Inandam ni Juan Bautista an Dalan

Mga 17 taon na an nakaagi puon kan haputon kan 12 anyos na si Jesus an mga paratukdo sa templo. Mga inot na bulan kaidto kan 29 C.E. Dakul an nag-uurulay manungod sa paryente ni Jesus na si Juan, na naghuhulit sa gabos na lugar sa sulnupan na parte kan Salog nin Jordan.

Si Juan saro nanggad na kahanga-hangang lalaki, kapwa sa itsura asin sa pagtaram. An saiyang bado gibo sa barahibo nin kamelyo, asin may sulot siyang pahang anit sa saiyang habayan. An pigkakakan niya mga duron—sarong klase nin lukton—asin tangguli, o dugos, sa kaawagan. Ano an saiyang mensahe? “Magsurulsol kamo, huli ta an Kahadian kan kalangitan harani na.”—Mateo 3:2.

Interesaduhon sa mensahe ni Juan an mga nagduruman sa saiya para magdangog. Narealisar nin dakul na kaipuhan nindang magsulsol, an buot sabihon, kaipuhan nindang baguhon an saindang ugali asin mga dalan, na isinisikwal an dati nindang pamumuhay huling bako idtong marahay. An mga nagduruman sa saiya hali “sa Jerusalem asin sa bilog na Judea pati sa gabos na lugar na nasa palibot kan Jordan.” (Mateo 3:5) An dakul sa sainda nagsurulsol. Binawtismuhan niya sinda paagi sa paglubog sa sainda sa tubig kan Jordan. Taano?

Binabawtismuhan niya an mga tawo bilang simbolo, o pagpahiling, kan udok sa pusong pagsulsol sa mga kasalan ninda sa tipan na Katugunan nin Diyos. (Gibo 19:4) Pero, bako gabos angay. Kan magduman ki Juan an nagkapirang lider nin relihiyon, mga Fariseo asin Saduceo, inapod niya sindang “mga aki nin mga rimuranon.” Sinabi niya: “Magpahiling kamo nin bunga na angay sa saindong pagsulsol. Dai kamo magsabi sa saindong sadiri, ‘Si Abraham an samuyang ama.’ Huli ta sinasabi ko sa saindo na kaya nin Diyos na gumibo nin mga aki ni Abraham hali sa mga gapong ini. An patok yaon na sa may gamot kan mga kahoy. Kun siring, an lambang kahoy na dai namumunga nin marahay na bunga papaludon asin iaapon sa kalayo.”—Mateo 3:7-10.

Huling dakul an nagtataong atensiyon ki Juan, mapuwersa an mensahe niya, asin dakul an binabawtismuhan niya, isinugo an mga saserdote asin mga Levita tanganing haputon siya: “Siisay ka?”

“Bako ako an Cristo,” an sabi ni Juan.

“Siisay ka palan? Si Elias?” an hapot ninda.

Nagsimbag siya: “Bako ako.”

“Ika an Propeta?” an hapot ninda, an buot sabihon an importanteng marhay na Propeta na sinabi ni Moises na maabot.—Deuteronomio 18:15, 18.

“Bako!” an simbag ni Juan.

Nagpumirit sinda: “Siisay ka? Sabihon mo sa samuya tanganing may ikasimbag kami sa mga nagsugo sa samo. Anong masasabi mo manungod sa sadiri mo?” Sinabi ni Juan: “Boses ako nin saro na nagkukurahaw sa kaawagan, ‘Pakarhayon nindo an dalan ni Jehova,’ siring kan sinabi ni Isaias na propeta.”—Juan 1:19-23.

“Kun siring, taano ta nagbabawtismo ka,” an hapot pa ninda, “kun bako ka man an Cristo o si Elias o an Propeta?” Nagtao siya nin makahulugan na simbag: “Nagbabawtismo ako sa tubig. Igwa diyan sa tahaw nindo nin saro na dai nindo namimidbid, na iyo an maabot kasunod ko.”—Juan 1:25-27.

Iyo, ipinahiling ni Juan na inaandam niya an dalan paagi sa pagtabang sa mga tawo na magkaigwa nin tamang kamugtakan nin puso tanganing akuon an ihinulang Mesiyas, an saro na magigin Hadi. Manungod sa sarong ini, si Juan nagsabi: “An maabot na kasunod ko mas may awtoridad kisa sako, asin dai ako angay na maghali kan saiyang sandalyas.” (Mateo 3:11) Sa katunayan, nagsabi pa ngani si Juan: “An saro na maabot kasunod ko nainot na sa sako, huli ta buhay na siya bago pa ako nabuhay.”—Juan 1:15.

Kun siring, an mensahe ni Juan na “Magsurulsol kamo, huli ta an Kahadian kan kalangitan harani na” angay nanggad. (Mateo 3:2) Nagseserbi iyan na paisi sa publiko na mapuon na an ministeryo kan maabot na Hadi na pinili ni Jehova, si Jesu-Cristo.