Mga Hapot Hale sa mga Parabasa

Maninigo daw apodon si Juan na nagbautismo ki Jesus na “Juan Bautista” o “Juan na Bautisador”?

An duwang pag-apod tama asin sinusuportaran kan Biblia.

Si Juan ‘aandamon para ki Jehova an sarong andam na banwaan,’ na ginibo nia paagi sa ‘paghuhulit nin bautismo bilang simbolo nin pagsolsol para sa kapatawadan nin mga kasalan.’ (Lucas 1:17; 3:3) Si apostol Mateo nagsurat: “Nag-abot si Juan Bautista na naghuhulit sa kaawagan nin Judea, na an sabi: ‘Magsorolsol kamo, huli ta an kahadean kan kalangitan naghaharani na.’ . . . Dangan an Jerusalem asin an bilog na Judea . . . nagduruman saiya, asin an mga tawo binautismohan nia sa Salog nin Jordan, na hayag na itinutuga an saindang mga kasalan.”​—Mateo 3:​1-6.

Mangnoha na inaapod ni Mateo si Juan na “Bautista.” Si Mateo, na malinaw na iinangay an saiyang surat sa mga Judio, siertong nakamate na an mga Judio mamimidbid kun siisay an “Bautista.” Ginamit nia an “Bautista” bilang sarong klase nin apelyido. Si Jesus asin an saiyang mga disipulo ginamit an “Juan Bautista,” arog kan ginibo kan mga oripon ni Herodes.a​—Mateo 11:​11, 12; 14:​2; 16:14.

An disipulong si Marcos nagbabareta nin kaparehong paggamit nin “Bautista.” (Marcos 6:​25; 8:28) Alagad kan ipinamimidbid si Juan, inapod sia ni Marcos na “Juan na bautisador.” (Marcos 1:4) An Griego na kalabot sa Marcos 1:​4 napapalaen nin kadikit sa iba pang bersikulong idto. An Marcos 1:​4 puwede man tradusiron na “an saro na nagbabautismo.” Idinodoon ni Marcos kun ano an ginigibo ni Juan; sia an saro na nagbabautismo, an bautisador.

Pero dai minalataw na kaipuhan tang maaraman an pagkakalaen kan mga paaging ini nin pag-apod ki Juan. Sa Marcos 6:24, 25, mababasa niato an manongod ki Salome: “Sia nagluwas asin nagsabi sa saiyang ina: ‘Ano an hahagadon ko?’ Sia nagsimbag: ‘An payo ni Juan na bautisador.’ Tolos-tolos siang naglaog na naghihidale pasiring sa hade asin ginibo an saiyang kahagadan, na nagsasabing: ‘Gusto ko na itao mo sako tolos-tolos an payo ni Juan Bautista sa sarong platera.’” An duwang pag-apod ginamit nin sarosalida.

An iba tibaad saboton an “Bautista” sono sa ikaduwang kahulogan sa sarong diksionaryo: “Sarong miembro o parasuportar nin ebanghelikong denominasyon na Protestante na midbid paagi sa pamamahala nin kongregasyon asin bautismo paagi sa paglubog sa tubig nin mga paratubod sana.” Siertong bakong siring kaiyan si Juan.

Kun siring, pareho tama asin angay an “Juan Bautista” asin an “Juan na Bautisador.”

[Nota sa Ibaba]