Organisado sa Paggibo kan Kabutan ni Jehova

SA BILOG na kinaban, dakul na organisasyon nin relihiyon, pulitika, komersiyo, asin sosyedad na iba-iba an karakteristiko, katuyuhan, punto de vista, saka pilosopiya. Pero may sarong organisasyon na risang-risa an pagkakalain sa gabos na iba pa. Malinaw na ipinapamidbid kan Tataramon nin Diyos na iyan iyo an Mga Saksi ni Jehova.

² Nakakaugma ta kabilang ka na ngunyan sa organisasyon ni Jehova. Napatunayan mo mismo kun ano an kabutan nin Diyos kaya ginigibo mo na iyan ngunyan. (Sal. 143:10; Roma 12:2) Ika aktibong ministro na naglilingkod kaiba kan mamumuton asin pambilog na kinaban na kasararuan nin magturugang. (2 Cor. 6:4; 1 Ped. 2:17; 5:9) Siring kan ipinanuga sa Tataramon nin Diyos, nagtatao ini sa saimo nin abundang bendisyon asin dakulang kaugmahan. (Tal. 10:22; Mar. 10:30) Paagi sa maimbod na paggibo ngunyan kan kabutan ni Jehova, inaandam ka na para sa nagdadanay asin mamuraway na puturo.—1 Tim. 6:18, 19; 1 Juan 2:17.

³ An satong Kahuruhalangkawing Kaglalang igwa nin daing kaagid na pambilog na kinaban na organisasyon na pinapamahalaan sa teokratikong paagi. An buot sabihon pinapamahalaan iyan ni Jehova, na iyo an Payo kan gabos. Lubos an kumpiyansa ta sa saiya. Siya an satong Hukom, satong Paratao nin Katugunan, asin satong Hadi. (Isa. 33:22) Huling siya aregladong Diyos, naggibo siya nin mga areglo tanganing kita ‘makagibo kaiba niya’ sa pag-utob kan saiyang katuyuhan.—2 Cor. 6:1, 2.

⁴ Mantang parani nang parani an katapusan kan presenteng sistema nin mga bagay, nag-aabante kita sa panginginot kan nombradong Hadi, si Cristo Jesus. (Isa. 55:4; Kap. 6:2; 11:15) Siya mismo an naghula na an saiyang mga parasunod magibo nin urog pa kisa sa mga nagibo niya sa panahon kan saiyang ministeryo digdi sa daga. (Juan 14:12) Magigin totoo iyan huling mas halawig an panahon ninda asin magdadakul sinda, kaya mas mahiwas an teritoryong maaabot ninda. Ibabalangibog ninda an maugmang bareta kan Kahadian sagkod sa pinakaharayong parte kan daga.—Mat. 24:14; 28:19, 20; Gibo 1:8.

⁵ Talagang nangyayari na ini ngunyan. Minsan siring, arog kan malinaw na sinabi ni Jesus, an pagpahayag kan maugmang bareta matatapos sa itinalaan na panahon ni Jehova. An gabos na propesiya sa Tataramon nin Diyos manungod sa dakula asin makangangalas na aldaw ni Jehova nagpaparisang harani na iyan.—Joel 2:31; Sof. 1:14-18; 2:2, 3; 1 Ped. 4:7.

⁶ Huling nasasabutan ta kun ano an kabutan ni Jehova sa huring parteng ini kan mga aldaw, kaipuhan na urog pa kitang maghinguwa sa paggibo kan kahagadan nin Diyos. Kaya dapat na aram tang marhay kun paano naghihiro an organisasyon nin Diyos asin lubos kitang makikooperar diyan. An paghiro kaiyan nakabasar sa mga prinsipyo sa Kasuratan, kaiba na an mga katugunan, pagbuot, regulasyon, asin katukduan na yaon sa ipinasabong na Tataramon nin Diyos.—Sal. 19:7-9.

⁷ Pag sinusunod kan mga lingkod ni Jehova an siring na paggiya na basado sa Bibliya, namumuhay asin nagtatarabangan sinda na may katuninungan saka pagkasararo. (Sal. 133:1; Isa. 60:17; Roma 14:19) Ano an nagpapakusog sa pagkasararo kan satong mga tugang sa gabos na lugar? Pagkamuot. Iyan an nagmomotibar sa sato asin sulot ta iyan. (Juan 13:34, 35; Col. 3:14) Huling pinagkakasararo kita ni Jehova Diyos bilang mga lingkod niya, nakakasabay kita sa langitnon na kabtang kan saiyang organisasyon.

AN LANGITNON NA KABTANG KAN ORGANISASYON NI JEHOVA

⁸ An mga propeta na si Isaias, Ezequiel, asin Daniel nakahiling nin mga bisyon kan langitnon na kabtang kan organisasyon ni Jehova. (Isa., kap. 6; Ezeq., kap. 1; Dan. 7:9, 10) Nakahiling man si apostol Juan nin bisyon kan langitnon na areglong ini asin tinawan niya kita nin ideya manungod diyan sa libro nin Kapahayagan. Nahiling niya si Jehova na nakatukaw sa mamuraway na trono kaiba an mga anghel, na nagpapahayag: “Banal, banal, banal an Diyos na Jehova, an Makakamhan sa Gabos, na iyo kaidto asin iyo ngunyan asin iyo an madatong.” (Kap. 4:8) Nahiling man ni Juan na “nakatindog harani sa trono . . . an sarong kordero,” an Kordero nin Diyos, si Jesu-Cristo.—Kap. 5:6, 13, 14; Juan 1:29.

⁹ An bisyon na ini manungod ki Jehova na nakatukaw sa trono nagpaparisa na siya an Payo kan organisasyon na ini. Mapadapit sa saiya asin sa superyor na posisyon niya, sinasabi kan 1 Cronica 29:11, 12: “Saimo, O Jehova, an kadakulaan, an kapangyarihan, an kagayunan, an kamurawayan, pati an kamahalan, huling saimo an gabos na bagay sa kalangitan asin sa daga. Saimo an pagkahadi, O Jehova. Ika an Saro na ilinalangkaw an sadiri bilang pamayo kan gabos. Hali sa saimo an mga kayamanan saka an kamurawayan, asin ika an namamahala sa gabos na bagay, asin nasa kamot mo an kakusugan saka kapangyarihan, asin kaya kan saimong kamot na ibantog an siisay man saka pakusugon an gabos.”

¹⁰ Bilang kapwa trabahador ni Jehova, si Jesu-Cristo igwa nin halangkaw na posisyon sa kalangitan, asin tinawan siya nin dakulang awtoridad. Sa katunayan, “ipinasairarom man kan Diyos an gabos na bagay sa saiyang mga bitis asin ginibo siyang pamayo kan gabos na bagay may koneksiyon sa kongregasyon.” (Efe. 1:22) Sinabi ni apostol Pablo manungod ki Jesus: “Ibinugtak siya nin Diyos sa sarong mas halangkaw na posisyon asin may kabuutan na itinao sa saiya an ngaran na mas urog kisa sa gabos na iba pang ngaran, tanganing sa ngaran ni Jesus magluhod an gabos na tuhod—idtong mga nasa langit asin idtong mga nasa daga saka idtong mga nasa irarom kan daga—asin an gabos na dila hayag na magmidbid na si Jesu-Cristo an Kagurangnan para sa kamurawayan nin Diyos na Ama.” (Fil. 2:9-11) Sa siring, lubos kitang makakapagtiwala sa matanos na panginginot ni Jesu-Cristo.

¹¹ Nahiling ni propeta Daniel sa bisyon an Suanoy kan mga Aldaw na nakatukaw sa Saiyang langitnon na trono saka an mga anghel na “sangribong manangribo [na] padagos na naglilingkod sa saiya, asin sampulong ribo na manampulong ribo an nakatindog sa atubangan niya.” (Dan. 7:10) Sa Bibliya, an hukbong ini nin mga anghel inaapod na mga “espiritu para sa banal na paglilingkod, na isinusugo tanganing maglingkod sa mga magkakamit nin kaligtasan.” (Heb. 1:14) An gabos na anghel na ini inorganisar na igwa nin kanya-kanyang katungdan na may awtoridad sa laog kan organisasyon nin Diyos.—Col. 1:16.

¹² Kun tinatawan niyato nin panahon na hurop-hurupon an mga detalyeng ini kan langitnon na kabtang kan organisasyon ni Jehova, masasabutan ta an nagin reaksiyon ni Isaias sa bisyon na diyan ‘nahiling niya si Jehova na nakatukaw sa sarong halangkawon saka nakataas na trono,’ asin “may mga serafin na nakatindog sa itaas niya.” Sinabi ni Isaias: “Hirak man sa sako! Garo na man sana ako gadan, huling saro akong tawong maati an mga ngabil, asin nag-iistar ako sa kaibanan nin banwaan na maati an mga ngabil; huling an Hadi nahiling kan mga mata ko, si Jehova mismo na pamayo nin mga hukbo!” Talagang napahangang marhay si Isaias asin pagmati niya saditon siya kan masabutan niya kun gurano kahiwas kan organisasyon ni Jehova. Napahiro siyang marhay kan eksperyensiyang ini kaya kan may pangapudan hali sa langit mapadapit sa espesyal na gibuhon na pagbalangibog kan mga paghukom ni Jehova, ini an nagin reaksiyon ni Isaias: “Uya ako! Isugo mo ako!”—Isa. 6:1-5, 8.

¹³ Huling nasasabutan kan banwaan nin Diyos kun ano an Saiyang organisasyon asin pinapahalagahan ninda iyan, arog man kaiyan an saindang reaksiyon. Mantang nag-aabante an organisasyon, naghihinguwa kitang makasabay diyan. Nagmamaigot kitang ipahiling an pagtitiwala ta sa organisasyon ni Jehova ngunyan.

NAG-AABANTE AN ORGANISASYON NI JEHOVA

¹⁴ Sa kapitulo 1 kan propesiya ni Ezequiel, ipinapahiling na si Jehova nakalunad sa sarong dakulaon na karwahe sa langit. An mamuraway na lunadan na ini nagrerepresentar sa dai nahihiling na kabtang kan organisasyon ni Jehova. An paglunad niya sa karwaheng ini nangangahulugan na may kabuutan niya iyan na ginigiyahan asin ginagamit uyon sa saiyang katuyuhan.—Sal. 103:20.

¹⁵ An kada ruweda kan karwaheng ini igwa nin saro pang ruweda sa laog kaiyan. Pareho an diyametro kaiyan saka magkaekis. Huli kaini, nakakaya kan mga iyan na “magpasiring sa arin man sa apat na direksiyon.” (Ezeq. 1:17) An mga ruweda puwedeng magbago tulos nin direksiyon. Pero, dai buot sabihon na mayong nagkokontrol o intelihenteng nagpapadalagan sa karwaheng ini. Dai pinapabayaan ni Jehova an saiyang organisasyon na basta na sana magduman sain man na direksiyon na gustong dumanan kaiyan. Sinasabi kan Ezequiel 1:20: “Minaduman sinda kun sain sinda giyahan kan espiritu.” Kaya si Jehova an nagpapadalagan sa organisasyon niya sain man iyan padumanon kan saiyang espiritu. An dapat na ihapot niyato sa satong sadiri, ‘Nakakasabay daw ako diyan?’

¹⁶ Tanganing makasabay kita sa organisasyon ni Jehova, bako sanang pag-atender sa mga pagtiripon asin pagpartisipar sa ministeryo sa langtad an kaipuhan. Sa panginot, nakakasabay kita kun kita nag-uuswag asin nagtatalubo sa espirituwal. ‘Sinisiyerto ta kun ano an mas importanteng mga bagay’ asin nagsusubaybay kita sa pinakabagong mga programa nin espirituwal na pagpakakan. (Fil. 1:10; 4:8, 9; Juan 17:3) Dapat man na girumdumon ta na tanganing magin organisado, kaipuhan an marahay na koordinasyon asin kooperasyon. Kaya dapat na masabutan ta na mahalagang gamiton niyato sa madunong na paagi an satong panahon, kusog, talento, asin materyal na mga bagay na ipinagkatiwala sa sato ni Jehova tanganing matapos an gibuhon niya. Mantang nagsasabay kita sa langitnon na karwahe ni Jehova, an satong pamumuhay nagigin kauyon kan mensaheng ibinabalangibog ta.

¹⁷ Sa tabang kan organisasyon ni Jehova, nag-aabante kita sa paggibo kan kabutan nin Diyos. Tandaan na si Jehova an nagpapadalagan kan langitnon na karwaheng ini. Kaya pag minasabay kita sa karwahe niya, ipinapahiling niyato na iginagalang ta si Jehova asin nagtitiwala kita sa satong Dakulang Gapo. (Sal. 18:31) Nanunuga an Bibliya: “Tatawan ni Jehova nin kusog an saiyang banwaan. Bebendisyunan ni Jehova nin katuninungan an saiyang banwaan.” (Sal. 29:11) Huling kabilang kita sa organisasyon ni Jehova ngunyan, nagkakaigwa kita kan kusog asin katuninungan na bendisyon niya sa saiyang organisadong banwaan. Iyo, sigurado, padagos na mapapasato an abundang bendisyon mantang ginigibo ta an kabutan ni Jehova ngunyan asin sagkod pa man.