayon an mga lingkod nin Diyos? (b) Ano an pag-uulayan ta sa kapitulong ini asin sa sunod na duwang kapitulo?

³ An kasong iyan sa korte kaidtong 33 C.E. iyo an inot na opisyal na pagkontra sa Kristiyanong kongregasyon, alagad bako nanggad iyan an ultimo. (Gui. 4:5-8; 16:20; 17:6, 7) Sa panahon ta, padagos pa man giraray na iniimpluwensiyahan ni Satanas an mga nagkokontra sa tunay na pagsamba para sutsutan an mga awtoridad na ipagbawal an satong paghuhulit. Lain-lain na akusasyon an ginagamit kan mga nagkokontra sa mga lingkod nin Diyos. An saro iyo na mga paraparibok daa kita ta nandidisturbo kita sa katuninungan kan publiko. An saro pa iyo na mga sedisyonista daa kita; asin mga paratinda o ahente daa kita. Sa tamang panahon, minaduman sa korte an mga tugang ta para patunayan na bakong totoo an siring na mga akusasyon. Ano an nagigin resulta kan mga kasong ini? Ano an epekto sa saimo ngunyan personalmente kan mga desisyon nin mga korte kan nakaaging mga dekada? Siyasaton ta an pirang kaso sa korte para maaraman kun paano iyan nakatabang “sa pagdepensa saka legal na pag-establisar kan maugmang bareta.”—Fil. 1:7, NW.

⁴ Pag-uulayan ta sa kapitulong ini kun paano niyato idinedepensa an satong deretso para magkaigwa nin libertad na maghulit. Sisiyasaton sa sunod na duwang kapitulo an nagkapirang kaso na ipinakipaglaban ta sa korte para magdanay na bakong kabtang kan kinaban asin mamuhay suno sa mga pamantayan kan Kahadian.

Mga Paraparibok—O Maimbod na mga Parasuportar kan Kahadian nin Diyos?

5. Kan huring kabtang kan dekada nin 1930, taano ta inarestar an mga parahulit kan Kahadian, asin ano an naisip na gibuhon kan mga nanginginot?

⁵ Kan huring kabtang kan dekada nin 1930, inobligar kan mga siyudad asin estado sa bilog na Estados Unidos nin Amerika an Mga Saksi ni Jehova na magkua nin legal na permit o lisensiya para makapaghulit. Pero dai iyan ginibo kan mga tugang ta. Huling puwedeng kanselaron an lisensiya, nagtutubod sinda na daing awtoridad an arin man na gobyerno na ulangon an pagbuot ni Jesus sa mga Kristiyano na ihulit an mensahe kan Kahadian. (Mar. 13:10) Bilang resulta, inarestar an ginatos na parahulit. Huli kaiyan, naisip kan mga nanginginot sa organisasyon na magduman sa korte. Gusto nindang patunayan na bakong suno sa ley an mga restriksiyon kan Estado sa deretso kan mga Saksi dapit sa libertad sa relihiyon. Asin kan 1938, may sarong pangyayari na nagresulta sa sarong importanteng kaso na nagserbing legal na basehan para sa masurunod na kaagid na kaso. Ano an nangyari?

6, 7. Ano an nangyari sa pamilyang Cantwell?

⁶ Kan Martes na aga, Abril 26, 1938, nagluwas para maghulit nin bilog na aldaw sa siyudad nin New Haven, Connecticut, an limang espesyal payunir—si Newton Cantwell, na 60 anyos asin an agom niyang si Esther, saka an mga aki ninda na si Henry, Russell, pati Jesse. Sa katunayan, preparado na sinda na dai makakauli sa laog nin labing sarong aldaw. Taano? Nagkapirang beses na sindang inarestar, kaya aram ninda na posibleng arestaron giraray sinda. Alagad, dai iyan nakapaluya sa pagmawot kan pamilyang Cantwell na maghulit. Nag-abot sinda sa New Haven sakay nin duwang awto. Si Newton an nagmaneho kan awto kan pamilya na kargado nin dakul na literatura asin portable na ponograpo, mantang an 22 anyos na si Henry an nagmaneho kan awtong may loudspeaker. Iyo, arog kan inaasahan, sinita sinda kan pulis pakalihis nin pira sanang oras.

⁷ Inot, inarestar an 18 anyos na si Russell, dangan si Newton asin si Esther. Mantang nasa harayo an 16 anyos na si Jesse, nahiling niyang inaarestar kan mga pulis an mga magurang asin tugang niya. Naghuhulit si Henry sa ibang parte kan banwaan, kaya nagsosolo na sana si Jesse. Kinua pa man giraray niya an saiyang ponograpo asin padagos na naghulit. Nagtugot an duwang Katolikong lalaki na patanugon niya an nakarekord na pahayag ni Brother Rutherford na may titulong “Mga Kaiwal.” Pero mantang nagdadangog sinda, naanggot nanggad sinda kaya gusto nindang kulgan si Jesse. Kalmado siyang ruminayo sa sainda, pero dai nahaloy, sinita siya nin sarong pulis. Kaya, inarestar man si Jesse. Dai kinasuhan kan mga pulis si Sister Cantwell, pero kinasuhan ninda si Brother Cantwell asin an mga aki. Minsan siring, pinaluwas sinda kan aldaw man sanang idto huling nagpiyansa sinda.

8. Taano ta nagdesisyon an korte na nagkasala si Jesse Cantwell nin pagigin paraparibok?

⁸ Pakalihis nin pirang bulan, kan Setyembre 1938, binista an pamilyang Cantwell sa korte sa New Haven. Sinentensiyahan si Newton, Russell, asin Jesse huli sa paghagad nin donasyon na daing permit. Sa ibong nin mga pag-apelar sa Korte Suprema kan Connecticut, nagdesisyon ini na nagkasala si Jesse nin pandidisturbo sa katuninungan—nin pagigin paraparibok. Taano? Huling an duwang Katolikong lalaki na nagdangog kan nakarekord na pahayag nagtestigo sa korte asin nagsabi na iyan nakakainsulto sa relihiyon ninda kaya naanggot sinda. Bilang pagkuwestiyon sa desisyon, an mga brother na may katungdan sa organisasyon nag-apelar sa Korte Suprema kan E.U.A.—an pinakahalangkaw na korte kan nasyon.

9, 10. (a) Ano an desisyon kan Korte Suprema kan E.U.A. sa kaso kan pamilyang Cantwell? (b) Paano kita nakikinabang sa desisyon na iyan sagkod ngunyan?

⁹ Puon Marso 29, 1940, dinangog ni Chief Justice Charles E. Hughes asin kan walong kairibang huwes an mga argumento na iprinesentar ni Brother Hayden Covington, sarong abogado kan Mga Saksi ni Jehova.a Kan ipresentar kan abogado kan estado nin Connecticut an mga argumento sa paghihinguwang patunayan na mga paraparibok an mga Saksi, naghapot an sarong mahistrado: “Bako daw na totoo na ikinakauyam an mensaheng ibinabalangibog ni Cristo Jesus kan panahon niya?” Nagsimbag an abogado: “Iyo, asin, kun tama an nagigirumduman ko sa sinasabi kan sakong Bibliya, sinabi man kaiyan kun ano an nangyari ki Jesus huli sa pagbalangibog kan mensaheng iyan.” May ihinahayag nanggad iyan! Dai tinutuyo na ikinumparar niya ki Jesus an mga Saksi asin ikinumparar niya an estado sa mga nagsentensiya sa Saiya. Kan Mayo 20, 1940, nagkasararo an Korte sa desisyon apabor sa mga Saksi.

¹⁰ Ano an kahalagahan kan desisyon kaiyan? Pinahiwas kaiyan an proteksiyon sa deretso na magkaigwa nin libertad sa relihiyon, kaya ibibilang na bakong suno sa ley pag an libertad sa relihiyon linimitaran nin arin man na gobyerno pederal, gobyerno nin estado, o lokal na gobyerno. Dugang pa, daing nahiling an Korte na may ginibo si Jesse na “nagsasapeligro sa katuninungan kan publiko.” Huli kaini, malinaw na pinatunayan kan desisyon na an Mga Saksi ni Jehova bakong paradisturbo sa katuninungan kan publiko. Saro nanggad iyan na importanteng kapangganahan sa korte para sa mga lingkod nin Diyos! Paano kita nakikinabang diyan sagkod ngunyan? Nagsabi an sarong abogadong Saksi: “Huling may deretso kitang magkaigwa nin libertad sa relihiyon, na daing kinakatakutan na bakong makatanusan na mga restriksiyon, bilang mga Saksi napapaabutan ta ngunyan nin mensahe nin paglaom an mga nasa komunidad kun sain kita nakaistar.”

Mga Sedisyonista—O mga Parabalangibog kan Katotoohan?

11. Anong kampanya an ginibo kan mga tugang ta sa Canada, asin taano?

¹¹ Kan dekada nin 1940, napaatubang sa maringis na pagkontra an Mga Saksi ni Jehova sa Canada. Huli kaini, kan 1946, tanganing ipaisi sa publiko an dai paggalang kan Estado sa deretso na magkaigwa nin libertad sa pagsamba, naggibo nin 16 na aldaw na kampanya an mga tugang ta duman para idistribwir an tract na may titulong Quebec’s Burning Hate for God and Christ and Freedom Is the Shame of All Canada. Detalyadong ibinuyagyag kan apat na pahinang tract na ini an mga rayot na sutsut kan klero, pagigin brutal kan mga pulis, asin an madahas na pagsururog laban sa mga tugang ta sa probinsiya nin Quebec. “Nagpapadagos an bakong suno sa ley na pag-arestar sa Mga Saksi ni Jehova,” an sabi kaiyan. “May mga 800 na kasong isinangat laban sa Mga Saksi ni Jehova sa Greater Montreal.”

12. (a) Ano an reaksiyon kan mga nagkokontra sa kampanya nin pagdistribwir nin tract? (b) Kinasuhan nin anong krimen an satong mga tugang? (Hilingon man an nota sa ibaba.)

¹² Huli sa tract, nagdeklarar nin “daing hirak na pakikigiyera” sa mga Saksi an Premier kan Quebec na si Maurice Duplessis, na kasapakat kan Romano Katolikong Cardinal na si Villeneuve. Nadoble tulos an 800 na isinangat na kaso, na uminabot sa 1,600. “Dakulon nang beses kaming inarestar nin pulis kaya dai mi na iyan mabilang,” an sabi nin sarong payunir na sister. An mga Saksi na nadakop na nagdidistribwir kan tract kinasuhan nin krimen na pagpublikar nin “libelong may sedisyon.”b

13. Sairisay an inot na binista sa kasong sedisyon, asin ano an desisyon kan korte?

¹³ Kan 1947, si Brother Aime Boucher asin an mga aki niyang si Gisele, 18 anyos, saka Lucille, 11 anyos, an inot na binista sa korte sa kasong sedisyon. Nagdistribwir sinda kan tract na Quebec’s Burning Hate harani sa tanuman ninda sa kabubuldan sa timog kan Siyudad nin Quebec, pero masakit paniwalaan na sinda mga paraparibok na dai nagsusunod sa ley. Mapakumbaba saka mabuot si Brother Boucher, na tuninong na inaasikaso an sadit niyang tanuman asin nagpapabanwaan kun minsan sakay nin karetela na guyod nin kabayo. Sa ibong kaiyan, natagalan kan pamilya niya an nagkapira sa mismong mga pag-abuso na sinambit sa tract. An huwes kan korte, na nauungis sa mga Saksi, nagsayumang mag-ako nin ebidensiya na nagpapatunay na daing sala an pamilyang Boucher. Imbes, inako niya an argumento kan prosekusyon na an tract nagpapalakop nin pagkaungis kaya siyertong may sala an pamilyang Boucher. Kaya sa simpleng pananaram, ini an pagmansay kan huwes: Sarong krimen an pagsabi nin katotoohan! Sinentensiyahan si Aime saka Gisele sa kasong libelo na may sedisyon, asin prineso nin duwang aldaw pati an aki pang si Lucille. Nag-apelar an mga tugang sa Korte Suprema kan Canada, an pinakahalangkaw na korte kan nasyon, na nag-uyon na dangugon an kaso.

14. Ano an ginibo kan mga tugang sa Quebec kan mga taon na may persekusyon?

¹⁴ Miyentras tanto, padagos na naghulit kan mensahe kan Kahadian an makusog an buot na mga tugang sa Quebec sa ibong nin dagos-dagos asin madahas na mga pag-atake—na parating nagkakaigwa nin pambihirang mga resulta. Sa laog nin apat na taon pagkatapos na punan an kampanya nin tract kan 1946, an 300 na Saksi sa Quebec nagin 1,000!c

15, 16. (a) Ano an desisyon kan Korte Suprema kan Canada sa kaso kan pamilyang Boucher? (b) Ano an epekto kan kapangganahan na ini sa satong mga tugang asin sa iba?

¹⁵ Kan Hunyo 1950, dinangog an kaso ni Aime Boucher kan bilog na Korte Suprema kan Canada, na kompuwesto nin siyam na mahistrado. Pakalihis nin anom na bulan, kan Disyembre 18, 1950, nagdesisyon an Korte apabor sa sato. Taano? Nagpaliwanag si Brother Glen How, sarong abogado kan mga Saksi, na nag-uyon an Korte sa argumento na iprinesentar kan depensa na para magin “sedisyon” kaipuhan na may pagsutsut na gumibo nin kadahasan o pagrebelde sa gobyerno. Pero, an tract “dai nin siring na mga pagsutsut, kaya iyan sarong suno sa ley na klase nin may libertad na pagpapahayag.” Sinabi pa ni Brother How: “Nahiling ko mismo kun paano pinangyari ni Jehova an kapangganahan.”d

¹⁶ Sarong lubos na kapangganahan nanggad para sa Kahadian nin Diyos an desisyon kan Korte Suprema. Hinali kaiyan an basehan kan gabos na iba pang 122 na pendiyenteng kasong libelo na may sedisyon laban sa mga Saksi sa Quebec. Dugang pa, an desisyon kan Korte nangangahulugan na an mga siyudadano kan Canada asin kan ibang nasyon na kaiba sa Commonwealth kan Britania may libertad nang ipahayag an opinyon ninda dapit sa paagi nin pamamahala kan gobyerno. Apuwera diyan, an kapangganahan na ini nangangahulugan nin pagkadaog kan Estado asin Iglesya kan Quebec kun dapit sa pag-atake ninda sa libertad kan Mga Saksi ni Jehova.e

Mga Paratinda—O Maigot na Parabareta kan Kahadian nin Diyos?

17. Paano hinihinguwa nin nagkapirang gobyerno na kontrulon an paghuhulit ta?

¹⁷ Arog kan inot na mga Kristiyano, an mga lingkod ni Jehova ngunyan dai ‘nagpapabakal kan tataramon nin Diyos.’ (Basahon an 2 Corinto 2:17.)f Pero, may mga gobyerno na naghihinguwang kontrulon an mga aktibidad ta sa ministeryo paagi sa mga ley na nagkokontrol sa komersiyo. Pag-ulayan ta an duwang kaso sa korte na diyan dinesisyunan an isyu kun baga an Mga Saksi ni Jehova mga paratinda o mga ministro.

18, 19. Paano hininguwa kan mga awtoridad sa Denmark na ulangon an paghuhulit?

¹⁸ Denmark. Kan Oktubre 1, 1932, pinunan na iimplementar an sarong ley na nagsasabing ilegal an pagpabakal nin imprentadong literatura kun daing lisensiya sa pagtinda. Minsan siring, dai nag-aplay an mga tugang ta para sa ano man na lisensiya. Kan sunod na aldaw, limang parahayag an naghulit sa Roskilde, sarong banwaan na mga 30 kilometros sa sulnupan kan Copenhagen, an kabisera. Pakalihis nin maghapon, nawawara an saro sa mga parahayag, si August Lehmann. Inarestar siya huli sa pagpabakal na daing lisensiya.

¹⁹ Kan Disyembre 19, 1932, nag-atubang sa korte si August Lehmann. Sinabi niya na nagdadalaw siya sa mga tawo para mag-alok nin literatura na basado sa Bibliya, pero pinahimutikan niya na nagtitinda siya. Inuyunan siya kan korte. Sinabi kaiyan: “An akusado . . . may kakayahan sa pinansiyal para suportaran an sadiri, asin dai [siya] nin ano man na pinansiyal na pakinabang ni may intensiyon man na magkaigwa kaiyan, imbes napipiyerde pa ngani siya huli sa mga aktibidad niya.” Sigun sa desisyon kan Korte apabor sa mga Saksi, an aktibidad ni Lehnman dai puwedeng “ibilang na negosyo.” Pero, determinado an mga kaiwal kan mga lingkod nin Diyos na ulangon an paghuhulit sa bilog na nasyon. (Isa. 10:1) Nag-apelar an piskal sagkod sa Korte Suprema kan nasyon. Ano an ginibo kan mga tugang ta?

20. Ano an desisyon kan Korte Suprema kan Denmark, asin ano an ginibo kan mga tugang ta huli kaiyan?

²⁰ Kan semana bago an pagdangog kan kaso sa Korte Suprema, urog pang naghulit an mga Saksi sa bilog na Denmark. Kan Martes, Oktubre 3, 1933, ilinuwas kan Korte Suprema an desisyon kaiyan. Nag-uyon iyan sa desisyon kan mas hababang korte na dai binayolar ni August Lehmann an ley. An desisyon na ini nangahulugan na padagos na makakapaghulit an mga Saksi. Para ipahayag kan mga tugang an pasasalamat ki Jehova sa pagpangyari na manggana sinda sa korte, urog pa sindang naghulit. Puon kaidto, nakakapaghulit na an mga tugang ta sa Denmark na dai inuulang kan gobyerno.

21, 22. Ano an desisyon kan Korte Suprema kan E.U.A. sa kaso ni Brother Murdock?

²¹ Estados Unidos. Kan Domingo, Pebrero 25, 1940, inarestar an payunir na si Robert Murdock, Jr., asin an pito pang Saksi mantang naghuhulit sa Jeannette, sarong siyudad harani sa Pittsburgh, sa estado nin Pennsylvania. Sinentensiyahan sinda huling dai sinda nagkua nin lisensiya sa pag-alok nin literatura. Kan mag-apelar sinda, nag-uyon an Korte Suprema kan E.U.A. na dangugon an kaso.

²² Kan Mayo 3, 1943, ilinuwas kan Korte Suprema an desisyon kaiyan bilang pagdepensa sa mga Saksi. Dai kaiyan inuyunan an kahagadan na magkua nin lisensiya huling ini pagsingil “nin bayad sa sarong deretso na itinutugot kan Federal Constitution.” Pinawaran nin saysay kan Korte an ordinansa kan siyudad huling iyan “paglimitar sa libertad sa pagdistribwir nin literatura asin pag-ulang sa libertad sa relihiyon.” Bilang pagpahayag kan opinyon kan mayoriya kan mga mahistrado sa Korte, sinabi kan Mahistradong si William O. Douglas na an gibuhon kan Mga Saksi ni Jehova “bako sanang paghuhulit; iyan bako sanang pagdistribwir nin relihiyosong literatura. Kumbinasyon iyan kan duwa.” Sinabi pa niya: “Iginagalang na marhay an klaseng ini nin relihiyosong aktibidad . . . arog kan pagsimba asin pagsermon sa mga pulpito.”

23. Taano ta mahalaga para sa sato ngunyan an mga kapangganahan sa korte kan 1943?

²³ An desisyon na ini kan Korte Suprema sarong mayor na kapangganahan kan mga lingkod nin Diyos. Pinatunayan kaiyan kun ano talaga kita—Kristiyanong mga ministro, bakong mga paratinda. Kan dai malilingawan na aldaw na iyan kan 1943, nanggana an Mga Saksi ni Jehova nin 12 sa 13 kaso sa Korte Suprema, kaiba na an kasong Murdock. An mga desisyon na ini nagin makusog na legal na basehan kan dai pa sana nahahaloy na mga kaso sa korte na diyan kinuwestiyon giraray kan mga nagkokontra an deretso ta na ihulit an mensahe kan Kahadian sa publiko asin harong-harong.

‘Kami Kaipuhan na Magkuyog nin Urog sa Diyos Kisa mga Tawo’

24. Ano an ginigibo ta pag ipinagbabawal kan gobyerno an satong paghuhulit?

²⁴ Bilang mga lingkod ni Jehova, inaapresyar tang marhay pag tinatawan kita kan mga gobyerno nin legal na deretso na maghulit kan mensahe kan Kahadian. Minsan siring, pag ipinagbabawal kan gobyerno an satong paghuhulit, liniliwat ta sana an mga pamamaagi para makapadagos sa ano man na paaging posible. Arog kan mga apostol, ‘kita kaipuhan na magkuyog nin urog sa Diyos kisa mga tawo.’ (Gui. 5:29; Mat. 28:19, 20) Kasabay kaiyan, nag-aapelar kita sa mga korte para halion an pagbabawal sa mga gibuhon ta. Pag-ulayan ta an duwang halimbawa.

25, 26. Anong mga pangyayari sa Nicaragua an nagin dahilan nin pagsangat nin kaso sa Korte Suprema, asin ano an resulta?

²⁵ Nicaragua. Kan Nobyembre 19, 1952, nagduman an misyonero asin branch servant na si Donovan Munsterman sa Office of Immigration sa Managua, an kabisera. Pinapaduman siya ki Captain Arnoldo Garcia, an namamayo diyan. Sinabi kaini ki Donovan na an gabos na Saksi ni Jehova sa Nicaragua “pinagbabawalan na ipadagos an paghuhulit kan saindang mga doktrina asin an pagpalakop kan relihiyosong mga aktibidad ninda.” Kan haputon kun taano, sinabi kaini na dai nin permiso an mga Saksi hali sa ministro kan gobyerno para gibuhon an ministeryo ninda asin na sinda sinasahutan na mga komunista. Sairisay an nagsasahot? An klero nin Katoliko Romano.

²⁶ Tulos-tulos na nag-apelar si Brother Munsterman sa Ministry of Government and Religions siring man ki Presidente Anastasio Somoza Garcia, pero daing nangyari. Kaya liniwat kan mga tugang an mga pamamaagi ninda. Isinera ninda an Kingdom Hall, nagtiripon sa mas saradit na grupo, asin nagpundo sa pagpapatotoo sa tinampo, pero naghulit pa man giraray kan mensahe kan Kahadian. Siring man, nagsumitir sinda nin petisyon sa Korte Suprema kan Nicaragua para magpaluwas nin pagbuot na pawaran nin saysay an pagbabawal. Irineport nin dakul na peryodiko an pagbabawal asin an laog kan petisyon, saka nag-uyon an Korte Suprema na dangugon an kaso. Ano an resulta? Kan Hunyo 19, 1953, ilinuwas kaiyan an nagkakasararong desisyon apabor sa mga Saksi. Nagdesisyon iyan na binayolar kan pagbabawal an garantiya kan konstitusyon sa libertad sa pagpapahayag, pagdesisyon basado sa konsiyensiya, asin pagpahayag nin mga paniniwala. Ipinagbuot man kaiyan na ibalik an marahay na relasyon kan gobyerno nin Nicaragua asin kan mga Saksi.

27. Taano ta napangalas an mga taga Nicaragua sa desisyon kan Korte, asin ano an pagmansay kan mga tugang sa kapangganahan na ini?

²⁷ Napangalas an mga taga Nicaragua sa pagpabor kan Korte Suprema sa mga Saksi. Bago kaiyan, makusugon an impluwensiya kan klero kaya linilikayan kan Korte na kontrahon sinda. Siring man, makusugon an kapangyarihan kan mga opisyal sa gobyerno kaya bihirang kontrahon kan Korte an mga desisyon ninda. May kumpiyansa an mga tugang ta na itinao sa sainda an kapangganahan na ini huling prinoteksiyunan sinda kan Hadi asin padagos na naghulit.—Gui. 1:8.

28, 29. Kan kabangaan kan dekada nin 1980, ano an dai inaasahan na pangyayari sa Zaire?

²⁸ Zaire. Kan kabangaan kan dekada nin 1980, mga 35,000 an Saksi sa Zaire, na Democratic Republic of Congo ngunyan. Tanganing maasikaso an padagos na paglakop kan gibuhon na pang-Kahadian, nagtugdok an sangay nin bagong mga pasilidad. Kan Disyembre 1985, nagkaigwa nin internasyonal na kumbensiyon sa kabiserang siyudad, sa Kinshasa, asin 32,000 na delegado hali sa dakul na parte kan kinaban an nagtiripon sa istadyum kan siyudad. Alagad pagkatapos kaiyan, nagpuon nang magbago an mga kamugtakan kun dapit sa mga lingkod ni Jehova. Anong nangyari?

²⁹ Naglilingkod kaidto sa Zaire si Brother Marcel Filteau, sarong misyonero hali sa Quebec, Canada, na nakaeksperyensiya nin persekusyon kan rehimen ni Duplessis. Inistorya niya an nangyari: “Kan Marso 12, 1986, nakaresibi an may katungdan na mga brother nin sarong surat na nagsasabing ilegal an asosasyon kan Mga Saksi ni Jehova sa Zaire.” An pagbabawal pirmado kan presidente kan nasyon, si Mobutu Sese Seko.

30. Anong magabat na desisyon an kaipuhan na gibuhon kan Komite kan Sangay, asin ano an desisyon ninda?

³⁰ Inanunsiyar sa nasyonal na radyo kan sunod na aldaw: “Dai ta na nuarin man madadangog an dapit sa Mga Saksi ni Jehova sa [Zaire].” Sinundan tulos ini nin persekusyon. Rinaot an mga Kingdom Hall, asin an mga tugang ta hinabunan, inarestar, prineso, saka binugbog. Prineso pati mga aking Saksi. Kan Oktubre 12, 1988, kinumpiskar kan gobyerno an mga pagsadiri kan organisasyon ta, asin inokupar kan Guwardiya Sibil, sarong grupo nin hukbo, an pasilidad kan sangay. Nag-apelar ki Presidente Mobutu an may katungdan na mga brother, pero dai sinda nin naresibing simbag. Kaya, dapat nang gumibo nin magabat na desisyon an Komite kan Sangay, “Maapelar kita sa Korte Suprema, o mahalat kita?” Nagirumduman ni Timothy Holmes, sarong misyonero asin parakoordinar kan Komite kan Sangay kaidto, “Nag-asa kami ki Jehova para sa kadunungan asin paggiya.” Pagkatapos nin pamibi asin pag-urulay, sa hiling kan komite bako pang panahon para sa legal na lakdang. Imbes, nagkonsentrar sinda sa pag-asikaso sa mga tugang asin paghanap nin mga paagi para padagos na maghulit.

31, 32. Anong pambihirang desisyon an ginibo kan Korte Suprema kan Zaire, asin ano an epekto kaiyan sa mga tugang?

³¹ Nag-agi an nagkapirang taon. Nainaan an panggigipit sa mga Saksi, asin urog na iginalang an mga deretso nin tawo sa nasyon. Nagkongklusyon an Komite kan Sangay na panahon na para kuwestiyunon an pagbabawal paagi sa pag-apelar sa Supreme Court of Justice sa Zaire. Pambihira an nangyari huling nag-uyon iyan na dangugon an kaso. Dangan kan Enero 8, 1993, haros pitong taon puon kan iluwas an pagbabawal kan presidente, nagdesisyon iyan na kontra sa ley an ginibo kan gobyerno sa mga Saksi, kaya hinali an pagbabawal. Isip-isipa na sana an buot sabihon kaiyan! Isinapeligro nanggad kan mga mahistrado an buhay ninda kan pawaran ninda nin saysay an desisyon kan presidente kan nasyon! Sabi ni Brother Holmes, “Kan panahon na dinadangog an kaso, nahiling mi kun paano puwedeng liwaton ni Jehova an mga bagay-bagay.” (Dan. 2:21) Pinakusog kan kapangganahan na ini an pagtubod kan mga tugang ta. Nahiling ninda na giniyahan kan Hading si Jesus an mga lingkod niya na maaraman kun nuarin asin kun paano mahiro.

³² Huling hinali na an pagbabawal, tinugutan na an sangang opisina na maglaog nin mga misyonero, magtugdok nin bagong mga pasilidad kan sangay, asin mag-importar nin literatura na basado sa Bibliya.g Naggagaya-gaya nanggad an mga lingkod nin Diyos sa bilog na kinaban pag nahihiling ninda kun paano pinoprotektaran ni Jehova an espirituwal na kapakanan kan mga lingkod niya!—Isa. 52:10.

Si Jehova “an Sakong Paratabang”

33. Ano an manunudan ta sa halipot na sumaryong ini nin nagkapirang kaso sa korte?

³³ An pagrepaso ta sa nagkapirang kaso na ipinakipaglaban ta sa korte nagpapatunay na inuutob ni Jesus an panuga niya: ‘Tatawan ko kamo nin mga tataramon asin kadunungan, na dai masusudya o masisimbag kan saindong mga kaiwal.’ (Basahon an Lucas 21:12-15.)h Kun minsan, malinaw na pinangyayari ni Jehova na magkaigwa nin mga arog-Gamaliel sa presenteng panahon para protektaran an mga lingkod niya o pinapahiro an makusog an buot na mga huwes asin abogado na manindugan para sa hustisya. Pinangurol ni Jehova an mga armas kan mga nagkokontra sa sato. (Basahon an Isaias 54:17.) Dai mapapapundo nin pagkontra an gibuhon nin Diyos.

34. Taano ta pambihirang marhay an mga kapangganahan ta sa korte, asin pruweba iyan nin ano? (Hilingon man an kahon na “Pambihirang mga Kapangganahan sa Haralangkaw na Korte na Urog Pang Nakapalakop kan Paghuhulit.”)

³⁴ Taano ta pambihirang marhay an satong mga kapangganahan sa korte? Isip-isipa ini: Bakong prominente o maimpluwensiya an Mga Saksi ni Jehova. Dai kita nagboboto, dai nagsusuportar sa pulitikal na mga kampanya, o dai nang-iimpluwensiya sa mga pulitiko. Dugang pa, an mga tugang ta na nag-aatubang sa haralangkaw na korte sa pangkagabsan ‘mga ordinaryong tawo asin mayo nin inadalan.’ (Gui. 4:13, An Marahay na Bareta Biblia) Kaya, sa simpleng pagtaram, daing makukuang pakinabang an mga korte kun tatabangan kita paagi sa pagdesisyon ninda kontra sa makapangyarihan na mga lider nin relihiyon saka pulitiko na nagkokontra sa sato. Minsan siring, parating apabor nanggad sa sato an desisyon kaiyan! An mga kapangganahan ta sa korte pruweba na naglalakaw kita “sa paghiling nin Diyos asin kaiba ni Cristo.” (2 Cor. 2:17, NW) Huli kaini, arog ni apostol Pablo, ipinapahayag ta: “[Si Jehova] an sakong paratabang; dai ako matatakot.”—Heb. 13:6.