HAPOT 9
Dapat Daw Akong Maniwala sa Ebolusyon?
ANO AN GIGIBUHON MO?
Imahinara an eksenang ini: Nagduduwa-duwa si Alex. Dati na siyang nagtutubod sa Diyos asin sa paglalang. Pero ngunyan, pinapanindugan kan maestro ninda sa biology na totoo an ebolusyon asin may matibay daa iyan na basehan sigun sa pag-aadal kan mga siyentista. Habo man niyang an magin paghiling saiya dai siyang aram. ‘Tutal,’ an sabi niya sa sadiri, ‘kun napatunayan ngani kan mga siyentista na totoo an ebolusyon, siisay man ako para kumontra sainda?’
Kun ika si Alex, maniniwala ka daw sa ebolusyon huli sana ta sinasabi sa mga libro na totoo iyan?
MAG-ISIP KA NGUNA!
Sa parati, pag may pinagdederebatehan, madalion sanang magsabi an nasa mag-ibong na lado kun ano an pinaniniwalaan ninda, pero dai man talaga ninda aram kun taano ta pinaniniwalaan ninda iyan.
Nagtutubod an iba sa paglalang huli sana ta iyan an itinukdo sa sainda sa relihiyon ninda.
Naniniwala an iba sa ebolusyon huli sana ta iyan an itinukdo sa sainda sa eskuwelahan.
ANOM NA HAPOT NA DAPAT PAG-ISIPAN
An Bibliya nagsasabi: “An lambang harong igwa nin naggibo, alagad an naggibo kan gabos na bagay iyo an Diyos.” (Hebreo 3:4) Tama sana daw na paniwalaan iyan?
Pag sinabi mong mayo nin Kaglalang, bako iyan kapani-paniwala saka makangingisi pa ngani ta garo mo man sana sinabing mayo nin naggibo kan harong na ini
AN SABI KAN IBA: An gabos daang bagay sa uniberso resulta kan inaapod na big bang, sarong makusugon na pagsabog sa espasyo (outer space) na nagkataon sana.
1. Siisay o ano an nagkawsa kan big bang?
2. Arin an mas kapani-paniwala—na an gabos na bagay nagpuon sa mayo o na an gabos na bagay may saro na naggibo?
AN SABI KAN IBA: An tawo daa hali sa hayop.
3. Kun an tawo hali sa hayop—halimbawa, sa mga ukay (monkey)—taano ta dakulaon an pagkakaiba kan kakayahan nin isip nin tawo kun ikukumparar sa ukay?
4. Taano ta komplikadong marhay dawa an “pinakasimpleng” mga bagay na may buhay?
AN SABI KAN IBA: Napatunayan na daang totoo an ebolusyon.
5. Napag-adalan na daw talaga kan tawong nagsasabi kaiyan an mga ebidensiya na totoo daa an ebolusyon?
6. Gurano kadakul an naniniwala sa ebolusyon huli sana ta nasabihan sinda na an gabos na intelektuwal na tawo naniniwala diyan?
“Kun naglalakaw ka sa kadlagan tapos nakahiling ka nin sarong magayon na harong, iisipon mo daw: ‘Wow, magayunon man! Siguradong tamang-tama su pagkaturumba kan mga kahoy kaya nahaman an harong na ini.’ Siyempre dai! Dai kita maisip kaiyan. Kaya, taano ta maniniwala kita na an gabos na bagay sa uniberso bigla na sanang nagralataw?”—Julia.
“Halimbawa ngaya may nagsabi saimo na may nagsabog sa sarong imprentahan tapos nagtiripsik su tinta sa pader saka sa kisame kaya may bigla na sanang nahaman na sarong kumpletong diksiyonaryo. Maniniwala ka daw diyan?”—Gwen.
TAANO TA DAPAT NA MAGTUBOD NA MAY DIYOS?
Dinadagka ka kan Bibliya na gamiton an saimong “kakayahan na mag-isip.” (Roma 12:1) Buot sabihon, an pagtubod mo na may Diyos dapat na bako lang dahil sa
PAGMATI (Makusog an pagmati ko na siguradong igwa nin saro na makapangyarihan sa gabos)
IMPLUWENSIYA NIN IBA (Relihiyoso kaya an mga tawo sa lugar mi)
IMPLUWENSIYA KAN PAMILYA (Pinadakula ako kan mga magurang ko na may pagtubod sa Diyos—iyan na an aram ko puon kan aki pa ako)
Imbes, dapat na may matibay kang dahilan sa pagtubod mo.
“Pag nasa klase ako tapos nadadangog ko an paliwanag kan titser mi manungod sa kun paano naggagana an satong hawak, nakakasigurado ako na may Diyos. Igwa nin trabaho an kada parte kan hawak, sagkod sa kasadit-saditing detalye, asin sa parati, dai ta naririparo an pagtrabaho kan mga iyan. Talagang makangangalas an hawak nin tawo!”—Teresa.
“Pag nakakahiling ako nin halangkawon na building, dakulang barko, o awto, pighahapot ko an sadiri ko, ‘Siisay an naggibo kaini?’ Kaipuhan na intelihente an tawo na magibo nin sarong awto, dahil igwa iyan nin saraditon na mga piyesa na dapat gumana nin tama para umandar iyan. Kun may naggibo ngani sa awto, siguradong may naggibo man sa tawo.”—Richard.
“Miyentras na mas pinag-aadalan ko an siyensiya, mas nagigin bakong kapani-paniwala an ebolusyon. . . . Para sako, mas dipisil na ‘magtubod’ sa ebolusyon kisa sa magtubod na may Kaglalang.”—Anthony.
PAG-ISIPAN
Sa ibong nin dakul na mga taon nin pag-research, mayo pa lamang nin napagkakauruyunan na paliwanag an mga siyentista manungod sa ebolusyon. Kun an mga siyentista ngani, na iyo an sinasabing mga eksperto, dai nagkakauruyon sa ebolusyon, salá daw na kontrahon mo an teoriya ninda?