Legal na Pagprotehir sa Maogmang Bareta

SAGKOD na an tawo nagtotogdok nin mga siudad, sia nagtotogdok nin mga lanob. Nangorogna sa suanoy na mga aldaw, proteksion an mga kutang ini. Gikan sa itaas kan kudal na ini, an mga nagdedepensa puedeng makipaglaban tanganing protehiran an mga lanob na dai magaba o malabot kan mga nagsasakyada. Bako sanang an mga nag-eerok sa siudad an naprotehiran kundi sa parate an mga nag-iistar sa palibot na mga banwaan nakapaili man sa laog kan mga lanob.​—2 Samuel 11:​20-​24; Isaias 25:12.

Kaagid kaiyan, an Mga Saksi ni Jehova nagtogdok nin lanob​—sarong legal na lanob—​na proteksion. An lanob na ini dai itinogdok tanganing isuhay an mga Saksi sa ibang mga tawo sa sosyedad, ta an Mga Saksi ni Jehova midbid na makiamigo, makikatood na mga tawo. Imbes, pinasasarig kaiyan an legal na mga garantiya sa pundamental na mga katalingkasan para sa gabos na tawo. Kadungan kaiyan, iyan an nagpoprotehir sa legal na mga diretso kan mga Saksi tanganing magibo ninda nin daing olang an saindang pagsamba. (Ikomparar an Mateo 5:​14-​16.) An lanob na ini an nagpoprotehir sa saindang paagi nin pagsamba asin sa saindang diretso na maghulit kan maogmang bareta kan Kahadean nin Dios. Ano an lanob na ini, asin paano iyan itinogdok?

Pagtogdok nin Legal na Lanob na Proteksion

Minsan ngani may katalingkasan sa relihion an Mga Saksi ni Jehova sa kadaklan na kadagaan, sa nagkapirang nasyon sinda nagin punteriya nin bakong makatanosan na pagsalakay. Kan kinukuestion an saindang katalingkasan sa pagsamba paagi sa pagtiripon o paagi sa paghuhulit sa harong-harong, hiningoa nindang asikasohon an mga bagay sa legal na paagi. An mga kasong legal na kalabot an mga Saksi uminabot sa rinibo sa bilog na daga.a Bakong gabos ginana. Alagad kan an desisyon kan mas hababang mga korte kontra sa sainda, sinda parateng nag-apelar sa korte suprema. Na may anong resulta?

Sa nakaaging mga dekada kan ika-20 siglo, an legal na mga panggagana sa dakol na nasyon nag-establisar nin masasarigan na mga susundan na inapelaran kan Mga Saksi ni Jehova sa suminunod na mga kaso. Siring sa mga adobe o gapo na ginamit sa paggibo nin lanob, an paborableng mga desisyon na ini nagin legal na lanob na proteksion. Gikan sa establisado nang legal na mga susundan na ini, an mga Saksi nagpadagos na ipakipaglaban an katalingkasan sa relihion tangani na gibohon an saindang pagsamba.

Halimbawa, estudyare an kasong Murdock v. Commonwealth of Pennsylvania, na dinesisyonan kan Korte Suprema kan Estados Unidos kaidtong Mayo 3, 1943. Ini an hapot na ibinangon sa kaso: Maninigo daw na kumua an Mga Saksi ni Jehova nin lisensia sa komersial na pagtinda para sa pagwaras kan saindang relihiosong mga babasahon? An Mga Saksi ni Jehova marigon na nanindogan na sinda dai maninigong hagadan na gumibo kaiyan. An saindang paghuhulit bakong​—asin nungka na nagin—​komersial. An saindang katuyohan, bakong magdilensia, kundi ihulit an maogmang bareta. (Mateo 10:8; 2 Corinto 2:​17) Sa desisyon sa kasong Murdock, an Korte nag-oyon sa mga Saksi, na nagpahayag na an ano man na kahagadan na magbayad nin buhis sa lisensia bilang rekisitos sa pagwaras nin relihiosong babasahon bakong sono sa konstitusyon.b An desisyon na ini nagtao nin mahalagang susundan, asin an mga Saksi mapangganang inapelaran iyan bilang autoridad sa dakol na kaso magpoon kaidto. An desisyon sa kasong Murdock nagin masarig na adobe sa legal na lanob na proteksion.

Dakula an nagibo kan siring na mga kaso na maprotehiran an katalingkasan sa relihion para sa gabos na tawo. Mapadapit sa ikinatatabang kan mga Saksi sa pagdepensa sa mga diretso sibil sa Estados Unidos, an University of Cincinnati Law Review nagsabi: “Hararom an nagin epekto kan Mga Saksi ni Jehova sa pagmukna kan konstitusyonal na ley, partikularmente paagi sa pagpahiwas kan mga limitasyon kan proteksion para sa pagtaram asin relihion.”

Pagpakosog sa Lanob

Sa kada legal na panggagana, an lanob orog na nagkokosog. Estudyare an pira sa mga desisyon kaining mga taon nin 1990 na nagtaong pakinabang sa Mga Saksi ni Jehova, siring man sa gabos na iba pang mamomoton sa katalingkasan, sa bilog na kinaban.

Grecia: Kan Mayo 25, 1993, an Korte Para sa mga Diretso nin Tawo sa Europa sinuportaran an diretso nin sarong siudadanong Griego na itokdo sa iba an saiyang mga paniniwalang relihioso. An kaso may labot ki Minos Kokkinakis, na 84 anyos kaidto. Bilang saro sa Mga Saksi ni Jehova, si Kokkinakis naarestar nin labing 60 beses poon kan 1938, pinaatubang nin 18 beses sa mga korte sa Grecia, asin naglabing anom na taon sa karsel. An kadaklan na pagkasentensia sa saiya may labot sa sarong ley sa Grecia kaidtong 1930 na nagbabawal sa proselitismo​—an ley na iyong dahelan kan haros 20,000 na pag-arestar sa mga Saksi ni Jehova poon kan 1938 sagkod 1992. An Korte sa Europa nagdesisyon na an gobyerno nin Grecia binalga an katalingkasan sa relihion ni Kokkinakis asin nagbayad sa saiya nin danyos perwisyo sa kantidad na $14,400. Sa desisyon kaiyan, dineterminaran kan Korte na an Mga Saksi ni Jehova tunay nanggad na sarong “rekonosidong relihion.”​—Helingon an The Watchtower na Setyembre 1, 1993, pahina 27-​31.

Mejico. Kan Hulyo 16, 1992, sarong dakulang lakdang sa pagdepensa kan katalingkasan sa relihion an ginibo sa Mejico. Kan petsang iyan an Ley sa Relihiosong mga Asosasyon Asin Pagsamba sa Publiko ginibo nang ley. Paagi sa ley na ini, an sarong grupong relihioso puedeng mag-ako nin legal na pagrekonoser bilang relihiosong institusyon paagi sa paggibo kan kahagadan na pagparehistro. Dati, an Mga Saksi ni Jehova, kapareho kan iba pang mga relihion sa nasyon, aktuwal na nag-eksister alagad bakong legal na rekonosido. Kan Abril 13, 1993, an mga Saksi nag-aplay para magparehistro. Nakaoogma, kan Mayo 7, 1993, sinda nagin legal na rehistrado bilang La Torre del Vigía, A. R., asin Los Testigos de Jehová en México, A. R., na kapwa mga asosasyon na relihioso.​—Helingon an Awake!, Hulyo 22, 1994, pahina 12-​14.

Brazil. Kan Nobyembre 1990, an Brazil’s National Institute of Social Security (INSS) pinaisi an sangang opisina kan Watch Tower Society na an boluntaryong mga ministro sa Bethel (an apod sa mga pasilidad kan sangang opisina kan Mga Saksi ni Jehova) dai na ibibilang na mga ministro nin relihion asin kun siring magigin sakop na kan mga ley sa pagtrabaho sa Brazil. Iinapelar kan mga Saksi an desisyon. Kan Hunyo 7, 1996, an Judicial Advisory of the Office of the Attorney General sa Brasília nagpaluwas nin desisyon na nagsusuportar sa paninindogan kan mga ministro sa Bethel bilang mga miembro nin sarong lehitimong orden nin relihion, bakong bilang sekular na mga empleyado.

Hapon. Kan Marso 8, 1996, an Korte Suprema sa Hapon nagpaluwas nin desisyon manongod sa isyu dapit sa edukasyon asin katalingkasan sa relihion​—sa kapakinabangan kan gabos na taga Hapon. An korte nagkakasararong nagdesisyon na an Municipal Industrial Technical College sa Kobe binalga an ley paagi sa pagpahale ki Kunihito Kobayashi huli sa pagsayuma niang magpartisipar sa pagsasanay sa abilidad sa pagdepensa sa sadiri. An desisyon na ini iyo an kaenot-enoteng ilinuwas kan Korte Suprema na basado sa katalingkasan sa relihion na ginagarantiyahan kan Konstitusyon kan Hapon. Sinusunod an saiyang konsensia na sinanay sa Biblia, an hoben na saksing ini naniniwala na an mga pagsasanay na ini bakong kaoyon kan mga prinsipyo sa Biblia na arog kan yaon sa Isaias 2:​4, na nagsasabi: “Dadaragopdopon ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.” An desisyon kan Korte nag-establisar nin susundan para sa maabot pang mga kaso.​—Helingon An Torrengbantayan, Nobyembre 1, 1996, pahina 19-21.

Kan Pebrero 9, 1998, an Korte Suprema sa Tokyo nagpaluwas nin saro pang dai malilingawan na desisyon na sinosorog an diretso nin sarong Saksi na an ngaran Misae Takeda na sayumahan an medikal na pagbolong na bakong kaoyon kan pagboot sa Biblia na ‘lumikay sa dugo.’ (Gibo 15:​28, 29) An kasong ini iinapelar sa Korte Suprema, asin dai ta pa aram kun sosorogon an desisyon kan Korte Superyor.

Pilipinas. Sa sarong desisyon na ilinuwas kan Marso 1, 1993, an Korte Suprema kan Pilipinas nagkakasararong nagdesisyon apabor sa mga Saksi ni Jehova sa sarong kaso na kalabot an mga aking Saksi na pinahale sa eskuelahan huli ta sinda magalang na nagsayumang sumaludo sa bandera.

An kada paborableng desisyon nin korte garo dagdag na gapo o adobe na nagpapasarig sa legal na lanob na nagpoprotehir sa mga diretso bako sanang kan Mga Saksi ni Jehova kundi kan gabos na tawo.

Pagprotehir sa Lanob

An Mga Saksi ni Jehova legal na nakarehistro sa 153 na nasyon, na tama sanang igwa nin dakol na katalingkasan, siring kan ibang rekonosidong relihion. Pakalihis nin mga dekada nin paglamag asin pagprohibir sa Sirangan na Europa asin dating Unyon Sobyet, an Mga Saksi ni Jehova legal nang rekonosido ngonyan sa mga nasyon na arog kan Albania, Belarus, Republikang Czech, Georgia, Hungaria, Kazakstan, Kyrgyzstan, Romania, asin Slovakia. Minsan siring, sa nagkapirang nasyon ngonyan, kabale an nagkapirang nasyon sa Solnopan na Europa na igwa nin haloy nang establisadong mga sistema hudisyal, an mga diretso kan Mga Saksi ni Jehova seryosong kinukuestion o dinedeharan. An mga paratumang aktibong naghihingoa na ‘gumibo nin karatan paagi sa pagboot’ tumang sa mga Saksi. (Salmo 94:20) Ano an reaksion ninda?c

An Mga Saksi ni Jehova boot na makikooperar sa gabos na gobyerno, alagad gusto man nindang magkaigwa nin legal na katalingkasan sa paggibo kan saindang pagsamba. Marigon an pagtubod ninda na an ano man na mga ley o desisyon nin korte na maprohibir sa sainda sa pagkuyog sa mga pagboot nin Dios​—kabale an pagboot na ihulit an maogmang bareta—​daing saysay. (Marcos 13:10) Kun dai puedeng magibo sa matoninong na orolay, an Mga Saksi ni Jehova na an maenot sa legal na arena, na pinagmamaigotan na gamiton an gabos na paagi nin pag-apelar na kaipuhan tanganing makamit an legal na proteksion para sa saindang tao nin Dios na diretso na gibohon an saindang pagsamba. Lubos an kompiansa kan mga Saksi ni Jehova sa panuga nin Dios: “An ano man na armas na gibohon tumang sa saimo dai magkakaepekto.”​—Isaias 54:17.

[Mga Nota sa Ibaba]

[Kahon sa pahina 21]

Pagdepensa sa mga Diretso kan mga Saksi ni Jehova

An paglamag sa Mga Saksi ni Jehova nagresulta sa pagdara sa sainda sa atubangan nin mga huwes asin opisyal nin gobyerno sa bilog na daga. (Lucas 21:​12, 13) Ginibo kan Mga Saksi ni Jehova an gabos na paghihingoa sa legal na pagdepensa kan saindang mga diretso. An mga panggagana sa korte sa dakol na nasyon nakatabang na protehiran an legal na katalingkasan kan Mga Saksi ni Jehova, kabale an saindang diretso na:

◻ maghulit sa harong-harong na talingkas sa mga limitasyon na ipinapaotob sa komersial na mga ahente​—Murdock v. Commonwealth of Pennsylvania, Korte Suprema kan E.U. (1943); Kokkinakis v. Greece, European Court of Human Rights (ECHR) (1993).

◻ magtiripon na daing olang para sa pagsamba​—Manoussakis and Others v. Greece, ECHR (1996).

◻ magdesisyon kun paano ninda ipaheheling komporme sa konsensia an paggalang sa bandera o emblema kan nasyon​—West Virginia State Board of Education v. Barnette, Korte Suprema kan E.U. (1943); Supreme Court of the Philippines (1993); Supreme Court of India (1986).

◻ sayumahan an serbisyo militar na minalapas sa saindang Kristianong konsensia​—Georgiadis v. Greece, ECHR (1997).

◻ pumili nin mga pagbolong asin medisina na dai minalapas sa saindang konsensia​—Malette v. Shulman, Ontario, Canada, Korte de Apelasyon (1990); Watch Tower v. E.L.A., Korte Suprema, San Juan, Puerto Rico (1995); Formire v. Nicoleau, Nueva York, E.U.A., Korte de Apelasyon (1990).

◻ padakulaon an saindang mga aki sono sa saindang mga paniniwala na basado sa Biblia dawa kun an mga paniniwalang ini kinukuestion sa mga argumento manongod sa kun siisay an may katanosan na mag-ataman sa aki​—St-Laurent v. Soucy, Korte Suprema kan Canada (1997); Hoffmann v. Austria, ECHR (1993).

◻ magkaigwa asin magpadalagan nin legal na mga ahensia na nag-aako nin kaparehong mga iksemsion sa buhis na itinatao sa mga ahensiang ginagamit nin ibang rekonosidong relihion​—People v. Haring, Nueva York, E.U.A., Korte de Apelasyon (1960).

◻ an mga nombrado sa sarong klase nin espesyal na paglilingkod nin bilog na panahon mag-ako kan kaparehong paborableng tratamiento sa buhis na itinatao sa bilog na panahon na relihiosong mga trabahador kan ibang mga relihion​—Brazil’s National Institute of Social Security, Brasília, (1996).

[Retrato sa pahina 20]

Si Minos Kokkinakis kaiba an saiyang agom

[Retrato sa pahina 20]

Si Kunihito Kobayashi

[Pasasalamat para sa pinagkuanan kan retrato sa pahina 19]

The Complete Encyclopedia of Illustration/J. G. Heck