Siisay Man Nanggad Ako?

ANO AN GIGIBUHON MO?

Imahinara an eksenang ini: Mayo pang diyes minutos sa party si Karen kan makadangog siya nin pamilyar na boses sa may likod niya.

Pag atubang ni Karen, nahiling niya an amiga niyang si Jessica na may kapot na duwang beer, na nakabukas na. Iinabot ni Jessica an sarong bote ki Karen sabay sabing, “Bako ka naman bagang sadit na aki kaya puwede ka nang mag-uruugma maski papa’no, bako?”

Gustong magsayuma ni Karen, kaya lang amiga niya si Jessica. Saka habo niyang isipon kaini na killjoy siya. Saro pa, marahay man na babayi si Jessica. Kun nag-iinom ngani siya, buot sabihon bako man talaga iyan maraot. ‘Para mainom nin beer,’ sa buot-buot ni Karen. ‘Dai man kami ma-drugs.’

Kun ika si Karen, ano an gigibuhon mo?

MAG-ISIP KA NGUNA!

Para makagibo nin madunong na desisyon sa sitwasyon na ini, kaipuhan na midbid mo an sadiri mo. Buot sabihon, aram mo talaga kun siisay ka asin kun ano an pinaninindugan mo. Kun aram mo an mga ini, kaya mong kontrulon an buhay mo asin dai ka mapakontrol sa iba.—1 Corinto 9:26, 27.

Paano ka magkakaigwa kan arog kaiyan na paninindugan? Makakatabang an pagsimbag sa minasunod na mga hapot.

1 SAIN AKO MAKUSOG?

Pag aram mo an saimong mga abilidad saka marahay na mga ugali, magigin mas makusog an tiwala mo sa sadiri.

HALIMBAWA SA BIBLIYA: Si apostol Pablo nagsurat: “Dawa pa bako akong mahusay sa pagtaram, bako nanggad iyan totoo kun kaaraman an pag-uulayan.” (2 Corinto 11:6) Huling hararom an kaaraman ni Pablo sa Kasuratan, padagos siyang nakapanindugan dawa ginigipit nin iba. Dai niya tinugutan na magluya an tiwala niya sa sadiri maski negatibo an sinasabi ninda.—2 Corinto 10:10; 11:5.

MIDBIDON PA AN SADIRI: Isurat an sarong talento o sarong kakayahan na igwa ka.

Isurat naman an sarong magayon na ugali na igwa ka. (Halimbawa, may pagmalasakit ka daw sa iba? matinao ka daw? maaasahan ka daw? pirmi ka daw na nasa oras?)

2 SAIN AKO MALUYA?

Kun paanong an sarong kadena puwedeng maputol sa pinakamaluyang parte kaiyan, madalion sanang maraot an pagkatawo mo kun mapadaog ka sa mga kaluyahan mo.

HALIMBAWA SA BIBLIYA: Aram ni Pablo kun sain siya maluya. Siya nagsurat: “Sa kalaog-laugi kan sakuyang pagkatawo, ikinakaugma ko nanggad an katugunan nin Diyos, alagad nahihiling ko sa sakuyang hawak an saro pang katugunan na nakikipaglaban sa katugunan kan sakong isip asin dinadara ako kaiyan na bihag sa katugunan nin kasalan.”—Roma 7:22, 23.

MIDBIDON PA AN SADIRI: Anong kaluyahan an kaipuhan mong mapaglabanan?

3 ANO AN MGA GUSTO KONG MAGIBO?

Masakay ka daw nin taxi tapos sasabihon mo sa driver na maglibot-libot sana sa sarong bloke nin subdibisyon sagkod na maubusan ini nin gasolina? Kapatalan nanggad iyan, saka magastos pa!

Ano an leksiyon? Pag may mga gusto kang magibo, magkakaigwa nin direksiyon an buhay mo. Aram mo kun pasain ka saka kun paano makakaduman.

HALIMBAWA SA BIBLIYA: Sabi ni Pablo: “An sakuyang pagdalagan bako sa paaging mayo nin direksiyon.” (1 Corinto 9:26) Imbes na magpaanod na sana sa sulog nin buhay, nagkaigwa siya nin mga gustong maabot asin namuhay kauyon kaiyan.—Filipos 3:12-14.

MIDBIDON PA AN SADIRI: Isurat an tulong bagay na gusto mong magibo bago matapos an sunod na taon.

4 ANO AN MGA PINANININDUGAN KO?

Kun mayo ka nin pinaninindugan, magigin paburubago an desisyon mo. Garo ka sarong hunyango (chameleon), na nagbuburu-bago nin kulor para makibagay sa kairiba mo—senyales na dai mo talaga midbid an sadiri mo.

Pero, pag an mga ginigibo mo kauyon kan mga pinaninindugan mo, buot sabihon dai mo piglilingawan kun siisay ka talaga—ano man an gibuhon kan iba.

HALIMBAWA SA BIBLIYA: Posible na kan tin-edyer pa sana si propeta Daniel, “nagdesisyon [na siya] sa saiyang puso” na susundon niya an mga katugunan nin Diyos, dawa ngani naparayo siya sa saiyang pamilya. (Daniel 1:8) Dahil diyan, nagin totoo siya sa saiyang sadiri. Namuhay si Daniel kauyon kan pinaninindugan niya.

MIDBIDON PA AN SADIRI: Ano an mga bagay na pinaninindugan mo? Halimbawa: Nagtutubod ka daw sa Diyos? Kun iyo, taano? Ano an nakakumbinsir sa saimo na talagang may Diyos?

Naniniwala ka daw na para sa ikakarahay mo an mga pamantayan nin Diyos sa moral? Kun iyo, taano?

Ngunyan, arin an mas gugustuhon mo—magin arog sa sarong alang na dahon na piglalayog-layog nin maluyang duros o puon nin kahoy na dai natutumba dawa may makusog na bagyo? Mas lalo mo pang midbidon an sadiri mo, asin magigin arog ka kan puon nin kahoy na iyan. Matatabangan ka kaiyan na masimbag an hapot na Siisay Man Nanggad Ako?