Itinago ni Rahab an mga Espiya

Kan nagduman an mga espiyang Israelita sa siyudad nin Jerico, nagdagos sinda sa harong nin sarong babayi na an pangaran Rahab. Naaraman iyan kan hadi kan Jerico kaya nagsugo ini nin mga suldados sa harong ni Rahab. Itinago niya an duwang espiya sa atop saka itinukdo sa ibang direksiyon an mga suldados. Sinabi niya sa mga espiya: ‘Tatabangan ko kamo ta aram kong kakampi nindo si Jehova asin na sasakupon nindo an lugar mi. Mangako po kamo na ililigtas nindo an pamilya ko.’

Nagsabi ki Rahab an mga espiya: ‘Pangako, dai makukulgan an siisay man na nasa laog kan saimong harong.’ Sinabi pa ninda: ‘Magbugkos ka nin sarong pulang pisi sa saindong bintana, asin makakaligtas an pamilya mo.’

Pinababa ni Rahab an mga espiya sa bintana niya paagi sa pisi. Nagdulag sinda pasiring sa mga bukid asin nagtago nin tulong aldaw bago nagbalik ki Josue. Dangan nagbalyo an mga Israelita sa Salog nin Jordan asin naghanda para sakupon an Dagang Panuga. An Jerico an inot na siyudad na sinakop ninda. Sinabihan sinda ni Jehova na magmartsa palibot sa siyudad nin sarong beses kada aldaw sa laog nin anom na aldaw. Sa ikapitong aldaw, pitong beses sindang nagmartsa palibot sa siyudad. Pagkatapos pinatanog kan mga saserdote an saindang mga trumpeta, asin nagkururahawa nin makusugon an mga suldados. Nagkarurumpag an mga pader kan siyudad! Pero dai nagaba an harong ni Rahab na nasa pader. Nakaligtas si Rahab saka an pamilya niya dahil nagtiwala siya ki Jehova.