Siisay si Juan Bautista?
An simbag kan Bibliya
Sarong propeta nin Diyos si Juan Bautista. (Lucas 1:76) Namundag siya bago mamundag si Jesus. Isinugo siya nin Diyos para iandam an dalan para sa Mesiyas, o Cristo. Ginibo iyan ni Juan paagi sa paghulit kan mensahe nin Diyos sa mga kapwa niya Judio tanganing magbalik sinda sa Diyos.—Marcos 1:1-4; Lucas 1:13, 16, 17.
Matatabangan kan mensahe ni Juan an mga sinserong nagdadangog saiya na mamidbid na si Jesus na taga Nazaret iyo an ipinanugang Mesiyas. (Mateo 11:10) Pinahiro ni Juan an mga nagdadangog saiya na pagsulsulan an saindang mga kasalan asin magpabawtismo para ipahiling na nagsusulsol sinda. (Lucas 3:3-6) Huling dakul na tawo an binawtismuhan niya, inapod siyang Juan Bautista o Juan na Parabawtismo. An pinakaimportanteng pagbawtismo na ginibo niya iyo an pagbawtismo ki Jesus.a—Marcos 1:9.
Sa artikulong ini
Taano ta napapalain si Juan Bautista?
Ihinula an mga gigibuhon niya: Kan maghulit si Juan, inutob niya an manungod sa mensahero ni Jehova. (Malakias 3:1; Mateo 3:1-3) Napatunayan niya na siya an saro na ‘maandam kan banwaan para ki Jehova.’ Buot sabihon, tinabangan niya an mga kapwa niya Judio na akuon an mensahe ni Jesus, an panginot na representante kan Diyos na Jehova.—Lucas 1:17.
An mga nagibo niya: Sinabi ni Jesus na “dai pa nin siisay man na nakakalabi ki Juan Bautista, pero an sarong mas hababa duman sa Kahadian kan kalangitan nakakalabi sa saiya.” (Mateo 11:11) Huling bako lang sarong propeta si Juan kundi siya man an ihinulang “mensahero,” mayong lingkod nin Diyos na nabuhay bago sa saiya an nakakalabi sa saiya. Ipinapahiling man kan mga tataramon ni Jesus na si Juan dai masakat sa Kahadian sa langit,b huling nagadan an maimbod na propetang ini bago pa buksan ni Cristo an dalan pasiring sa langit. (Hebreo 10:19, 20) Pero, magigin sakop si Juan kan Kahadian nin Diyos digdi sa daga, na may paglaom na mabuhay nin daing sagkod sa Paraiso.—Salmo 37:29; Lucas 23:43.
Siisay an mga magurang ni Juan Bautista?
An mga magurang ni Juan iyo an mag-agom na si Zacarias asin Elizabeth. Sarong Judiong saserdote si Zacarias. Sarong milagro an pagkapangaki ki Juan ta baog an ina niya, o mayong kakayahan na magkaaki. Saro pa, si Elizabeth asin Zacarias ‘parehong may edad na.’—Lucas 1:5-7, 13.
Siisay an nagpagadan ki Juan Bautista?
Pinapugutan nin payo ni Hading Herodes Antipas si Juan. Ginibo niya iyan dahil hinagad iyan sa saiya kan saiyang agom na si Herodias. Angguton kaya si Herodias ki Juan ta sinabi kaini ki Herodes, na sarong Judio daa, na an saindang pag-aguman ipinagbabawal sa ley nin mga Judio.—Mateo 14:1-12; Marcos 6:16-19.
Magkaribal daw si Juan Bautista asin si Jesus?
Mayong sinabi sa Bibliya na magkaribal an duwa. (Juan 3:25-30) Sa katunayan, sinabi mismo ni Juan na paninimbagan niya an pag-andam kan dalan para sa Mesiyas, bakong para makipagkumpetensiya saiya. Sabi niya: “Nagbabawtismo ako sa tubig . . . para maihayag siya sa Israel.” Sinabi pa niya: “Siya an Aki nin Diyos.” (Juan 1:26-34) Kaya ugmahon si Juan kan madangog niya na nagin mapanggana an ministeryo ni Jesus.
a “Dai [si Jesus] nakagibo nin kasalan.” (1 Pedro 2:21, 22) Kaya dai siya binawtismuhan huling kaipuhan niyang magsulsol, kundi tanganing ipresentar an sadiri niya para gibuhon an kabutan nin Diyos. Kaiba diyan an pagtao ni Jesus kan saiyang buhay para sa sato.—Hebreo 10:7-10.
b Hilingon an artikulong “Siisay an mga Mapalangit?”