Dai Papabayaan ni Jehova an mga Maimbod sa Saiya

‘Dai papabayaan ni Jehova an mga maimbod sa saiya. Sagkod sa panahon na daing talaan sinda babantayan nanggad.’​—SAL. 37:28.

1, 2. (a) Anong mga pangyayari kan ikasampulong siglo B.C.E. an nakabalo sa kaimbodan kan mga lingkod nin Dios? (b) Sa anong tolong kamugtakan binantayan ni Jehova an mga maimbod sa saiya?

IKASAMPULONG siglo B.C.E. kaidto asin panahon idto na gumibo nin desisyon. Dikit pang magkaigwa nin guerra sibil kun dai tinawan nin independensia an diskontentong mga tribo nin Israel sa amihanan. An bagong nombrahan na hade ninda, si Jeroboam, tolos-tolos na huminiro tanganing parigonon an saiyang kapangyarihan paagi sa pag-establisar nin bagong relihion kan Estado. Hinagad nia sa saiyang mga sakop an lubos na kaimbodan. Ano an gigibohon kan maimbod na mga lingkod ni Jehova? Magdadanay daw sindang maimbod sa Dios na saindang sinasamba? Rinibo an nagdanay na maimbod, asin binantayan sinda ni Jehova mantang pinapagdadanay ninda an saindang integridad.​—1 Ha. 12:1-33; 2 Cron. 11:13, 14.

² Binabalo man sa panahon niato an kaimbodan kan mga lingkod nin Dios. “Magmata kamo, magpuka kamo,” an patanid kan Biblia. “An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.” Mapanggana daw niato siang ‘matutumang, na marigon an satong pagtubod’? (1 Ped. 5:8, 9) Siyasaton niato an nagkapirang pangyayari may koneksion sa inagurasyon ni Hadeng Jeroboam kan 997 B.C.E. asin helingon niato kun ano an satong manonodan dian. Durante kan delikadong mga panahon na idto, inapi an maimbod na mga lingkod ni Jehova. Nameligro man sindang maimpluwensiahan nin mga apostata mantang ginigibo ninda an masakit na mga asignasyon. Sa kada saro sa mga kamugtakan na ini, dai pinabayaan ni Jehova an mga maimbod sa saiya sa panahon na iyan, asin iyo man an gigibohon nia ngonyan.​—Sal. 37:28.

Kan Sinda Inaapi

3. Taano ta bakong mapan-api an pagreynar ni Hadeng David?

³ Siyasaton nguna niato an mga kamugtakan kan magin hade si Jeroboam. An Talinhaga 29:2 nagsasabi: “Kun namamahala an siisay man na maraot, nag-aagrangay an banwaan.” Sa pagreynar ni Hadeng David kan suanoy na Israel, an banwaan dai nag-agrangay. Si David bakong sangkap, alagad sia maimbod sa Dios asin nagtiwala sa saiya. An pamamahala ni David bakong mapan-api. Si Jehova nakipagtipan ki David, na nagsasabi: “An saimong kamag-anakan asin an saimong kahadean sierto nanggad na magigin marigon sagkod sa panahon na daing talaan sa atubangan mo; an saimo mismong trono magigin masarig sagkod sa panahon na daing talaan.”​—2 Sam. 7:16.

4. Sa ano nakadepende an mga bendisyon na naeksperyensiahan durante kan pamamahala ni Salomon?

⁴ Kan enot, an pamamahala kan aki ni David na si Salomon matoninong asin maoswag na marhay kaya puede nanggad iyan na magladawan sa maabot na Milenyal na Paghade ni Cristo Jesus. (Sal. 72:1, 17) Mayo ni saro sa 12 tribo nin Israel kan panahon na idto an may dahelan na magrebelde. Minsan siring, may kondisyon an mga bendisyon na nakakamtan ni Salomon asin kan mga sakop nia. Sinabi ni Jehova ki Salomon: “Kun maglalakaw ka sa sakong mga pagboot asin gigibohon an sakong hudisyal na mga desisyon saka talagang ootobon an gabos kong togon paagi sa paglakaw oyon dian, siertong ootobon ko man an tataramon ko sa saimo na sinabi ko ki David na saimong ama; asin mag-eerok nanggad ako sa tahaw kan mga aki ni Israel, asin dai ko papabayaan an sakong banwaan na Israel.”​—1 Ha. 6:11-13.

5, 6. Ano an nagin resulta kan pagigin bakong maimbod ni Salomon sa Dios?

⁵ Kan gurang na si Salomon, sia nagin bakong maimbod ki Jehova asin nagpoon na makikabtang sa falsong pagsamba. (1 Ha. 11:4-6) Si Salomon luway-luway na nagpondo sa pagkuyog sa mga ley ni Jehova asin paorog nang paorog na nagin mapan-api. Nagin grabe na ini kaya dawa sia gadan na, irineklamo sia kan banwaan sa saiyang aki asin kasalihid na si Roboam, asin naghagad sinda nin kaginhawahan. (1 Ha. 12:4) Ano an nagin reaksion ni Jehova kan si Salomon nagin bakong maimbod?

⁶ An Biblia nagsasabi sa sato: “Naanggot si Jehova ki Salomon, huli ta an saiyang puso ruminayo [sa] Dios nin Israel, an saro na nagpaheling sa saiya nin duwang beses.” Sinabi ni Jehova ki Salomon: “Sa dahelan na . . . dai mo inotob an sakong tipan saka an sakong mga pagboot na itinao ko bilang pagboot sa saimo, sierto nanggad na papasingon ko sa saimo an kahadean, asin itatao ko nanggad iyan sa saimong lingkod.”​—1 Ha. 11:9-11.

7. Minsan ngani isinikwal si Salomon, paano inataman ni Jehova an mga maimbod sa Saiya?

⁷ Sa siring isinugo ni Jehova si propeta Ahias tanganing lahidan an maligtas sa sainda. An paraligtas na iyan iyo si Jeroboam, sarong may kakayahan na lalaki na naglingkod sa pamamahala ni Salomon. Minsan ngani nagdanay si Jehova na maimbod sa ipinakipagtipan nia ki David manongod sa Kahadean, nag-oyon Sia na bangaon an pamamahala sa 12 tribo. An sampulong tribo itatao ki Jeroboam; an duwang tribo magdadanay sa mga gikan ni David, na irinerepresentar ngonyan ni Hadeng Roboam. (1 Ha. 11:29-37; 12:16, 17, 21) Sinabi ni Jehova ki Jeroboam: “Mangyayari na, kun kukuyogon mo an gabos na ipagboboot ko sa saimo, asin maglalakaw ka nanggad sa sakong mga dalan saka talagang gigibohon an tama sa sakong pagheling paagi sa pag-otob kan sakong mga pagboot asin sakong mga togon, siring kan ginibo ni David na sakong lingkod, ako man masasakaibanan mo, asin itotogdok taka nin nagdadanay na harong, siring kan itinogdok ko para ki David, asin itatao ko sa saimo an Israel.” (1 Ha. 11:38) Si Jehova naghiro para sa banwaan nia asin naggibo nin paagi tanganing makaginhawa sinda sa pan-aapi.

8. Anong mga pagbalo an nagpapasakit sa banwaan nin Dios ngonyan?

⁸ Lakop ngonyan an pan-aapi asin inhustisya. “An tawo nagsakop sa tawo sa saiyang ikakaraot,” an sabi sa Eclesiastes 8:9. An mahanab na komersio asin maraot na pamamahala puedeng magresulta sa masakit na mga kamugtakan sa ekonomiya. An mga namomoon sa gobyerno, negosyo, asin relihion sa parate nagtatao nin bakong marahay na halimbawa sa moral. Kun siring, kapareho kan matanos na si Lot, an mga maimbod sa Dios ngonyan “napupurisaw na gayo sa pagpangana kan mga makisuway sa ley sa malaswang gawe-gawe.” (2 Ped. 2:7) Apuera dian, mantang matoninong kitang nagmamaigot na mamuhay oyon sa diosnon na mga pamantayan, sa parate nagigin punteriya kita nin persekusyon nin aroganteng mga namamahala.​—2 Tim. 3:1-5, 12.

9. (a) Ano na an ginibo ni Jehova tanganing iligtas an saiyang banwaan? (b) Taano ta makakasierto kita na si Jesus pirmeng magigin maimbod sa Dios?

⁹ Pero, makakasierto kita sa pundamental na katotoohan na ini: Dai papabayaan ni Jehova an mga maimbod sa saiya! Isip-isipon na sana an mga lakdang na saiya nang ginibo tanganing salidahan an maraot na mga namomoon sa kinaban. Naestablisar na an Mesiyanikong Kahadean nin Dios sa kamot ni Cristo Jesus. Haros sanggatos na taon nang namamahala si Jesu-Cristo sa langit. Sa dai na mahahaloy tatawan nia nin lubos na kaginhawahan an mga natatakot sa ngaran nin Dios. (Basahon an Kapahayagan 11:15-18.) Pinatunayan na ni Jesus an saiyang kaimbodan sa Dios sagkod sa kagadanan. Bakong arog ni Salomon, nungkang susudyaon ni Jesus an linalaoman kan saiyang mga sakop.​—Heb. 7:26; 1 Ped. 2:6.

10. (a) Paano niato ikakapaheling na pinapahalagahan niato an Kahadean nin Dios? (b) Kun napapaatubang sa mga pagbalo, sa ano kita makakasarig?

¹⁰ An Kahadean nin Dios sarong tunay na gobyerno na matapos sa gabos na pan-aapi. Kita maimbod ki Jehova Dios asin sa saiyang areglo. Huling may lubos na kompiansa sa Kahadean, isinisikwal niato an pagkabakong diosnon kan kinaban asin nagmamaigot kita sa marahay na mga gibo. (Tito 2:12-14) Nagmamaigot kita na magdanay na daing digta kan kinaban na ini. (2 Ped. 3:14) Ano man na mga pagbalo an mapaatubang sa sato sa presente, makakasarig kita na poprotehiran kita ni Jehova na dai madanyaran an satong espirituwalidad. (Basahon an Salmo 97:10.) Dugang pa, sinisierto sa sato kan Salmo 116:15: “Mahalaga nanggad sa mga mata ni Jehova an kagadanan kan mga maimbod sa saiya.” An mga lingkod ni Jehova mahalagang marhay sa saiya kaya dai nia totogotan na magadan sinda bilang sarong grupo.

Kun Namemeligrong Maimpluwensiahan nin mga Apostata

11. Paano nagin bakong maimbod si Jeroboam?

¹¹ An pamamahala ni Hadeng Jeroboam puede kutanang nagtao nin kaginhawahan sa banwaan nin Dios. Imbes, an saiyang mga ginibo orog pang nakabalo sa saindang kaimbodan sa Dios. Huling dai kontento sa onra asin pribilehio na itinao na sa saiya, nagpoon si Jeroboam na maghanap nin mga paagi tanganing pakosogon an saiyang poder. “Kun an banwaan na ini padagos na maturukad tanganing magtao nin mga atang sa harong ni Jehova sa Jerusalem,” an pangangatanosan nia, “an puso kan banwaan na ini seguradong mabalik man sa saindang kagurangnan, ki Roboam na hade kan Juda; asin siertong gagadanon ninda ako asin mabalik sinda ki Roboam na hade kan Juda.” Kaya inestablisar ni Jeroboam an sarong bagong relihion na nakasentro sa duwang bulawan na ogbon na baka. “Dangan ibinugtak nia an saro sa Betel, asin an saro pa ibinugtak nia sa Dan. Asin an bagay na ini nagin dahelan nin kasalan, asin an banwaan nagpoon na magduman pa sa Dan tanganing umatubang sa saro na yaon duman. Asin sia nagpoon sa paggibo nin harong nin haralangkaw na lugar asin sa paggibo nin mga saserdote hale sa kadaklan kan banwaan, na bakong mga aking lalaki ni Levi.” Nag-imbento pa ngani si Jeroboam nin sadiri niang aldaw nin “kapiestahan para sa mga aki ni Israel,” asin nagpoon siang ‘magdolot sa ibabaw kan altar tanganing magdolot nin atang na aso.’​—1 Ha. 12:26-33.

12. Ano an ginibo kan mga maimbod sa Dios na yaon sa kahadean sa amihanan kan establisaron ni Jeroboam sa Israel an pagsamba sa ogbon na baka?

¹² Ano ngonyan an gigibohon kan mga maimbod sa Dios na yaon sa kahadean sa amihanan? Arog kan maimbod na mga apoon ninda, tolos-tolos na huminiro an mga Levita na nag-eerok sa mga siudad na itinao sa sainda sa teritoryo kan kahadean sa amihanan. (Ex. 32:26-28; Bil. 35:6-8; Deut. 33:8, 9) Binayaan ninda an saindang mana asin ibinalyo ninda patimog sa Juda an saindang mga pamilya, na duman makakapagpadagos sinda sa pagsamba ki Jehova na dai nin olang. (2 Cron. 11:13, 14) Pinagmarahay kan ibang Israelita na temporaryong nag-eerok sa Juda na magpermanente na duman imbes na magbalik sa lugar ninda. (2 Cron. 10:17) Sinegurado ni Jehova na danay na bukas an dalan pabalik sa tunay na pagsamba tanganing sa masunod na mga kapag-arakian an iba sa kahadean sa amihanan puedeng bumaya sa pagsamba sa ogbon na baka asin bumalik sa Juda.​—2 Cron. 15:9-15.

13. Sa presenteng mga panahon, paano nakabalo sa banwaan nin Dios an mga impluwensia nin mga apostata?

¹³ An mga apostata asin an mga impluwensia ninda nagtataong peligro sa banwaan nin Dios ngonyan. Pinagmaigotan nin nagkapirang namamahala na mag-establisar nin sadiri nindang porma nin relihion kan Estado, na pinipirit an mga sakop ninda na akoon iyan. An mga klero nin Kakristianohan asin iba pang pangahas nagprobar na maghingako na sinda daa an espirituwal na mga saserdote. Minsan siring, solamenteng sa tunay na mga Kristiano sana kita makakanompong nin tunay na mga linahidan, na minakompuesto kan “sa hadeng grupo nin mga saserdote.”​—1 Ped. 2:9; Kap. 14:1-5.

14. Ano an maninigo niatong gibohon dapit sa apostatang kaisipan?

¹⁴ Kapareho kan maimbod na mga Levita kaidtong ikasampulong siglo B.C.E., an mga maimbod sa Dios ngonyan dai nadadaya kan mga ideya nin mga apostata. An mga linahidan asin an Kristianong mga kaasosyar ninda marikas sa paglikay asin pagsikwal sa mga ideya nin mga apostata. (Basahon an Roma 16:17.) Minsan ngani kita gikan sa boot na nagpapasakop sa mga autoridad sa gobyerno kun manongod sa sekular na mga bagay asin nagdadanay na neutral sa iriwal sa kinaban, an satong kaimbodan yaon sa Kahadean nin Dios. (Juan 18:36; Roma 13:1-8) Isinisikwal niato an putik na mga paghihingako kan mga nagsasabing naglilingkod sinda sa Dios asin kadungan kaiyan naglalapastangan sa saiya paagi sa saindang paggawe.​—Tito 1:16.

15. Taano ta maninigo sa satong kaimbodan “an maimbod asin mapagmansay na oripon”?

¹⁵ Isip-isipon man an katunayan na, sa piguratibong pagtaram, pinagin posible ni Jehova na an mga sadiosan an puso makaluwas sa marigsok na kinaban pasiring sa espirituwal na paraiso na inestablisar nia. (2 Cor. 12:1-4) May pusong pano nin pasasalamat, nagdadanay kitang dayupot sa “maimbod asin mapagmansay na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa tamang panahon.” Ninombrahan ni Cristo an oripon na ini “na mamahala sa gabos niang rogaring.” (Mat. 24:45-47) Kun siring, bilang mga indibiduwal, dawa kun dai niato lubos na nasasabotan an sarong paninindogan kan grupong oripon, bako iyan na dahelan na isikwal niato iyan o na kita magbalik sa kinaban ni Satanas. Imbes, an kaimbodan mapahiro sa sato na gumawe na may kapakumbabaan asin halaton si Jehova na linawon an mga bagay-bagay.

Mantang Ginigibo an Itinao nin Dios na mga Asignasyon

16. Anong asignasyon an inako nin sarong propeta hale sa Juda?

¹⁶ Kinondenar ni Jehova si Jeroboam huli sa apostatang mga gibo kaini. Nag-asignar sia nin propeta hale sa Juda tanganing magpaamihanan sa Betel asin atubangon si Jeroboam mantang pinapangenotan kaini an pag-atang sa saiyang altar. Kaipuhan na ipaabot kan propeta an mapanlaglag na mensahe nin paghokom ki Jeroboam. Daing duda na masakit na asignasyon idto.​—1 Ha. 13:1-3.

17. Paano prinotehiran ni Jehova an saiyang mensahero?

¹⁷ Naanggot na gayo si Jeroboam kan madangog nia an pagkondenar ni Jehova. Itinokdo nia an representante nin Dios, na kinukurahawan an mga lalaki na yaon sa harani: “Dakopa nindo sia!” Alagad bago pa may makahiro, bigla na sana na an “kamot na inunat nia tumang [sa propeta] naalang, asin dai na nia iyan nakabig. Asin an altar mismo nabaak kaya an abo kan taba naula hale sa altar.” Napiritan si Jeroboam na pakiolayan an propeta na palumoyon an lalawgon ni Jehova asin ipamibi na paomayan an naalang na kamot. Ginibo iyan kan propeta, asin an kamot naomayan. Sa siring, prinotehiran ni Jehova an saiyang mensahero sa kapahamakan.​—1 Ha. 13:4-6.

18. Paano kita binabantayan ni Jehova mantang daing takot niatong ginigibo an sagradong paglilingkod sa saiya?

¹⁸ Mantang maimbod kitang nakikikabtang sa paghuhulit kan Kahadean asin paggibo nin disipulo, kun beses may nakakaatubang kitang mga tawo na bakong makikatood o antipatiko pa ngani sa sato. (Mat. 24:14; 28:19, 20) Alagad dai niato noarin man togotan na lumuya an satong kaigotan sa ministeryo huli sa takot na haboan kita kan mga tawo. Kapareho kan dai nginaranan na propeta kan panahon ni Jeroboam, igwa kita kan “pribilehio na daing takot na maggibo nin sagradong paglilingkod [ki Jehova] na may kaimbodan.”a (Luc. 1:74, 75) Minsan ngani dai kita nag-aasa na si Jehova milagrosong mainterbenir ngonyan, binabantayan asin sinusuportaran pa man giraray nia kita bilang saiyang mga Saksi paagi sa saiyang banal na espiritu asin mga anghel. (Basahon an Juan 14:15-17; Kapahayagan 14:6.) Nungkang papabayaan nin Dios an mga daing takot na nagpapadagos sa pagtaram kan saiyang tataramon.​—Fil. 1:14, 28.

Babantayan ni Jehova an mga Maimbod sa Saiya

19, 20. (a) Taano ta makakasierto kita na nungka kitang papabayaan ni Jehova? (b) Anong mga hapot an totokaron sa masunod na artikulo?

¹⁹ Si Jehova an satong maimbod na Dios. (Kap. 15:4; 16:5) Sia “maimbod sa gabos niang gibo.” (Sal. 145:17) Asin sinisierto sa sato kan Biblia: “Babantayan nia an mismong dalan kan mga maimbod sa saiya.” (Tal. 2:8) Kun napapaatubang sa mga pagbalo o sa mga ideya nin mga apostata o kun ginigibo an masakit na asignasyon, an mga maimbod sa Dios makakasarig sa paggiya asin pagsuportar ni Jehova.

²⁰ An kaipuhan na horophoropon niato ngonyan bilang indibiduwal iyo ini: Ano an makakatabang sa sako na papagdanayon an sakong kaimbodan ki Jehova ano man na mga pagbalo o sugot an umabot sa sako? Sa ibang pagtaram, paano ko mapapakosog an sakong kaimbodan sa Dios?

[Nota sa Ibaba]

Ano an Isisimbag Nindo?

• Paano ipinaheling ni Jehova na dai nia pinabayaan an mga maimbod sa saiya kan nakakaeksperyensia sinda nin pang-aapi?

• Ano an maninigo niatong gibohon dapit sa mga apostata asin sa mga ideya ninda?

• Paano binabantayan ni Jehova an mga maimbod sa saiya mantang nakikikabtang sinda sa Kristianong ministeryo?

[Mapa/​Ritrato sa pahina 5]

(Para sa aktuwal na format, hilingon an publikasyon)

KAHADEAN SA AMIHANAN (Jeroboam)

Dan

SIQUEM

Betel

KAHADEAN SA TIMOG (Roboam)

JERUSALEM

[Ritrato]

Dai pinabayaan ni Jehova an mga maimbod sa saiya kan ponan ni Jeroboam an pagsamba sa ogbon na baka

[Ritrato sa pahina 3]

May kondisyon an mga bendisyon na nakamtan ni Salomon asin kan saiyang mga sakop