Pinakusog ni Jehova an Buot ni Elias

Angguton si Jezebel kan naaraman niya an nangyari sa mga propeta ni Baal. Nagpadara siya nin mensahe ki Elias: ‘Sa aga, magagadan ka man.’ Takuton si Elias kaya nagdulag siya pasiring sa disyerto. Namibi siya: ‘Jehova, dai ko na po kaya. Gusto ko nang magadan.’ Dahil sa kapagalan, napaturog siya sa sirong nin sarong kahoy.

Pinukaw siya nin sarong anghel asin malumanay na sinabihan: ‘Buhat na, magkakan ka.’ Nakahiling si Elias nin sarong bilog na tinapay sa ibabaw nin pinainit na mga gapo asin sarong pitsel nin tubig. Nagkakan siya asin nag-inom dangan nagturog giraray. Pinukaw siya liwat kan anghel asin sinabihan: ‘Magkakan ka. Kaipuhan mong kusog para sa pagbaklay.’ Nagkakan giraray siya. Dangan nagbaklay siya nin 40 aldaw asin 40 banggi, sagkod sa Bukid nin Horeb. Naglaog siya sa sarong kuweba duman para magturog. Pero kinaulay siya ni Jehova: ‘Ano an ginigibo mo digdi, Elias?’ Nagsimbag si Elias: ‘Dai ginibo kan mga Israelita an pangako ninda saimo. Rinaot ninda an mga altar mo asin ginaradan an mga propeta mo. Gusto man ninda akong gadanon.’

Nagsabi saiya si Jehova: ‘Lumuwas ka asin tumindog sa bukid.’ Inot, sarong makusog na duros an naghuyop. Sunod, nagkaigwa nin linog dangan kalayo. Pagkatapos, nakadangog si Elias nin maluway asin kalmadong boses. Tinahuban niya an saiyang lalawgona kan saiyang pang-ibabaw na bado asin nagtindog sa luwas kan kuweba. Hinapot siya ni Jehova kun nata nagdulag siya. Nagsimbag si Elias: ‘Ako na lang kaya an natatada.’ Pero sinabi saiya ni Jehova: ‘Dai ka nagsosolo. May 7,000 pa sa Israel na nagsasamba pa man giraray sako. Magduman ka asin lahidan mo si Eliseo bilang propeta na kasalida mo.’ Ginibo tulos ini ni Elias. Sa hiling mo, tatabangan ka man daw ni Jehova pag ginibo mo an ipinapagibo niya? Iyo, tatabangan ka niya. Aramon ta ngunyan an sarong pangyayari kaidtong tigmara kan panahon ni Elias.