Nabanga an Kahadian

Kan si Jehova an sinasamba ni Solomon, matuninong sa Israel. Pero nag-agom si Solomon nin dakul na bakong Israelitang babayi, asin mga diyos-diyosan an sinasamba kan mga ini. Luway-luway na nagbago si Solomon, asin nagsamba na man siya sa mga diyos-diyosan. Angguton si Jehova. Tinaraman niya si Solomon: ‘Hahalion ko sa pamilya mo an pamamahala sa Israel. Mababanga iyan sa duwa. Itatao ko an dakulang parte kaiyan sa saro mong lingkod, asin sadit na parte sana an mawawalat sa pamilya mo.’

May iba pang ginibo si Jehova para malinaw na ipahiling an saiyang desisyon. Kan nasabat kan propetang si Ahias an saro sa mga lingkod ni Solomon na si Jeroboam, ginirisi ni Ahias sa 12 pidaso an pang-ibabaw niyang bado. Sinabi niya ki Jeroboam: ‘Hahalion ni Jehova sa pamilya ni Solomon an pamamahala sa kahadian nin Israel asin babangaon iyan sa duwa. Kuanon mo an sampulong pidaso kaini dahil ika an mamamahala sa sampulong tribo.’ Nabaretaan ini ni Hading Solomon kaya gusto niyang gadanon si Jeroboam! Nagdulag si Jeroboam pa-Ehipto. Kan nagadan si Solomon, an aki niyang si Rehoboam an nagin hadi. Kan panahon na iyan, naisip ni Jeroboam na ligtas nang bumalik sa Israel.

Sinabi ki Rehoboam kan kamagurangan na lalaki sa Israel: ‘Kun marahay an gigibuhon mo sa mga tawo, magigin maimbod sinda saimo.’ Pero an mga hoben na amigo ni Rehoboam nagsabi: ‘Dai ka dapat mahirak sa mga tawo! Pagabaton mo pa an trabaho ninda!’ Sinunod ni Rehoboam an mga hoben niyang amigo. Pinasakitan niya an mga tawo, kaya nagrebelde an mga ini. Ginibo nindang hadi si Jeroboam sa sampulong tribo, na inapod na kahadian nin Israel. Padagos na nagin maimbod ki Rehoboam an natatadang duwang tribo, na inapod na kahadian nin Juda. Banga na ngunyan an 12 tribo nin Israel.

Habo ni Jeroboam na an mga sakop niya magsamba pa duman sa Jerusalem, na nasa kahadian na sakop ni Rehoboam. Aram mo kun taano? Natatakot si Jeroboam na tibaad magrebelde sinda saiya asin suportaran lugod si Rehoboam. Kaya naggibo siya nin duwang bulawan na ugbon na baka dangan sinabihan an mga sakop niya: ‘Harayuon baga an Jerusalem. Digdi na lang kamo magsamba.’ Kaya nagsamba an mga sakop niya sa mga bulawan na ugbon na baka asin nalingawan na naman si Jehova.