“Ki Jehova an Ralaban”

Nagpuon an kontrobersiyang iyan kan 1999 kan pinatawan kan gobyerno nin France nin bakong makatanusan na buhis an mga donasyon na naresibi kan sangang opisina sa France puon 1993 sagkod 1996. Dinara mi sa mga korte sa France an manungod sa isyung ini, pero mayo man nin nangyari. Pagkatapos ming madaog sa sarong korte sa pag-apelar, kinumpiskar kan gobyerno an labing apat may kabangang milyon na euro ($6,300,000 U.S.) hali sa bank account kan sangang opisina. An ECHR na sana an pag-asa mi. Alagad bago magpaluwas nin desisyon manungod diyan, hinagad kan ECHR na mag-atender kami asin an legal team kan gobyerno sa sarong pretrial settlement hearing na gigibuhon sa atubangan kan saro sa mga rehistrador kan Korte, na iyo an responsable sa administratibo asin hudisyal na mga aktibidad kan Korte.

Inaasahan mi nang gigipiton kami kan rehistrador na resolberan an isyu paagi sa pag-uyon na magbayad kami nin porsiyon kan hinahagad na kantidad. Pero malinaw man samo na kun mabayad kami nin dawa saro sanang euro, pagbalga na iyan sa mga prinsipyo sa Bibliya. Nagdonar an mga tugang tanganing suportaran an intereses kan Kahadian, kaya an mga donasyon ninda bakong pagsadiri kan gobyerno. (Mat. 22:21) Pero nag-atender pa man giraray kami bilang paggalang sa protokol kan Korte.

Isinagibo an hearing na iyan sa saro sa magayunon na mga conference room kan Korte. Kan primero, bakong magayon an dalagan kan hearing. Sa pambukas na mga tataramon kan rehistrador, sinabi niya na inaasahan niyang an Mga Saksi ni Jehova sa France mabayad nin porsiyon kan ipinataw na buhis. Pero bigla na sana kaming napahirong haputon siya, “Aram daw po nindo na pigkumpiskar na kan gobyerno an labing apat may kabangang milyon na euro hali sa samong bank account?”

Hiling-hiling na nabigla siya. Kan kumpirmaron kan legal team kan gobyerno na ginibo ninda iyan, biyong nagbago an sabuot niya sa kaso. Inanggutan niya sinda asin biglang tinapos an hearing. Diyan ko narealisar na biyong binago ni Jehova an dalagan kan kaso sa paaging dai mi lamang inaasahan. Ugmahon kaming naghali sa hearing, asin dai kami makapaniwala sa nangyari.

Kan Hunyo 30, 2011, nagpaluwas an ECHR nin pinagkauruyunan na desisyon apabor sa samo. Kinanselar kaiyan an buhis asin ipinagbuot sa gobyerno na ibalik an kuwartang kinumpiskar ninda na may kaiba nang interes! An makasaysayan na desisyon na ini nagprotektar sa dalisay na pagsamba sa France sagkod ngunyan. An dai pinag-andaman na hapot na idto, arog kan gapo na tuminama sa payo ni Goliat, an nagpagana samo sa laban. Taano ta nanggana kami? Huling, arog kan sinabi ni David ki Goliat, “ki Jehova an ralaban.”—1 Sam. 17:45-47.

Bako lang kita sa kasong ini nanggana. Sagkod sa puntong ini, sa ibong kan pagkontra kan makapangyarihan na mga gobyerno asin relihiyon, an korte suprema kan 70 nasyon asin an nagkapirang internasyonal na mga husgado nagpaluwas nin 1,225 desisyon apabor sa Mga Saksi ni Jehova. An mga kapangganahan na ini nagprotektar sa satong pundamental na mga deretso, arog kan satong deretso na legal na midbidon bilang sarong relihiyon, makikabtang sa pampublikong ministeryo, magsayumang magpartisipar sa patriotikong mga seremonya, asin magsayumang magpasalin nin dugo.

Paano ako nagin kalabot sa pag-asikaso sa sarong kaso sa Europa dawa ngani sa World Headquarters kan Mga Saksi ni Jehova sa New York, U.S.A., ako naglilingkod?

NAGDAKULA NA NAMASDAN AN ESPIRITU NIN PAGMIMISYONERO

An mga magurang kong si George asin Lucille naggradwar sa ika-12 klase nin Gilead asin naglilingkod kaidto sa Ethiopia kan mamundag ako kan 1956. Pinangaranan ninda akong Philip, na kinua sa pangaran kan inot na siglong ebanghelisador. (Gibo 21:8) Kan sunod na taon, ipinagbawal kan gobyerno an samong pagsamba. Dawa ngani akion pa ako kaidto, malinaw ko nang nagigirumduman na pasekretong nagsasamba an pamilya mi. Dahil aki pa, exciting idto para sa sako! Nakakamundo, an mga opisyal kan gobyerno puwersahan kaming pinahali sa nasyon kan 1960.

Kan an pamilya mi maglipat sa Wichita, Kansas, U.S.A., dara kan mga magurang ko an sarong bagay na espesyal na marhay—an saindang espiritu nin pagmimisyonero. Namuhay sinda kauyon kan katotoohan asin itinadom an mga pamantayan sa espirituwal bako lang sako kundi pati man sa matua kong tugang na babaying si Judy asin sa nguhod kong tugang na lalaking si Leslie, na mga namundag man sa Ethiopia. Nabawtismuhan ako kan 13 anyos ako. Pakalihis nin tulong taon, naglipat an pamilya mi para maglingkod sa sarong lugar na mas dakula an pangangaipo—sa Arequipa, Peru.

Kan 1974 kan 18 anyos pa lang ako, an sangang opisina sa Peru inasignaran ako saka an apat na iba pang brother na magin mga espesyal payunir. Mahulit kami sa dai pa lamang nahuhulitan na mga teritoryo sa kaitaasan kan Central Andes Mountains. Kaiba diyan an pagpapatotoo sa katutubong mga komunidad na Quechua asin Aymara. Nagbibiyahe kami sakay nin awtong iyo na man an nagin pinakaharong mi. Inapod mi iyan na An Arka dahil korteng kahon iyan. Dai ko talaga malilingawan an mga pagkakataon na ginagamit mi an Bibliya para ipahiling sa mga katutubo na madali nang halion ni Jehova an pagtios, hilang, asin kagadanan. (Kap. 21:3, 4) Dakul an nag-ako kan mensahe kan Kahadian.

IINASIGNAR SA WORLD HEADQUARTERS

Kan 1977, durante kan pagdalaw sa Peru ni Albert Schroeder, na miyembro kaidto kan Namamahalang Grupo kan Mga Saksi ni Jehova, dinagka niya ako na mag-aplay sa Bethel sa world headquarters. Kaya nag-aplay ako. Dai nahaloy, kan Hunyo 17, 1977, nagpuon akong maglingkod sa Bethel sa Brooklyn. Sa Cleaning asin Maintenance department ako nagtrabaho sa suminurunod na apat na taon.

Kan Hunyo 1978, nabisto ko si Elizabeth Avallone sa sarong internasyonal na kumbensiyon sa New Orleans, Louisiana. Arog ko, pinadakula man siya nin mga magurang na namuhay kauyon kan katotoohan. Apat na taon na kaidtong regular payunir si Elizabeth, asin gusto niyang padagos na maglingkod nin bilog na panahon sa bilog niyang buhay. Padagos kaming nagkaigwa nin komunikasyon. Dai nahaloy, nagkaminuutan na kaming marhay. Nagpakasal kami kan Oktubre 20, 1979, asin nagpuon na maglingkod sa Bethel bilang mag-agom.

Pinadangat kaming marhay kan mga tugang sa inot ming kongregasyon na Brooklyn Spanish. Sa paglihis nin mga taon, tulong iba pang mapagpadangat na kongregasyon an nag-ako samo asin sinuportaran kami sa paglilingkod sa Bethel. Pinapahalagahan ming marhay an saindang tabang, pati man an suporta kan samong mga amigo asin mga kapamilya na nagtabang samo sa pag-asikaso sa naggugurang mi nang mga magurang.

UMINIBA SA MGA PAKIKIPAGLABAN NIYATO SA KORTE

Kan Enero 1982, nasurpresa ako kan asignaran akong maglingkod sa Legal Department sa Bethel. Pakalihis nin tulong taon, sinabihan ako na mag-eskuwela nin abogasiya asin magin lisensiyadong abogado. Kan nag-eeskuwela na ako, napangalas ako asin naugma kan maaraman kong an pundamental na mga katalingkasan na nababaliwala kan kadaklan na tawo, sa Estados Unidos asin sa ibang mga nasyon, urog na natawan nin atensiyon dahil sa mga kapangganahan kan Mga Saksi ni Jehova sa korte. Detalyadong pigtukar sa klase an importanteng mga kasong ini.

Kan 1986 kan 30 anyos ako, ninombrahan ako bilang paraataman kan Legal Department. Huling hobenon pa ako asin dai ko pa nasasabutan na gayo kun gurano kakomplikado kan mga mapapaatubang sako, ugmahon ako pero nahadit man na marhay.

Kan 1988, nagin abogado ako, pero dai ko narealisar kun gurano na kaini naisasapeligro an sakong espirituwalidad. An halangkaw na edukasyon puwedeng patalubuon sa saimo an pag-ambisyon asin an kaisipan na pag igwa ka nin espesyal na sekular na kaaraman nakakalabi ka sa mga mayo kaiyan. Marahay na sana ta yaon si Elizabeth. Tinabangan niya akong maibalik an espirituwal na rutina na igwa ako kaidto bago mag-eskuwela nin abogasiya. Medyo nahaloy, pero luway-luway kong naibalik sa dati an sakong espirituwalidad. Masasabi ko talaga na an pinakaimportante sa buhay bako an pagkaigwa nin dakul na sekular na kaaraman. An nagtatao nin tunay na halaga sa buhay iyo an pagkaigwa nin dayupot na relasyon ki Jehova asin an pagkaigwa nin hararom na pagkamuot sa saiya saka sa mga lingkod niya.

PAGDEPENSA KAN MAUGMANG BARETA ASIN PAGHIHINGUWANG MAKUA AN LEGAL NA DERETSO PARA IHULIT IYAN

Dahil tapos na akong mag-eskuwela nin abogasiya, nagpokus ako sa pagtabang na maorganisar an mga serbisyo legal na kaipuhan sa Bethel asin sa pagdepensa kan intereses kan Kahadian sa korte. Exciting pero bakong pasil an pagsuportar sa satong organisasyon na marikas na naghihiro, nagtatalubo, asin dakul nin pagbabago. Halimbawa, kan 1990, inasignaran an Legal Department na iyo an manginot sa pagliwat sa haloy nang kinaugalian na paghagad nin rekomendadong kontribusyon para sa mga publikasyon. Pagkatapos kaidto, pinagin posible kan Mga Saksi ni Jehova na makua an mga publikasyon na ini nin daing bayad. An pagbabagong ini nagpasimple kan gibuhon sa Bethel saka sa langtad asin sagkod sa ngunyan nagpoprotektar sa mga aktibidad na ini sa dai kinakaipuhan na pagbuhis. Inisip kan iba na huli kaini mauubos an satong pondo asin maaapektaran an satong pampublikong ministeryo. Kabaliktaran an nangyari. An bilang kan mga lingkod ni Jehova puon 1990 naglabing doble, asin ngunyan puwede nang makakua an mga tawo nin nagliligtas-buhay na espirituwal na kakanon nin daing bayad. Nahiling ko mismo na paagi sana sa kusog ni Jehova asin sa saiyang paggiya paagi sa maimbod na uripon kaya mapangganang naimplementar an pagbabagong ini asin an dakulon na iba pang pagbabago sa organisasyon.—Exo. 15:2; Mat. 24:45.

Nanggagana kita sa mga kaso bako lang dahil sa mahusay na pagdepensa nin mga abogado sa korte. Sa parati, an nagpapahiro sa mga nasa awtoridad na iyan iyo an marahayon na paggawi kan mga lingkod ni Jehova. Nakahiling ako nin halimbawa kaiyan kan 1998 kan mag-atender sa espesyal na mga kumbensiyon sa Cuba an tulong miyembro kan Namamahalang Grupo kaiba an saindang agom. An ipinahiling nindang kabuutan asin pagigin magalang mas nakatabang na makumbinsir an mga awtoridad na neutral kita sa pulitika kisa sa ano man na sinabi mi sa sainda sa pormal ming mga pag-uulay.

Pag dai pa man giraray maresolberan an sarong legal na isyu dawa hininguwa ta nang agihon iyan sa marahay na urulay, ‘idinedepensa ta [sa korte] an maugmang bareta asin hinihinguwang makua an legal na deretso para ihulit iyan.’ (Fil. 1:7) Halimbawa, sa laog nin mga dekada dai minidbid kan mga awtoridad sa Europa asin South Korea an satong deretso na magsayumang magsagibo nin serbisyo militar. Huli kaiyan, mga 18,000 na brother sa Europa asin labing 19,000 na brother sa South Korea an napreso huling nagsayuma sindang magserbisyo militar dahil sa konsiyensiya.

Sa katapos-tapusi, kan Hulyo 7, 2011, ilinuwas kan ECHR an makasaysayan na desisyon na Bayatyan v. Armenia na diyan ipinagbubuot na magtao nin alternatibong serbisyo na pansibilyan sa bilog na Europa. Sinundan iyan kan kaagid na desisyon kan Constitutional Court kan South Korea kaidtong Hunyo 28, 2018. Dai kuta kita manggagana sa arin man diyan kun nagkompromiso an maski sadit lang na porsiyento kan satong mga hoben na brother.

An legal department sa headquarters asin sa mga sangay sa bilog na kinaban daing pundo sa paghihinguwang idepensa an intereses kan Kahadian. Sarong onra para sa samo na irepresentar an satong mga tugang na napapaatubang sa pagkontra kan gobyerno. Kita man manggana o dai, an pag-atubang ta sa korte nakakatao nin patotoo sa mga gobernador asin mga hadi asin sa mga nasyon. (Mat. 10:18) May mga kinokotar kaming mga teksto sa isinusumitir ming mga dokumento saka sa mga sinasabi mi sa atubangan kan korte kaya nakakaiba man an mga ini sa pagkonsiderar kan mga huwes, mga representante kan gobyerno, kan media, asin kan mga tawo sa pangkagabsan. Nabibisto kan mga tawong sadiyosan an puso kun siisay an Mga Saksi ni Jehova asin kun sain ninda ibinabasar an saindang mga tinutubod. An nagkapira sa sainda nagin mga kapagtubod na niyato.

SALAMAT, JEHOVA!

Sa nakaaging 40 taon, nagkapribilehiyo akong makipagtabangan sa mga sangang opisina sa bilog na kinaban sa pagresolber sa legal na mga isyu asin umatubang sa dakul na halangkaw na korte asin mga opisyal. Namumutan asin hanga ako sa mga katrabaho ko sa Legal Department sa world headquarters asin sa mga legal department sa manlain-lain na parte kan kinaban. Nagkaigwa ako nin nakakakontentong marhay na buhay na pano nin bendisyon.

Maimbod asin mamumuton akong sinuportaran ni Elizabeth sa nakaaging 45 taon, marahay man o bako an sitwasyon. Hanga talaga ako saiya huling ginibo niya iyan dawa ngani may tinatagalan siyang hilang na nagpapaluya sa saiyang immune system asin sa saiyang hawak.

Nahiling mi mismo na may kusog kita asin nanggagana bako huli sa sadiri tang mga kakayahan. Arog kan sinabi ni David, “si Jehova an kusog kan saiyang banwaan.” (Sal. 28:8) Iyo, “ki Jehova an ralaban.”