‘Siyertuhon an Urog na Mahalagang mga Bagay’

1, 2. Anong hula mapadapit sa huring mga aldaw an siguradong nakapukaw kan interes kan mga disipulo ni Jesus, asin taano?

NAKAIBANAN man giraray ni Pedro, Santiago, Juan, asin Andres an saindang Kagurangnan na sinda sana. Pigpaparaisip ninda an nainot na sinabi ni Jesus mapadapit sa pagkalaglag kan templo. (Mar. 13:1-4) Kaya, naghapot sinda: ‘Sabihi kami, Nuarin mangyayari an mga bagay na ini? Asin ano an tanda kan saimong pagpadigdi, asin kan katapusan nin kinaban [“sistema nin mga bagay,” NW]?’ (Mat. 24:1-3) Sinabi ni Jesus sa sainda an dapit sa mga pangyayari, o mga kamugtakan, na dai sana maresulta sa darakulang pagbabago sa buhay kundi magseserbi man na tanda kan huring mga aldaw kan maraot na sistema nin mga bagay ni Satanas. Siguradong nagin interesado an mga disipulo ni Jesus sa sarong partikular na pangyayari. Pagkatapos sabihon an makaturutristeng mga bagay arog kan mga giyera, kakulangan nin kakanon, asin paglakop nin katampalasanan, ihinula ni Jesus an sarong positibong bagay na kabtang man kan tanda kan huring mga aldaw. Siya nagsabi: ‘Ining ebanghelyo nin kahadian ihuhulit sa bilog na kinaban sa pagpatotoo sa gabos na nasyon; dangan madatong an katapusan.’—Mat. 24:7-14.

² Nakaibanan na kan mga disipulo si Jesus sa paghuhulit kan maugmang bareta kan Kahadian. (Luc. 8:1; 9:1, 2) Posibleng nagirumduman ninda na sinabi niya: ‘Totoong gayo na kadakul kan anihon, alagad kadiit kan paraani. Makimahirak ngani kamo sa Kagurangnan nin anihon na magsubol nin mga paraani sa saiyang anihon.’ (Luc. 10:2) Pero paano sinda mahulit “sa bilog na kinaban” asin ‘magpapatotoo sa gabos na nasyon’? Sain kukuanon an mga paraani? Kun puwede lang kutana nindang matanaw an ngapit mantang nakatukaw kaiba ni Jesus kan aldaw na iyan! Daing duda na napangalas kutana sinda na mahiling an kautuban kan mga tataramon na idto na nababasa ta ngunyan sa Mateo 24:14.

3. Paano nauutob ngunyan an Lucas 21:34, asin anong pagsiyasat sa sadiri an maninigo tang gibuhon?

³ Nabubuhay kita sa panahon na nauutob na an hula ni Jesus. Minilyon na an nakikikabtang sa paghuhulit kan maugmang bareta kan Kahadian sa bilog na daga. (Isa. 60:22) Pero, ipinarisa ni Jesus na an iba madidipisilan na mapagdanay an saindang pokus sa huring mga aldaw na ini. Mapapaduman sa ibang mga bagay an saindang atensiyon asin mapapagabatan. (Basahon an Lucas 21:34.) Nahihiling ta man ngunyan an kautuban kaiyan. May mga lingkod nin Diyos na an atensiyon napapaduman sa ibang mga bagay. Puwede iyan marisa sa mga desisyon ninda mapadapit sa sekular na trabaho, halangkaw na edukasyon, asin pagkaigwa nin materyal na mga bagay, siring man sa panahon na ginagamit ninda sa isport asin pag-aling-aling. An iba nagagabatan huli sa mga kasakitan asin kahaditan sa aroaldaw na buhay. Haputon an saimong sadiri: ‘Kumusta ako? Ano an ipinaparisa kan mga desisyon ko manungod sa kun sain nakapokus an buhay ko?’

4. (a) Ano an ipinamibi ni Pablo para sa mga Kristiyano sa Filipos, asin taano? (b) Ano an pag-uulayan ta sa artikulong ini saka sa masunod, asin paano iyan makakatabang sa sato?

⁴ Kinaipuhan kan mga Kristiyano kan inot na siglo na magmaigot tanganing magdanay na panginot sa sainda an espirituwal na mga bagay. Nahiling ni apostol Pablo na kaipuhan niyang ipamibi na lugod ‘mamidbid [“masiyerto,” NW] kan mga taga Filipos an mga bagay na urog karahay.’ (Basahon an Filipos 1:9-11.) Arog ni apostol Pablo, an kadaklan kaidto nagpapahiling nin ‘urog na kaisugan [“kusog nin buot,” NW] sa pagtaram kan tataramon nin Diyos na dai nin takot.’ (Fil. 1:12-14) An kadaklan sa sato ngunyan makusog man an buot na naghuhulit kan Tataramon nin Diyos. Pero, an pag-estudyar daw sa mga ginigibo ngunyan sa laog kan organisasyon ni Jehova makakatabang sa sato na urog pa nganing magpokus sa pinakamahalagang gibuhon na paghuhulit? Iyo nanggad! Sa artikulong ini, hurop-hurupon niyato an areglong ibinugtak ni Jehova tanganing mautob an Mateo 24:14. Sa ano nakapokus an saiyang organisasyon, asin paano makakamotibar sa sato asin sa satong pamilya an pakaaram kaini? Sa masunod na artikulo, pag-uulayan niyato kun ano an makakatabang sa sato na makatagal asin danay na makasabay sa paghiro kan organisasyon ni Jehova.

NAGHIHIRO AN LANGITNON NA KABTANG KAN ORGANISASYON NI JEHOVA

5, 6. (a) Taano ta nagtao si Jehova nin mga bisyon dapit sa langitnon na kabtang kan saiyang organisasyon? (b) Ano an nahiling ni Ezequiel sa bisyon?

⁵ Dakul na bagay an dai na iiniba ni Jehova sa saiyang nasusurat na Tataramon. Halimbawa, dai siya nagtao nin mga detalye dapit sa kun paano nagpupunsiyonar an hutok o an uniberso, dawa ngani interesanteng marhay kutana an siring na impormasyon! Imbes, nagtao si Jehova nin impormasyon na kaipuhan niyato tanganing masabutan an saiyang mga katuyuhan asin mamuhay kauyon kaiyan. (2 Tim. 3:16, 17) Interesante nanggad na an Bibliya talagang nagtatao nin ideya dapit sa dai nahihiling na kabtang kan organisasyon ni Jehova! Napapahanga kitang marhay pag binabasa niyato an mga paglaladawan dapit sa langitnon na areglo ni Jehova na isinurat ni Isaias, Ezequiel, asin Daniel saka sa Kapahayagan ni Juan. (Isa. 6:1-4; Ezeq. 1:4-14, 22-24; Dan. 7:9-14; Kap. 4:1-11) Garo man sana binutong ni Jehova an nakakalipod na kurtina tanganing may maaninaw kita sa mga nangyayari sa kalangitan. Taano ta itinao niya an impormasyon na ini?

⁶ Gusto ni Jehova na dai ta nuarin man paglingawan na kita kabtang nin sarong unibersal na organisasyon. Mas dakul pa an nangyayari bilang pagsuportar sa mga katuyuhan ni Jehova kisa sa kaya niyatong mahiling. Halimbawa, nahiling ni Ezequiel an dai nahihiling na kabtang kan organisasyon ni Jehova na ilinaladawan paagi sa sarong dakulaon na karwahe sa langit. Nagigibo kan karwaheng ini na maghiro nin marikas asin magliwat tulos nin direksiyon. (Ezeq. 1:15-21) Sa kada pagtalibong kan mga ruweda, harayuon an naaabot kaiyan. Sa bisyon, naaninag man ni Ezequiel an Nakasakay sa karwahe. Sinabi niya: ‘Nahiling ko, siring sa kintab nin elektrum, garo kalayo sa palibot. Sarong kabaing kan kamurawayan kan KAGURANGNAN.’ (Ezeq. 1:25-28, An Banal na Biblia) Siguradong napangalas asin napahanga nanggad si Ezequiel kan mahiling an bisyon na iyan! Nahiling niya na lubos na kontrolado ni Jehova an saiyang organisasyon, na minamaniobra an paghiro kaiyan paagi sa saiyang banal na espiritu. Makangangalas nanggad na representasyon kan naghihirong langitnon na kabtang kan organisasyon ni Jehova!

7. Paano nagtatao sa sato nin kumpiyansa an bisyon na itinao ki Daniel?

⁷ Dakul man an nahiling ni Daniel na matao sa sato nin kumpiyansa. Tinugutan siya na mahiling si Jehova bilang ‘an Suanoy kan mga Aldaw’ na nakatukaw sa trono na may mga laad nin kalayo. An trono igwa nin mga ruweda. (Dan. 7:9) Gusto ni Jehova na mahiling ni Daniel na an Saiyang organisasyon naghihiro, na ginigibo an Saiyang katuyuhan. Nahiling man ni Daniel an ‘garo sarong aki nin tawo,’ si Jesus, na inawtorisaran na pangatamanan an daganon na kabtang kan organisasyon ni Jehova. An perpektong pamamahala ni Cristo bakong pirang taon sana. Imbes, iyan ‘pagsakop na daing katapusan, na bakong maagi sana, asin an saiyang kahadian dai nanggad mararaot.’ (Dan. 7:13, 14) Napapahiro kita na magtiwala ki Jehova asin pahalagahan an mga ginigibo niya. Tinawan niya nin ‘kapangyarihan, asin kamurawayan, asin kahadian’ an saiyang probado nang Aki, si Jesus. Nagtitiwala si Jehova sa saiyang Aki. Kaya, makakapagtiwala man kita ki Jesus bilang satong Lider.

8. Ano an nagin epekto ki Ezequiel asin Isaias kan mga bisyon na itinao ni Jehova, asin ano an maninigong epekto kaiyan sa sato?

⁸ Ano an maninigong magin epekto sa sato kan mga bisyon na ini dapit sa dai nahihiling na kabtang kan organisasyon ni Jehova? Arog ni Ezequiel, siguradong nakakamati kita nin may pagkangirhat na paggalang asin napapahiro na magpakumbaba huli sa mga ginigibo ni Jehova. (Ezeq. 1:28) An paghurop-hurop dapit sa organisasyon ni Jehova makakamotibar sa sato na humiro, arog kan nangyari ki Isaias. Kan magkaoportunidad siya na sabihon sa iba an manungod sa mga ginigibo ni Jehova, inaprobetsaran niya iyan na mayo nin pag-alangan. (Basahon an Isaias 6:5, 8.) Kumpiyado si Isaias na sa tabang ni Jehova, mapapangganahan niya an ano man na kadipisilan. Huling kita nagkaigwa man nin ideya dapit sa dai nahihiling na kabtang kan organisasyon ni Jehova, kita maninigo man na makamati nin may pagkangirhat na paggalang asin mamotibar na humiro. Nakakapahiro nanggad sa buot na hurop-hurupon an dapit sa organisasyon na iyan, na padagos na naghihiro asin lubos na nakapokus sa paggibo kan mga katuyuhan ni Jehova!

AN DAGANON NA KABTANG KAN ORGANISASYON NI JEHOVA

9, 10. Taano ta kaipuhan an nahihiling na kabtang kan organisasyon ni Jehova?

⁹ Paagi sa saiyang Aki, nag-establisar si Jehova nin areglo digdi sa daga na nakikipagtabangan sa dai nahihiling na kabtang kan organisasyon. Taano ta kaipuhan an sarong nahihiling na areglo tanganing mautob an gibuhon na sinambit sa Mateo 24:14? Pag-ulayan niyato an tulong dahilan.

¹⁰ Inot, sinabi ni Jesus na an saiyang mga disipulo maghuhulit ‘sagkod sa kapuro-puruhi kan daga.’ (Gui. 1:8) Ikaduwa, kakaipuhanon an mga areglo tanganing matawan nin espirituwal na kakanon asin mapangatamanan an mga nakikikabtang sa gibuhon na ini. (Juan 21:15-17) Ikatulo, kaipuhan an mga probisyon tanganing an mga naghuhulit kan maugmang bareta makapagtiripon para magsamba ki Jehova asin matukduan kun paano gigibuhon an paghuhulit. (Heb. 10:24, 25) Dai ini magigibo nin basta-basta sana. Tanganing magin mapanggana an mga parasunod ni Cristo, kaipuhan na organisadong marhay an gibuhon.

11. Paano ta ikakapahiling an satong pagsuportar sa mga areglo na ginigibo kan organisasyon ni Jehova?

¹¹ Paano niyato ikakapahiling an satong pagsuportar sa mga areglo na ginigibo kan organisasyon ni Jehova? An sarong importanteng paagi iyo na pirming magtiwala sa mga pinagkakatiwalaan ni Jehova asin ni Jesus na manginot sa sato sa gibuhon na paghuhulit. Dakul na aktibidad o pasuhan sa kinaban ngunyan an puwede kutanang makaagaw kan atensiyon kan mga nanginginot sa satuya. Pero, sa ano pirmi nakapokus an nahihiling na kabtang kan organisasyon ni Jehova?

NAKAPOKUS SA “UROG NA MAHALAGANG MGA BAGAY”

12, 13. Paano inuutob kan eksperyensiyadong mga elder an saindang asignasyon, asin taano ta nakakaparigon iyan sa saimo?

¹² An eksperyensiyadong mga elder sa bilog na kinaban ninombrahan tanganing organisaron asin panginutan an gibuhon na paghuhulit kan Kahadian sa kadagaan na pinaglilingkudan ninda. Kun an mga tugang na ini naggigibo nin mga desisyon, ginagamit nindang giya an Tataramon nin Diyos, na ginigibo iyan na ‘ilawan sa saindang mga bitis asin liwanag sa saindang dalan,’ asin udok na namimibi para sa paggiya ni Jehova.—Sal. 119:105; Mat. 7:7, 8.

¹³ Arog kan mga nanginginot kaidtong inot na siglo, an mga elder na nag-oorganisar ngunyan kan gibuhon na paghuhulit dedikado “sa paghulit kan tataramon.” (Gui. 6:4) Naggagaya-gaya sindang marhay sa nahihiling na pag-uswag kan paghuhulit kan maugmang bareta sa nasasakupan ninda asin sa bilog na kinaban. (Gui. 21:19, 20) Dai sinda nagtatao nin kadakul na susundon asin prosedimiyento. Imbes, sinusunod ninda an Kasuratan asin an paggiya kan banal na espiritu nin Diyos mantang naggigibo sinda nin mga areglo na kaipuhan tanganing makatabang sa pagpauswag kan gibuhon na paghuhulit. (Basahon an Guibo 15:28.) Sa paggibo kaiyan, an responsableng mga tugang na ini nagtatao nin marahayon na halimbawa para sa gabos na nasa lokal na mga kongregasyon.—Efe. 4:11, 12.

14, 15. (a) Anong mga areglo an ginigibo bilang pagsuportar sa paghuhulit sa bilog na daga? (b) Ano an sabuot mo mapadapit sa saimong ginigibo sa pagsuportar sa paghuhulit kan Kahadian?

¹⁴ Dai nahihiling kan dakul an padagos na pagpapagal nin mga tugang sa pag-andam kan espirituwal na kakanon sa satong mga publikasyon, pagtiripon, asin kumbensiyon. Rinibong boluntaryo an mahigos na nagtatrabaho tanganing itradusir an espirituwal na kakanon na ini sa mga 600 na lengguwahe tanganing manudan kan pinakadakul na tawo sagkod sa mapupuwede an dapit sa ‘mga mapangyaring gibo nin Diyos’ sa sainda mismong lengguwahe. (Gui. 2:7-11) May mga hoben na tugang na nagtatrabaho sa paggibo kan satong mga literatura gamit an marikason na mga makina sa pag-imprenta asin paggibo nin libro. An mga literaturang ini idinidistribwir sa mga kongregasyon dawa sa pinakahararayong lugar sa kinaban.

¹⁵ Dakul na areglo an ginigibo tanganing makapagpokus kita sa paghuhulit kan maugmang bareta sa teritoryo kan satong lokal na kongregasyon. Halimbawa, rinibo an nagboboluntaryo sa pagtugdok nin mga Kingdom Hall asin Assembly Hall, pagtabang sa mga naapektaran nin natural na mga kalamidad o napapaatubang sa medikal na emerhensiya, pag-organisar kan satong mga asamblea asin kumbensiyon, asin pagtukdo sa teokratikong mga paadalan; pira sana ini sa mga aktibidad na daing gayo nahihiling. Ano an katuyuhan kan gabos na ini? Tanganing magin mas madali an paghuhulit kan maugmang bareta, mapauswag an espirituwalidad kan mga nakikikabtang sa gibuhon na ini, asin palakupon an tunay na pagsamba. Nagdanay daw na nakapokus sa urog na mahalagang mga bagay an daganon na kabtang kan organisasyon ni Jehova? Iyo nanggad!

SUNUDON AN HALIMBAWA KAN ORGANISASYON NI JEHOVA

16. Ano an sarong marahay na pag-adalan bilang indibiduwal o bilang pamilya?

¹⁶ Pighuhurop-hurop ta daw sa pana-panahon an mga ginigibo kan organisasyon ni Jehova? Sa pampamilyang pagsamba o personal na pag-adal, an iba nagtatao nin panahon tanganing magsiyasat asin maghurop-hurop dapit sa mga bagay na iyan. Nakakaugmang pag-adalan an mga bisyon ni Isaias, Ezequiel, Daniel, asin Juan. An librong Jehovah’s Witnesses—Proclaimers of God’s Kingdom asin an iba pang mga publikasyon o DVD na makukua sa saimong lengguwahe nagtutukdo nin interesanteng mga bagay dapit sa organisasyon.

17, 18. (a) Paano ka nakinabang sa artikulong ini? (b) Anong mga hapot an maninigo tang pag-isipan?

¹⁷ An paghurop-hurop sa mga ginigibo ni Jehova paagi sa saiyang organisasyon marahay para sa sato. Bilang pagsuportar sa makangangalas na organisasyon na ini, lugod na magin determinado kitang danay na nakapokus sa urog na mahalagang mga bagay. Sa paggibo kaiyan, mapapakusog kita na magin determinado arog ni Pablo, na nagsurat: “Mantang igwa kami kan ministeryong ini suno sa pagkahirak na ipinahiling sa samo, dai kami minasuko.” (2 Cor. 4:1, NW) Pinarigon niya man an buot kan mga kapwa niya trabahador: “Dai kita mag-untok sa paggibo nin karahayan, huli ta sa talaan na kapanahunan kita mag-aani kun kita dai mangluya.”—Gal. 6:9, NW.

¹⁸ Igwa daw kita nin mga kaipuhan na baguhon bilang indibiduwal o bilang pamilya tanganing masiyerto an urog na mahalagang mga bagay sa satong pang-aroaldaw na buhay? Puwede daw niyatong pasimplehon an satong buhay o inaan an dai kinakaipuhan na mga bagay tanganing urog kitang makapagpokus sa pinakamahalagang gibuhon na paghuhulit? Sa sunod na artikulo, pag-uulayan ta an limang bagay na makakatabang sa sato na danay na makasabay sa paghiro kan organisasyon ni Jehova.